மும்பை டெஸ்ட் - முதல் நாள்

இந்தியா 22/2 (11 ஓவர்கள்) - திராவிட் 9*, டெண்டுல்கர் 2*

அரபிக் கடலில் எதிர்பாராத காற்றழுத்தத் தாழ்வு மண்டலம். மழை பிடித்துக்கொள்ள, மும்பையில் காலையில் ஆட்டம் தொடங்கவில்லை.

சற்று மழை விட்டு, நீர் உறிஞ்சுவானைப் பயன்படுத்தியபின் மதியம் 2.00 மணிக்கு ஆட்டம் தொடங்கியது. கடைசியாக இந்தியா டாஸில் ஜெயித்து, முதலில் பேட்டிங் செய்தது. அணியில் பல மாற்றங்கள். பார்த்திவ் படேலுக்கு பதில் தமிழகத்தின் தினேஷ் கார்த்திக் விக்கெட் கீப்பர். ஆகாஷ் சோப்ராவுக்கு பதில் அவரது தில்லியிலிருந்தே கவுதம் கம்பீர் தொடக்க ஆட்டக்காரர். இருவருக்கும் இதுவே முதல் டெஸ்ட். ஹர்பஜன் சிங் ஜுரத்திலிருந்து மீண்டதால், அகர்கருக்கு பதில் உள்ளே வருகிறார். ஆஸ்திரேலியா அணியிலும் மாற்றம். பாண்டிங் அணித்தலைவராக, லெஹ்மனுக்கு பதில் வருகிறார். ஷேன் வார்ன் கை விரலில் முறிவு. அதனால் நேதன் ஹவ்ரிட்ஸ் என்னும் ஆஃப் ஸ்பின் பந்துவீச்சாளர் புதிதாக வருகிறார், அவரது முதல் டெஸ்டும் இதுவே.

மெக்ராத், கில்லஸ்பி இருவரும் நன்றாகவே பந்து வீசினர். சேவாக் அபாயத்தைக் கட்டித் தழுவி முத்தமிட்டுக் கொண்டிருந்தார். மூன்றாவது ஸ்லிப்புக்கும், கல்லிக்கும் இடையில் பறந்த ஒரு நான்கும் அதில் அடக்கம். மூன்றாவது ஓவர் கடைசிப் பந்தில், மெக்ராத்தின் பந்து ஆஃப் ஸ்டம்பிற்கு வெளியே விழுந்து உள்ளே வெட்டி வந்தது. சேவாக் பெரிய ஷாட் ஒன்றை அடிக்கப் போய், பேட்டுக்கும், கால் காப்பிற்கு இடையில் நிறைய இடைவெளி விட்டிருந்தார். பந்து ஆஃப் ஸ்டம்பைப் பதம் பார்த்தது. சேவாக் 8, இந்தியா 11/1.

அடுத்த ஓவரின் முதல் பந்திலேயே கில்லெஸ்பி புதியவர் கம்பீரை எல்.பி.டபிள்யூ ஆக்கினார். லெக் ஸ்டம்பில் விழுந்த பந்து நடு ஸ்டம்பில் காலில் பட்டது. கம்பீர் 3, இந்தியா 11/2.

