காங்கிரஸ் கட்சியின் ஒரே நம்பிக்கை ராகுல் காந்திதான். அடுத்த பத்தாண்டுகளுக்குள் அவரால் மட்டுமே தமிழகத்தில் காங்கிரஸ் கட்சியை வலுப்படுத்த முடியும். அதைச் செய்யும் காரியத்தில் அவர் இறங்கியுள்ளது நன்கு தெரிகிறது.
அரசியலில் பத்தாண்டுகள் என்பது மிகக் குறுகிய காலம். ஆனால் அடுத்து வரும் பத்தாண்டுகள் தமிழகத்தில் மிகவும் சுவாரசியமான காலகட்டம்.
திமுக கட்சி கருணாநிதிக்குப் பிறகு எவ்வளவு வலுவாக இருக்கும் என்ற கேள்விக்குறி உள்ளது. உள்ளார்ந்த குடியாட்சி முறையில் கட்டப்படாத, தனி நபர் விசுவாசம் சார்ந்த கட்சிகள் அனைத்துமே தள்ளாடும். கருணாநிதியின் வாரிசுகள் ஒருவருக்கு ஒருவர் அடித்துக்கொண்டால், கட்சி உடைவதை யாரும் தடுக்கமுடியாது.
அதிமுக, மேலும் மோசமான நிலையில் உள்ளது. ஜெயலலிதாவுக்கு என தெளிவான கொள்கைகள், செயல்திட்டம் என்று எதுவும் இல்லை என்று தெரிகிறது. என் கணிப்பில் திமுக, அதிமுக என்ற இரண்டு கட்சிகளில் அதிமுகதான் முதலில் உடைந்து சிதறும் என்பேன்.
பாமக, விடுதலைச் சிறுத்தைகள் இரண்டும் தம் கட்சிகளை வலுப்படுத்தும் முயற்சியில் நான் எதிர்பார்த்த அளவுக்கு இறங்கவில்லை. தேமுதிகவுக்குக் கிடைக்கும் வாக்குகள் எல்லாமே திமுக/அதிமுக எதிர்ப்பு வாக்குகள். காங்கிரஸ் தனித்துப் போட்டியிடும் பட்சத்தில் இந்த வாக்குகள் காங்கிரஸுக்குச் செல்லும்.
ஈழப் பிரச்னை சில ஆண்டுகளில் மறக்கப்பட்டு, காங்கிரஸ் மன்னிக்கப்பட்டுவிடும். கருணாநிதி பொறுப்பில் திமுக இருக்கும்வரை காங்கிரஸ் அடக்கியே வாசிக்கும் என்று தோன்றுகிறது.
கம்யூனிஸ்டுகள் இப்போது இருப்பதற்குமேல் வலுப்பெற வாய்ப்புகள் இல்லை. பாஜக தமிழகத்தில் வளர்வதற்கும் அடுத்த பத்தாண்டுகளில் வாய்ப்பு இல்லை.
சில ஹேஷ்யங்கள்:
2011 சட்டமன்றத் தேர்தல்: திமுக/காங்கிரஸ் கூட்டணி வெல்லும். ஸ்டாலின் முதல்வர் (அதற்கு முன்னரே அவர் முதல்வர் ஆகியிருக்கலாம்). ஆனால் மிகக் குறைந்த இடங்களே முன்னணியில் இருப்பர். எதிர்க்கட்சிகள் உடைந்து சிதறி இருக்கும். கூட்டணி ஆட்சி எப்படி நீடிக்கும் என்று சொல்வது கடினம்.
2014 நாடாளுமன்றத் தேர்தல்: திமுக/காங்கிரஸ் கூட்டணி ஏற்படாமல் போகலாம். இந்தப் பிரச்னை காரணமாக, பெரும்பான்மை வலு இல்லாத ஆட்சி கவிழலாம்.
2014 (அல்லது) 2016 சட்டமன்றத் தேர்தல்: காங்கிரஸ் ஆட்சிக்கு வரக்கூடும்?