ஷீ ஜின்பிங் - புத்தகம்

இப்போது படிக்கக் கையில் எடுத்திருப்பது ஷீ ஜின்பிங் பற்றிய ஒரு புத்தகம்: Inside the Mind of Xi Jinping. கிண்டில் அன்லிமிடெட் இருந்தால் இலவசமாகவே படிக்கலாம். இன்றைய தேதியில் சீனாவைப் புரிந்துகொள்ள இந்த மனிதரைப் பற்றிப் புரிந்துகொண்டே ஆகவேண்டும். இதுதான் சிறந்த புத்தகமாக என்று படித்து முடித்துவிட்டுச் சொல்கிறேன்.

வெட்டுவான்கோவில் பற்றிய உரை (வீடியோ ஆங்கிலத்தில்)

சமீபத்தில், Zoom வழியாக எட்டாம் நூற்றாண்டு பாண்டியர்கால ஒற்றைக்கல் தளியான வெட்டுவான்கோவில் குறித்து நான் ஆற்றிய உரை.

சுவைமிகு இந்திய வரலாறு - ஒலிப்பதிவுகள்

அநிருத் கனிசெட்டி என்னும் இளைஞர், ஓரிரு ஆண்டுகளுக்குமுன் உருவாக்கிய Echos of India என்னும் ஒலிப்பதிவுகளை முழுமையாகக் கேட்டேன். நன்றாகச் செய்திருக்கிறார். இந்தோ-கிரேக்கர்கள் தொடங்கி, இந்தோ-ஸ்கைத்தியர்கள் (சகர்கள்), மௌரியர்கள், குஷானர்கள், சாதவாகனர்கள் என்று சிறுசிறு துண்டுகளாக வரலாற்றைச் சுவைபடக் கொண்டுவந்திருக்கிறார். ஏனோ அடுத்தடுத்த சீசன்களுக்குச் செல்லாமல், இரண்டு சீசன்களோடு நிற்கிறது இந்த ஒலிப்பதிவு. நீங்களும் கேட்கலாம். உங்கள் குழந்தைகளையும் கேட்கச் சொல்லலாம். உங்கள் குழந்தைகள் இந்திய வரலாற்றின்மீது காதல்கொள்ள இந்த ஒலிப்பதிவுகள் உதவும்.

மார்க்கோ போலோ - நெட்ஃபிளிக்ஸ் தொடர்

நெட்ஃபிளிக்ஸில் இரண்டு சீசன் மார்க்கோ போலோ பார்த்தேன். மார்க்கோ போலோ என்று பெயர் இருப்பதால் அந்தப் பாத்திரத்தை மிகப் பிரம்மாண்டமாகக் காட்டவேண்டும் என்று செய்திருக்கிறார்கள். விட்டால், மங்கோலியர்களுக்குக் குதிரை ஏறவும் அம்பு விடவும் சொல்லிக்கொடுத்ததே மார்க்கோ போலோதான் என்று சொல்லியிருப்பார்கள். 

மிக அதிக பொருட்செலவில் பிரமாதமாக எடுத்திருக்கிறார்கள். வரலாற்றைப் பள்ளி மாணவர்களுக்கு எடுத்துச் செல்ல இதுபோன்ற சீரியல்கள் உதவும். ஆனால் இதில் தடால் தடாலென்று கலவிக் காட்சிகள் வந்துவிடுகின்றன. இப்படியெல்லாம் சீன்கள் வைத்தும் 200 மில்லியன் டாலர் நஷ்டம் என்று விக்கிபீடியா சொல்கிறது. அதனால் இரண்டு சீசன்களோடு முடித்துவிட்டார்களாம்.

மீண்டும் இந்தத் தொடரைத் தொடர்ந்து எடுத்தார்கள் என்றால் நன்றாக இருக்கும்.

இந்தியா - சீனா - அமெரிக்கா

ஆதன் தமிழுக்கு சீன-இந்திய எல்லைப் பிரச்னை குறித்து அளித்த பேட்டி.