டெண்டுல்கர் வந்தது முதற்கொண்டே தடுமாறினார். அந்த ஓவரின் கடைசியிலேயே மழை மீண்டும் பிடித்துக் கொண்டது. சிறிது இடைவெளிக்குப் பின் மீண்டும் திராவிடும் டெண்டுல்கரும் விளையாட வந்தனர். திராவிட் விளிம்பில் தட்டி முதல் ஸ்லிப் ஹெய்டன் கையில் விழாமல் முன்னாலேயே விழுந்த கேட்ச் ஒன்று அவருக்கு நான்கு ரன்களைக் கொடுத்தது. மெக்ராத் பந்துவீச்சில் டெண்டுல்கர் அடிக்காது விட்ட பந்து ஒன்று ஆஃப் ஸ்டம்பிற்கு வெளியே விழுந்து, உள்ளே சடாரென திரும்பி காலில் பட்டது. அவுட்டாயிருக்கலாம். ஆனால் நடுவர் ரூடி கொர்ட்சன் கொடுக்கவில்லை. டெண்டுல்கர் மிகவும் கஷ்டப்பட்டார் என்றே சொல்ல வேண்டும். மெக்ராத்தின் ஒரு பந்து எழும்பும் என்று நினைத்து குனிந்தார் டெண்டுல்கர், ஆனால் பந்து முதுகில் வந்து இறங்கியது. மற்றொரு முறை எழும்பி வந்த பந்து தோள்பட்டையில் அடித்தது.

உருப்படியான ஒரே ஷாட் திராவிட் கில்லெஸ்பியின் பந்தை நேராக ஸ்டிரெயிட் டிரைவ் செய்து பெற்ற நான்கு ரன்களே. டெண்டுல்கர் வெளிச்சம் சரியாக இல்லையென்று அவ்வப்போது வானத்தைப் பார்த்துக்கொண்டிருந்தார். அரங்க நிர்வாகம் ஒளி விளக்குகளைப் போட்டது. ஆனால் அந்த வெளிச்சம் சரியில்லையென்று இந்தியர்கள் புகார் செய்ய, கொர்ட்சன், அலீம் தர் அதை ஏற்க, டெண்டுல்கர் 'அப்பா, பிழைத்தோம்' என்று கிளம்பி விட்டார். ஆனால் பாண்டிங் கடைசிவரை நடுவர்களிடம் விவாதித்துக் கொண்டிருந்தார். இன்னமும் இரண்டு, மூன்று ஓவர்கள் இருந்திருந்தால் டெண்டுல்கர் விக்கெட் விழுந்திருக்கும். 'இன்று போய் நாளை வா' தான் இப்பொழுது. நாளை பார்க்கலாம் டெண்டுல்கரும், இந்திய அணியும் எத்தனை நேரம் தாக்குப் பிடிக்கிறார்கள் என்று.

இலங்கை வடக்குப் பகுதிகளுக்கு முரளிதரன் சுற்றுப்பயணம்

கிரிக்கின்ஃபோ செய்தி

இலங்கை கிரிக்கெட் வீரர் முத்தையா முரளிதரன் யாழ்ப்பாணம், கிளிநொச்சி, வவுனியா பகுதிகளைச் சுற்றிப் பார்த்து, விடுதலைப் புலிகளும், இலங்கை அரசும் பேச்சு வார்த்தையில் ஈடுபட்டு அனைவரும் அமைதியாக இருக்க வழி செய்ய வேண்டும் என்று கேட்டுக் கொண்டுள்ளாராம்.

கிட்டத்தட்ட ஒரு மணிநேரம் விடுதலைப் புலிகள் தலைவர் ஒருவருடன் அவர் பேசியதாகச் செய்தி வந்துள்ளது.

[எந்த மொழியில் இருவரும் பேசியிருப்பார்கள்? இரமணி முன்னர் ஒருமுறை முரளிதரனுக்கு தமிழ் பேசுவதே மறந்து போய்விட்டதாக யாரோ சொன்னதாக எங்கோ எழுதியிருந்தார்.]

கிரிக்கெட் தொலைக்காட்சி வர்ணனையாளர்கள் பற்றி

துணைக்கண்டத்தின் கவாஸ்கர்கள் என்ற பதிவில் கண்ணன் தொலைக்காட்சியில் வரும் கிரிக்கெட் வர்ணனையாளர்கள் பற்றி எழுதியுள்ளார்.

அதைப்பற்றிய என் கருத்துகளைச் சொல்வதற்கு முன்னால் சில உள்விஷயங்கள் பற்றி எழுதுகிறேன்.

