ஜமின் கொரட்டூர் - நாட்டு நலப்பணித் திட்டம்

ஜூன் 2012-ல் கிண்டி பொறியியல் கல்லூரியின் யூனிட்-11-ஐச் சேர்ந்த நாட்டு நலப்பணித் திட்ட மாணவர்கள் ஜமின் கொரட்டூர் என்ற சிற்றூரில் தங்கள் முகாமை நடத்தினர். நாட்டு நலப்பணித் திட்டம் இந்தியாவின் அனைத்துக் கல்வி நிலையங்களிலும் நடக்கும் ஒன்றுதான். ஒவ்வோர் ஆண்டும் அவர்கள் ஒரு முகாம் நடத்தவேண்டும். இப்படியாக நாட்டில் பல பத்தாயிரம் என்.எஸ்.எஸ் முகாம்கள் நடந்துகொண்டுதான் இருக்கின்றன.

மேலே சொல்லப்பட்ட ஜமின் கொரட்டூர் முகாமை சற்று வித்தியாசமாக நடத்தவேண்டும் என்று அந்த யூனிட்டின் மாணவர்கள் விரும்பினர். நான் அவர்களுடன் இணைந்துகொண்டேன். மதுரை சமூக அறிவியல் கழகத்தில் பேராசிரியராக இருந்து ஓய்வுபெற்ற திரு. ரெங்கசாமியின் உதவியை நாடிப் பெற்றோம்.

பொதுவான முகாமில் நடக்கும் செயல்களுடன், அந்த கிராமத்தை ஆவணப்படுத்தினால் என்ன என்று யோசித்தோம். ரெங்கசாமி மாணவர்களுக்கு வழிகாட்டினார். பங்கேற்பு முறைமூலம் கிராம மக்களுடன் உரையாடுவது எப்படி, அவர்களிடமிருந்து தகவல்களைப் பெறுவது எப்படி என்று முகாமிலேயே சொல்லிக்கொடுத்தார். ஏழு நாள்கள் அங்கே தங்கியிருந்த மாணவர்கள், ஜமின் கொரட்டூரின் சமூக வரைபடம், வாழ்வாதாரப் பட்டியல், கல்வி, சுகாதாரம், வழிபாட்டுத் தலங்கள், பெரும் பிரச்னைகள் என்று பலவற்றைப் பற்றியும் குறிப்புகள் எடுத்தனர். பல படங்களைப் பிடித்தனர்.

தினம் தினம் இரவு வெகுநேரம் வரை அவர்களுடன் உரையாடிவிட்டே நானும் ரெங்கசாமியும் சென்னை திரும்புவோம். மாணவர்கள் அதிகம் பேசுகிற ரகம் இல்லை. அதாவது கூட்டமாக இருக்கும்போது வாயைத் திறக்கமாட்டார்கள். தனித்தனியாக அல்லது ஓரிருவர் உள்ள குழுக்களாக இருக்கும்போது பேசுவதில் அவர்களுக்குத் தயக்கம் இருப்பதில்லை.

ஆவணப்படுத்தப்பட்ட தகவல்களைக் கொண்டு ஒரு சிறு நூல் ஒன்றைத் தயாரிக்கவேண்டும் என்பது எங்கள் திட்டமாக இருந்தது. மாணவர்கள் இணைந்து எழுதிக் கொடுத்ததை ரெங்கசாமியும் நானும் எடிட் செய்து ஓர் ஆவணத்தைத் தயார் செய்தோம். கடந்த சில மாதங்களுக்குமுன்பாகவே இந்த ஆவணம் முடிந்துவிட்டது என்றாலும் ஏதோ திருப்தி இல்லாமலேயே இருந்தது எனக்கு. ஆனால் நேரம் கடந்துகொண்டே இருந்தது. எனவே, போதும் என்று முடிவு செய்து சில பிரதிகளை மட்டும் அச்சாக்கி எடுத்துக்கொண்டேன்.

நேற்று மாலை அண்ணா பல்கலையில் இந்தப் புத்தகத்தை வெளியிட்டோம். இது விற்பனைக்கான புத்தகம் அல்ல. தனிச்சுற்றுக்கு மட்டுமே. இலவசமாக பிடிஎஃப் கோப்பை வெளியிடப்போகிறோம். இப்போது ஆவணம் தமிழில் உள்ளது. அடுத்து ஆங்கிலத்திலும் இதனைச் செய்ய உள்ளோம். புத்தக வெளியீட்டின்போது அண்ணா பல்கலையின்கீழ் உள்ள அனைத்து என்.எஸ்.எஸ் குழுக்களின் ஒருங்கிணைப்பாளர் முனைவர் பால்ராஜ், கிண்டி பொறியியல் கல்லூரியின் இளைஞர் செஞ்சிலுவை அமைப்பின் ஒருங்கிணைப்பாளர் முனைவர் குமார், என்.எஸ்.எஸ் யூனிட் 11-ன் பொறுப்பாளர் திரு. சண்முகம், யூனிட் 3-ன் பொறுப்பாளர் திரு. பாலமுருகன் ஆகியோர் இருந்தனர்.

சண்முகம், பாலமுருகன், பால்ராஜ், பத்ரி, குமார்

நிகழ்ச்சியின்போது மாணவர்கள் சரவணன், புவனேஷ்வர், காவ்யா, செந்தில் ஆகியோர் பேசினர். இவர்களில் சரவணன் மேடையில் பேசிப் பழகியவர். ஆனால் எனக்கு மிக மிக மகிழ்ச்சியைக் கொடுத்தது பிற மாணவர்கள் சரளமாக, பயமின்றி, தெளிவாகப் பேசியது.

காவ்யா, சரவணன், சதீஷ், புவனேஷ்

என் நோக்கம் இதுதான். வரும் ஆண்டுகளில் மேலும் பல என்.எஸ்.எஸ் அமைப்புகள் இதுபோன்ற திட்டத்தில் ஈடுபட்டால் தமிழகத்தின் பல்வேறு கிராமங்களை முறையாக ஆவணப்படுத்த முடியும். அடுத்து, கிராமங்களின் பிரச்னைகளைத் தெளிவாக எடுத்து முன்வைத்தால், அவற்றுக்கான தீர்வுகளைப் பலராலும் கொடுக்க முடியும். இது கல்வியில், சுகாதாரத்தில், அடிப்படைக் கட்டுமானத்தில், வாழ்வாதாரத்தில் என்று பலதரப்பட்ட துறைகளில் இருக்கும். இவை அனைத்திலும் மாணவர்களே பெரும் பங்காற்ற முடியும்.

அடுத்த மாதமும் பல முகாம்கள் நடக்க உள்ளன. அவைமூலம் மேலும் பல கிராமங்களை ஆவணப்படுத்த முயற்சி செய்வோம்.