Tuesday, January 06, 2009

நான் எடிட் செய்த புத்தகம் - 3: ஒபாமா

ஒபாமா, பராக்!

ஒபாமா எழுதி வெளியான Dreams From My Father நிஜமாகவே ஒரு சுவாரசியமான புத்தகம். அதன் தமிழாக்கத்தைக் கொண்டுவரும் முயற்சியில் உள்ளோம்.

ஒபாமா பற்றி நான் முதலில் கவனிக்க ஆரம்பித்தது, அவர் கென்யாவுக்கு இரண்டு-மூன்று ஆண்டுகளுக்கு முன் சென்றபோதுதான். அப்போது அவர் டெமாக்ரடிக் பிரைமரியில் நிற்பது பற்றிக்கூட யோசித்திருக்கவில்லை.

நான் அப்போது மைக்ரோகிரெடிட் சம்பந்தமாக எங்கு எந்தச் செய்தி கிடைத்தாலும் அதைப் படித்துவந்தேன். சிகாகோ செய்தித்தாள்கள் சில, “செனட்டர் ஒபாமா, கென்யாவின் குறுங்கடன் குழு ஒன்றைச் சந்தித்தார்” என்ற ரீதியில் செய்திகளை வெளியிட்டுவந்தனர். யார் இந்த ஒபாமா? ஏன் ஒரு அமெரிக்க செனட்டர் ஆப்பிரிக்க நாடு ஒன்றின் குறுங்கடன் வாடிக்கையாளர்களைச் சந்திக்கவேண்டும். யார் இவர் என்று தோண்டித் துருவிப் பார்க்க ஆரம்பித்தேன்.

ஒபாமாவின் பின்னணி சுவாரசியத்தைத் தந்தது. ஆனாலும், இவர் டெமாக்ரடிக் பிரைமரியில் நிற்பேன் என்று சொன்னதும் நம்பமுடியவில்லை. இதுபோன்ற ஓர் ஆசாமியால், வெள்ளை நிறமல்லாதவரால், அமெரிக்கத் தேர்தலில் ஜெயிக்கமுடியுமா? ஏன் வெற்றுச் சவடால் என்று நினைத்தேன்.

ஆனால் நாளாக நாளாக, அவர் தனது தேர்தல் கேம்பெயினை வழிநடத்திய விதம் பிரமிக்கவைத்தது.

ஒபாமா பற்றி ஒரு புத்தகம் கொண்டுவந்தாக வேண்டும் என்ற எண்ணம் அப்போதே ஏற்பட்டது. எப்போது கொண்டுவருவது என்பதுதான் கேள்வி. தேர்தலுக்கு முன்னா, அல்லது தேர்தல் முடிந்து ஜெயித்தபிறகா? ஜெயிப்பாரா? பிரைமரியில் ஹிலரியைத் தோற்கடித்து நாமினேஷனைப் பெற்றதுமே, இவர் எழுதப்படவேண்டியவர் என்ற தீர்மானம் வலுப்பெற்றது. ஆனால் தேர்தலும் முடிந்ததும் எழுதினால் சிறப்பாக இருக்கும்; அதற்கு ஏற்றவாறு அறிமுக அத்தியாயத்தை மாற்றிக்கொள்ளலாம் என்று முடிவெடுத்தோம்.

இதற்குள்ளாக சந்தைக்கு இரண்டு புத்தகங்கள் வந்துவிட்டன. ஒன்று ஆழி பதிப்பகம் கொண்டுவந்தது. மற்றொன்று வைகோ எழுதி, விகடன் வெளியீடாக வந்தது. “ஏன் நீங்கள் கொண்டுவரவில்லை” என்று பலர் கேட்டனர். விரைவில் கொண்டுவந்துவிடுவோம் என்றுதான் சொல்லமுடிந்தது.

அவசரமாக எழுதி முடிக்கவேண்டும்; அதே சமயம் நன்றாகவும் இருக்கவேண்டும் என்பது கஷ்டமான வேலைதான். புத்தகம் எழுதுவதற்கு முன்னதாகவே முத்துக்குமாரிடம் ஒவ்வோர் அத்தியாயத்தைப் பற்றியும் விளக்கமாகப் பேசினேன். ராகவன் தனது கருத்துகளைப் பகிர்ந்துகொண்டார். ஒபாமா வெற்றி நிச்சயமானதற்கு அடுத்த பத்து நாள்களுக்குள் முத்துக்குமார் எழுதிமுடித்துவிட்டார்.

அடுத்து எடிட் செய்ய காலம் பிடித்தது. நிறைய மாற்றங்கள் தேவையாக இருந்தன. பேக்கிரவுண்ட் தகவல்கள் நிறையச் சேர்க்கவேண்டியிருந்தது. அமெரிக்கத் தேர்தல் பற்றி அறிமுகம் நிறைய வேண்டியிருந்தது. காபிரைட் உள்ள படங்களை வாங்கி அவற்றைப் புத்தகத்துக்கு நடுவில் வண்ணப்படங்களாகக் கொண்டுவரலாம் என்று முடிவு செய்தோம். அதற்கு நேரம் பிடித்தது. புத்தகத்தை மதுரை புத்தகக் கண்காட்சியில் கொண்டுவருவது என்ற டெட்லைன் வைத்துக்கொண்டு வேலை செய்தோம். கொண்டுவர முடிந்தது.

ஒபாமாவின் வெற்றி மக்களிடையே பெரும் எதிர்பார்ப்பை ஏற்படுத்தியுள்ளது. அமெரிக்கர்கள் அவரிடம் நிறைய எதிர்பார்க்கிறார்கள். உலக மக்களும்தான்.

ஒபாமா பற்றி மேலும் சிறந்த ஒரு புத்தகம் தேவை. கிழக்கின் இந்தப் புத்தகம் ஒருவிதத்தில் மேலோட்டமானதே. இந்த ஆண்டு, முத்துக்குமாரே இதன் இரண்டாம் எடிஷனை எழுதுவார். ஒருவேளை அடுத்த புத்தகக் கண்காட்சியின்போது அதனைக் கொண்டுவருவது பொருத்தமாக இருக்கலாம். ஓராண்டு ஆட்சியில் ஒபாமா என்ன செய்தார்; அமெரிக்கர்கள் பொருளாதாரச் சுணக்கத்தை எப்படி எதிர்கொண்டார்கள் ஆகியவற்றையும் அதில் கொண்டுவரலாம்.

1 comment:

  1. Did you read the novel "The Appeal" by John Grisham? It shows how certain elements plant their own judge, by carefully selecting a candidate, influencing voters etc. Very methodologically explained. Just use as an analogy and think. Why couldn't have some DNC elements, resorted to a reasonable known orator to run for Presidency, such as to distract certain people (may be Hillary) becoming President?

    ReplyDelete