கிரிக்கெட் ஒளிபரப்பு பெரிய விஷயமாவதற்கு முன்னால் இங்கிலாந்தில் நடக்கும் கிரிக்கெட் ஆட்டங்களையெல்லாம் பிபிசியும், இந்தியாவின் ஆட்டங்களை தூரதர்ஷனும் தயாரித்து ஒளிபரப்பின. மற்ற சில நாடுகளிலும் அந்தந்த நாடுகளின் அரசு சார்ந்த, வணிக அனுபவம் இல்லாத தொலைக்காட்சி நிறுவனங்களே கிரிக்கெட் தயாரித்தல் மற்றும் ஒளிபரப்பில் ஈடுபட்டன. ஆஸ்திரேலியாவில் முதல் முறையாக தனியார் சானலான கெர்ரி பேக்கரின் சானல் 9 கிரிக்கெட் ஒளிபரப்பைப் பெறுவதன் மூலம் சில புதுமைகளைக் கொண்டுவந்து அதன்மூலம் நிறைய சம்பாதிக்க முடிவு செய்தது. ஆனால் ஆஸ்திரேலிய கிரிக்கெட் வாரியம் கெர்ரி பேக்கருடன் ஒத்துப்போகவில்லை. இதனால் பேக்கர் அப்பொழுது ஆஸ்திரேலிய கிரிக்கெட்டையே உடைத்து, பின் உலக கிரிக்கெட்டையே சிறிது ஆட்டம் காணவைத்து சூப்பர் டெஸ்ட்கள் என்று சில போட்டிகளை நடத்தினார். அப்பொழுதுதான் இரவு நேரங்களில் ஒளிவிளக்குகளின் அடியில் விளையாடுதல், விளையாட்டாளர்களுக்கு வண்ணச்சீருடை, வர்ணனையில் கொஞ்சம் ஜிலுஜிலுப்பு என்றெல்லாம் கொண்டுவந்தார்.

அதன்பின் ஆஸ்திரேலிய கிரிக்கெட் ஒருவழியாக பேக்கருடன் சமாதானம் செய்துகொண்டது. தொடர்ந்து பேக்கரின் சானல் 9 கிரிக்கெட் ஒளிபரப்பில் நிறையப் புதுமைகளைச் செய்ய ஆரம்பித்தது. அதில் ஒன்று, ஒரே முகங்களை ஆஸ்திரேலிய தொலைக்காட்சி ரசிகர்களுக்குக் காண்பிப்பது, ஆஸ்திரேலியர்களுக்குப் பிடிக்குமாறு pro-Australia வர்ணனை கொடுப்பது என்பது.

கிட்டத்தட்ட அந்த நேரத்தில்தான் கிரிக்கெட் ஒளிபரப்பு உலகளாவவே வணிகத்தன்மை நிறைந்ததாக மாறியது. பிரிட்டனைச் சேர்ந்த இரண்டு நிறுவனங்கள் - மார்க் மெக்கார்மாக்கின் TWI, மைக்கேல் வாட்டின் CSI - மற்ற விளையாட்டுக்களுடன் கிரிக்கெட் விளையாட்டினை தொலைக்காட்சிக்கெனத் தயாரிப்பதிலும் அதைப் பல நாடுகளின் தொலைக்காட்சி சானல்களுக்கு விற்பதிலும் ஈடுபட்டன.

இவ்விரு நிறுவனங்களும் பிரிட்டனைச் சேர்ந்ததாக இருந்ததால் இவர்கள் கொண்டுவந்த வர்ணனையாளர்களும் பிரிட்டன், ஆஸ்திரேலியா போன்ற நாட்டவராகவே இருந்தனர். இவர்களது தரக்கட்டுப்பாட்டில் இந்தியாவின் கவாஸ்கர் மட்டுமே தேறினார். அப்பொழுது, கிரிக்கெட் பற்றிய அறிவு, ஆங்கிலப் பயிற்சி ஆகியவற்றை வைத்துப் பார்க்கும்போது வேறு யாரும் தேறியிருக்க முடியாது.

பின்னர் மார்க் மாஸ்கரேனஸின் Worldtel என்ற பெங்களூரைச் சேர்ந்த நிறுவனம் கிரிக்கெட் தயாரித்தலில் ஈடுபட்டது. அப்பொழுது முன்னுக்கு வந்தவர்தான் ரவி ஷாஸ்திரி.

ஹர்ஷா போக்ளே பிபிசி, ஏபிசி வானொலிகளில் வர்ணனை செய்ததன் மூலமும், ஈ.எஸ்.பி.என் ஸ்டார் ஸ்போர்ட்ஸ் இந்திய கிரிக்கெட்டை அதிகமாக நம்பியிருந்ததன் காரணமாகவும் தொலைக்காட்சி வர்ணனைக்குக் கொண்டுவரப்பட்டார். ஹர்ஷாவும் கூட TWI மூலமாகத்தான் முதலில் கிரிக்கெட் வர்ணனைக்கு வந்தார்.

கடந்த சில வருடங்களில் பல இந்திய சானல்கள் கிரிக்கெட்டில் ஆர்வம் காட்டுவதனால் அந்தந்த சானல்களுக்கென பிரத்யேகமான முகங்கள் தேவைப்பட்டன. டென் ஸ்போர்ட்ஸ் இந்திய முகமாக சஞ்சய் மஞ்ச்ரேகரையும், பாகிஸ்தானிய முகமாக ரமீஸ் ராஜாவையும் பிடித்தது. ஆனால் இவ்விருவருக்கும் நிறையப் பயிற்சி தேவை.

பிரிட்டன் ஸ்கை ஸ்போர்ட்ஸ் 1990களின் தொடக்கத்தில் வெளிநாடுகளில் இங்கிலாந்து விளையாடும் அத்தனை கிரிக்கெட் ஆட்டங்களுக்குமான பிரிட்டன் ஒளிபரப்பு உரிமைகளை வாங்கத் தொடங்கினர். அப்பொழுது ஒரேமாதிரியான முகங்களையும், குரல்களையும் தம் ரசிகர்களுக்குக் காட்ட வேண்டுமென டேவிட் கோவர், பால் அல்லாட், இயான் போதம், பாப் வில்லிஸ், மைக்கேல் ஹோல்டிங் ஆகியோரைத் தேர்ந்தெடுத்தனர். இப்பொழுது இவர்களுடன் நாசர் ஹுசைன், மைக்கேல் ஆதெர்டன் ஆகியோரும் உள்ளனர். அவ்வப்போது இயான் பிஷப்பும் இந்தக் குழுவில் உண்டு.

இதைப்பார்த்த ஈ.எஸ்.பி.என் ஸ்டார் ஸ்போர்ட்ஸ் தானும் அவ்வாறே செய்ய முற்பட்டது. ஆனால் ஒட்டுமொத்த இந்திய முகங்கள் உருப்படியாகக் கிடைக்கவில்லை. அதனால் ஹர்ஷா போக்ளே, சுனில் கவாஸ்கர் ஆகியோரோடு ரவி ஷாஸ்திரி, ஜெஃப் பாய்காட், ஆலன் வில்கின்ஸ் ஆகியோரைச் சேர்த்தனர். நவ்ஜோத் சிங் சித்துவும் வந்தார், ஆனால் ஒருமுறை நேரடி ஒளிபரப்பில் அசிங்கமான வார்த்தைகளைப் பேசியதற்காக துரத்தப்பட்டார். இப்பொழுது டீன் ஜோன்ஸ் அதிகம் காணப்படுகிறார். அருண் லால், மனீந்தர் சிங் ஆகியோரும் காணக் கிடைக்கின்றனர்.

சோனி தான் வாங்கிய உலக்ககோப்பை போன்ற ஐசிசி ஆட்டங்களுக்காக ஒரு பிரத்யேக வர்ணனை அணியை உருவாக்க மிகவும் சிரமப்பட்டது. ஹர்ஷா போக்ளே போன்றவர் அவர்களுக்குக் கிடைக்கவில்லை. சாரு ஷர்மாவைப் பிடித்தனர். அத்துடன் கிரிஷ் ஸ்ரீகாந்த், சிவராமகிருஷ்ணன் ஆகியோரும் கிடைத்தனர். மீதியெல்லாம் வெளிநாட்டு இறக்குமதிகள்.

இப்பொழுதெல்லாம் தொலைக்காட்சி ஒளிபரப்புகளுடன் இரண்டு அல்லது மூன்று வெவ்வேறு வர்ணனையாளர் அணிகள் குரல் வழியான வர்ணனைகளைச் செய்கின்றன. உதாரணத்துக்கு உலகக்கோப்பையின் போது சோனி தனக்கென பிரத்யேகமாக ஒரு வர்ணனையும், ஸ்கை ஸ்போர்ட்ஸ் தனக்கென ஒரு வர்ணனையையும், பிற அனைத்து தொலைக்காட்சி சானல்களுக்கென ஆக்டகன் சி.எஸ்.ஐ ஒரு வர்ணனையையும் உருவாக்கினர். இந்த மூன்றாவது வர்னனையைத்தான் அமெரிக்காவிலோ, தென்னாப்பிரிக்காவிலோ அல்லது பாகிஸ்தானிலோ உள்ள தொலைக்காட்சியில் ஒருவர் கேட்டிருக்க முடியும். இதே வர்ணனைதான் இந்தியாவின் தூரதர்ஷனில் வந்தது. ஆனால் சோனி மேக்ஸில் அவர்களுக்கெனவே உருவாக்கிய பிரத்யேக வர்ணனை (மந்திரா பேடி அவ்வப்போது நடுநடுவே).

சரி. இப்பொழுது கண்ணனின் பதிவுக்கு வருவோம்.

கண்ணன்: ஹென்றி புளோபெல்ட் வர்ணனை உங்களுக்குப் பிடிக்குமா? அந்த மனிதர் சரியான லூஸ். ஏதாவது உளறிக்கொண்டே இருப்பார். ஆட்டத்திற்கும், அவர் பேசுவதற்கும் எந்த உறவும் கிடையாது. நல்ல வேளையாக இப்பொழுது இவரை பிபிசி கூட தள்ளிவைத்துவிட்டது.

ரமீஸ் ராஜா அழுமூஞ்சிதான். சில நாள்கள் முன்னால் வரை அவர் பாகிஸ்தான் கிரிக்கெட்டின் தலைமை நிர்வாகியாகவும், அதே சமயம் டென் ஸ்போர்ட்ஸ் வர்ணனையாளராகவும் பஜனை செய்து கொண்டிருந்தார். நடுநிலை என்பது இவரிடம் துளிகூடக் கிடையாது. இவரையும் சஞ்சய் மஞ்ச்ரேகரையும் அருகருகே வைத்து இந்தியா-பாகிஸ்தான் ஆட்டத்திற்கு வர்ணனை செய்யச் சொன்னால் கொடுமையாக இருக்கும். ரஞ்சித் பெர்னாண்டோ நிலை அய்யோ-பாவம். இலங்கையிலிருந்து ஆங்கில வர்ணனை செய்ய இவரை விட்டால் யாரும் கிடையாது என்பதாலேயே இவர் வர்ணனையில் உள்ளார். புதிதாக யாராவது கிடைத்து விட்டால் பெர்னாண்டோவைக் கழற்றி விட்டுவிடுவார்கள். புதுப்புது இலங்கை ஆட்டக்காரர்களின் பெயர்கள், அவர்களது பின்னணி ஆகியவற்றைச் சரியாகச் சொல்வதற்கு ஒருவராவது இலங்கையிலிருந்து வந்திருக்க வேண்டும். அதனால் மாட்டுபவர் இப்பொழுதைக்கு ரஞ்சித் பெர்னாண்டோ மட்டும்தான். இவரும் சதா அழுதுகொண்டே இருப்பார்.

கவாஸ்கரை இந்த வகையில் நான் சேர்க்கமாட்டேன். அவ்வப்போது ஒருமாதிரியாக நடந்துகொள்வார். ("வடா-பாவ் ஷாட்", "யாபயாபயாபயாப" என்று ஒரு ஸ்டிரெயிட் டிரைவ் அடியைப் பார்த்துவிட்டு திடீரென்று கத்தியது, மும்பை ஆட்டக்காரர்கள் மீதான அளவுகடந்த பிரியம், டெண்டுல்கரை அதிகமாக விமர்சனம் செய்யாதது என்று சில குறைகள் உண்டு.) ஆனால் இவரிடம் இருக்கும் கிரிக்கெட் பற்றிய மிக நுண்ணிய அறிவு வெகு சில வர்ணனையாளர்களுக்கே உண்டு. மேலும் வர்ணனையாளர்கள் தங்கள் வாழ்நாளில் விளையாடிய கிரிக்கெட்டின் தரத்தை வைத்துத்தான் இப்பொழுது விளையாடுபவர்களைக் குறை சொல்ல வேண்டும் என்பதை நான் ஒப்புக்கொள்ளமாட்டேன். நீங்களோ, நானோ ஓர் ஆட்டக்காரரைக் குறைசொல்லும்போது...

கவாஸ்கர், பாய்காட் ஆகியோர் மிக மெதுவாகத்தான் ரன்களைச் சேர்த்தனர். ஆனாலும் இன்றைய கிரிக்கெட் மாறிவிட்டது. அதனால் இப்பொழுது ஒருநாள் போட்டிகளில் இந்திய/பிற அணியினர் மெதுவாக விளையாடும்போது கவாஸ்கர், பாய்காட் ஆகியோர் நிச்சயமாக இவர்களைக் குறை சொல்லலாம். தவறில்லை.

கவர்னர் பந்தாட்டம்

காங்கிரஸ் என்றுமே சர்க்காரியா கமிஷன் சிபாரிசுகளை ஏற்றது கிடையாது. இன்று நம் நாட்டில் உள்ள கட்சிகளிலேயே federalism பற்றிய மோசமான கருத்துகளை வைத்திருப்பது காங்கிரஸ்தான். இத்தனைக்கும் காங்கிரஸ் மிகவும் வலுவற்ற நிலையில்தான் உள்ளது. இதே காங்கிரஸ் வலுவான, தனியாகவே ஆட்சி அமைக்கும் நிலையில் இருந்தால் விளைவு மாநில அரசுகளுக்குப் படுமோசமாக இருக்கும்.

தமிழக ஆளுநர் ராம் மோகன ராவ் மாற்றத்தில் திமுகவுக்கு அதிமுக்கியப் பங்கு இருக்கிறது என்பது இப்பொழுது நன்கு தெளிவாகி விட்டது. முதல்வர் ஜெயலலிதா தனக்கும், மத்திய உள்துறை அமைச்சர் ஷிவ்ராஜ் பாடிலுக்கும் இடையே நடைபெற்ற உரையாடலின் ஒரு பகுதியை வெளியிட்டிருப்பது தவறாகவே தோன்றவில்லை. மத்திய அமைச்சர் ஒருவர் மாநில முதல்வர் ஒருவரிடம் எவ்வளவு முட்டாள்தனமாகப் பேசுகிறார் என்பதை பொதுமக்கள் அறிந்துகொள்ள வேண்டும். மேலும் வழக்கு உச்ச நீதிமன்றத்தில் நடக்கும்போது அதற்குத் தேவையான எல்லாவித சாட்சியங்களையும் நீதிமன்றத்தின் முன் வைப்பது சரியான முறைதான். தேநீர் விருந்து அளிக்கவில்லை என்பதற்காக ஓர் ஆளுநர் தூக்கியெறியப்படுகிறார் - அப்படித்தான் முதல்வரிடம் உள்துறை அமைச்சர் சொல்கிறார். இந்த விஷயத்தை உச்ச நீதிமன்றத்துக்கு எடுத்துச் சென்றுள்ள தமிழக அரசின் தலைமைச் செயலாளர் மத்திய அரசு எப்படி பொறுப்பற்ற விதமாக நடந்து கொள்கிறது என்று காண்பித்துள்ளார்.

உடனே ரகசியக் காப்பு பிரமாணத்தை மீறிவிட்டார் என்றெல்லாம் கதையளக்க தமிழக எதிர்க்கட்சிகள் அனைத்தும் தயாராகி விட்டன. இந்த ரகசியக் காப்பு பிரமாணத்தையே மாற்றி அமைக்க வேண்டும். நாட்டின் பாதுகாப்புக்கு ஊறு விளைவிக்காத எதுவுமே ரகசியக் காப்புப் பிரமாணத்தின் பிடிக்குள் இருக்கக் கூடாது.

அதே சமயம் சுர்ஜித் சிங் பர்னாலா திமுக அனுதாபி என்று ஜெயலலிதா தேவையில்லாது குறை சொல்லக் கூடாது. பர்னாலா இதற்குமுன் கருணாநிதி முதல்வராக இருந்தபோது (1989-90) தமிழக ஆளுநராக இருந்துள்ளார். அப்பொழுது மத்தியில் இருந்த அரசு பர்னாலாவை நெருக்கி கருணாநிதி அரசுக்கு எதிரான அறிக்கைகளைக் கொடுக்கச் சொன்னது. அதை ஏற்காத பர்னாலா பதவி விலகினார். திமுக தலைவர் கருணாநிதிக்கும், சுர்ஜித் சிங் பர்னாலாவுக்கும் பலத்த நட்பு உள்ளது. எமர்ஜென்சியின் போது பஞ்சாப் தலைவர் சுர்ஜித் சிங் பர்னாலா பிற தலைவர்களைப் போலவே சிறையில் அடைக்கப்பட்டிருந்தார். அப்பொழுது சில காலம் அவர் கோவை சிறையில் அடைக்கப்பட்டிருந்தார் என்று நினைக்கிறேன். அப்பொழுதே பர்னாலாவுக்கும், திமுக தலைவர்களுக்கும் நல்ல பழக்கம். சுர்ஜித் சிங் பர்னாலாவின் வாழ்க்கைக் கதை (ஆங்கிலத்தில் Quest for Freedom - A Story of Escape) தமிழிலும் ("விடுதலையைத் தேடி - நான் தப்பித்த கதை") மொழிபெயர்க்கப்பட்டுள்ளது.

பர்னாலாவே ஷிரோமணி அகாலி தள் கட்சியின் தலைவராக, பஞ்சாபின் முதல்வராக இருந்தவர். அப்பொழுது மத்தியில் காங்கிரஸ்தான் ஆட்சியில் இருந்தது. எனவே மத்திய-மாநில உறவுகளில் அசிங்கங்கள் அவருக்கு நன்றாகவே தெரியும். அதனால், பர்னாலா ஜெயலலிதா அரசுக்கு வேண்டுமென்றே நெருக்கடியைத் தருவார் என்று ஜெயலலிதா நினைக்கக் கூடாது.

சமாச்சார்.காம் - அரசின் குறுகிய பார்வை

இந்த வாரம் சமாச்சார்.காம் கட்டுரையில் இந்திய அரசின் இணையம், அகலப்பாட்டை பற்றிய குறுகிய நோக்கம் பற்றி. யூனிகோடில் இங்கே.