Monday, December 22, 2003

நியூஸ்மான்ஸ்டர்

நியூஸ்மான்ஸ்டர் என்னும் ஒரு செயலி பல்வேறு RSS தரவில் கொடுக்கப்படும் செய்தித் துகள்களை ஒருங்கிணைத்து மொசில்லா உலாவியில் படிப்பதற்கு வசதியாகச் செய்கிறது.

பல்வேறு செய்தி இணைய தளங்கள் தங்கள் ஆர்.எஸ்.எஸ் செய்தியோடைகளைத் தர ஆரம்பித்துள்ளனர். பி.பி.சி, சிநெட், சி.என்.என், யாஹூ!, இந்தியன் எக்ஸ்பிரஸ் ஆகிய பல செய்தியூற்றுகளின் ஆர்.எஸ்.எஸ் ஓடைகள் மூலமாகத்தான் நான் அவைகளை இப்பொழுது பின்தொடருகிறேன்.

அதே நேரத்தில் ஆங்கில, மற்றும் தமிழ் வலைப்பதிவுகளும் இந்த முறையைப் பின்பற்ற ஆரம்பித்து விட்டன. என்னுடைய வலைப்பதிவிற்கும் இந்த ஆர்.எஸ்.எஸ் ஓடை வசதியினைச் செய்துள்ளேன். இவைகளின் மூலம் புதிதாக ஒரு தளம் எப்பொழுதெல்லாம் இற்றைப்படுத்தப் படுகிறதோ, அந்த மாறுதல்கள் நம்மை வந்தடைகின்றன.

நீங்களே பயன்படுத்திப் பாருங்களேன்?

எம்.ஜே.கோபாலன் மறைவு

எம்.ஜே.கோபாலன், இந்தியாவிற்காக கிரிக்கெட் மற்றும் ஹாக்கி இரண்டிலும் விளையாடியவர். நேற்று சென்னையில் காலமானார். நேற்றைய தேதிவரை சர்வதேச கிரிக்கெட் விளையாடியவர்களிலேயே அதிக வயதானவராக இருந்தவர். விளையாடியதென்னவோ ஒரு டெஸ்டு போட்டிதான். அதிலும் எடுத்தது ஒரு விக்கெட்டுதான். சென்னையின் ரஞ்சிக் கோப்பை அணிக்கு அணித்தலைவராகப் பல வருடங்கள் இருந்திருக்கிறார்.

மொழித்தூய்மை, தனித்தமிழ் பற்றி பாரதியார்

[முன்னுரை: நாகூர் ரூமி தமிழோவியத்தில் 'தமிழ்ப்படுத்துதலும் தமிழ் மனமும்' என்று ஒரு கட்டுரை எழுதியிருந்தார். வெங்கட் தன் வலைக்குறிப்பில் மேற்கண்ட கட்டுரையை விமரிசித்து எழுதியது இங்கே: ஒன்று | இரண்டு. இதுபற்றிய காசியின் கருத்துகள். வெங்கட் கருத்தைப் படித்து நாகூர் ரூமி எழுதியது இங்கே.]

பாரதியார் 'தென்ஆப்பிரிக்காவில் பெண்கள் விடுதலை' என்ற செய்தியை 'காமன்வீல்' என்னும் ஆங்கில இதழிலிருந்து மொழியாக்கம் செய்து கட்டுரையாக்கும் போது இப்படி எழுதியுள்ளார்.
"நடுவிலே ஒரு ரசமான வார்த்தை. "மெம்பர்" என்பதற்குச் சரியான தமிழ்ச் சொல் எனக்கு அகப்படவில்லை. இது ஆச்சரியத்திலும் ஆச்சர்யம். "அவயவி" சரியான வார்த்தையில்லை. "அங்கத்தான்" சரிகட்டி வராது. "சபிகன்" சரியான பதந்தான். ஆனால் பொதுஜனங்களுக்குத் தெரியாது. யாரேனும் பண்டிதர்கள் நல்ல பதங்கள் கண்டுபிடித்துக் கொடுத்தால் புண்ணியமுண்டு. அரைமணி நேரம் யோசித்துப் பார்த்தேன். உறுப்பாளி! ஏதெல்லாமோ நினைத்தேன். ஒன்றும் மனத்திற்குப் பொருந்தவில்லை. என்ன செய்வேன்! கடைசியாக "மெம்பர்" என்று எழுதி விட்டேன். இன்னும் ஆரஅமர யோசித்துச் சரியான பதங்கள் கண்டுபிடித்து மற்றொரு முறை சொல்லுகிறேன்."
இதழாளர் பாரதி, பா.இறையரசன், நியூ செஞ்சுரி புக் ஹவுஸ், 1995, விலை ரூ. 60. பக் 94-95

இந்தப் புத்தகத்திலேயே, இன்னும் பல அறிவுரைகள் பாரதியாரிடமிருந்து வருகின்றன.
"கூடியவரை பேசுவது போலவே எழுதுவதுதான் உத்தமமென்பது என்னுடைய கட்சி. எந்த விஷயம் எழுதினாலும் சரி, ஒரு கதை அல்லது ஒரு தர்க்கம், ஒரு சாஸ்திரம், ஒரு பத்திரிகை விஷயம், எதை எழுதினாலும் வார்த்தை சொல்லுகிற மாதிரியாகவே அமைந்துவிட்டால் நல்லது."

"நீ எழுதப்படுகிற விஷயத்தை இங்கிலீஷ் தெரியாத ஒரு தமிழனிடம் வாயினால் சொல்லிக்காட்டு. அவனுக்கு நன்றாக அர்த்தம் விளங்குகிறதா என்று பார்த்துக் கொண்டு பிறகு எழுது. அப்போதுதான் நீ எழுதுகிற எழுத்து தமிழ்நாட்டிற்குப் பயன்படும்."
கலைச்சொல்லாக்கம் பற்றி எழுதும் போது இப்படிச் சொல்கிறார்:
"இயன்ற இடத்திலெல்லாம் பதார்த்தங்களுக்குத் தமிழ்ப் பெயர்களையே உபயோகப்படுத்த வேண்டும். திருஷ்டாந்தமாக "ஆக்ஸிஜன்; ஹைட்ரஜன்" முதலிய பதார்த்தங்களுக்கு ஏற்கனவே தமிழ்நாட்டில் வழங்கப்பட்டிருக்கும் பிராணவாயு, ஜலவாயு என்ற நாமங்களையே வழங்க வேண்டும். தமிழ்ச் சொற்கள் அகப்படாவிட்டால் சமஸ்கிருத பதங்களை வழங்கலாம். பதார்த்தங்களுக்கு மட்டுமேயன்றிக் கிரியைகளுக்கும் அவஸ்தைகளுக்கும் (நிலைமைகளுக்கும்) தமிழ் சமஸ்கிருத மொழிகளையே வழங்குதல் பொருந்தும். இந்த இரண்டு பாஷைகளிலும் பெயர்கள் அகப்படாத இடத்தில் இங்கிலீஷ் பதங்களையே உபயோகப்படுத்தலாம். ஆனால் குணங்கள், செயல்கள், நிலைமைகள் - இவற்றுக்கு இங்கிலீஷ் பதங்களை ஒருபோதும் வழங்கக் கூடாது."
இந்தப் புத்தகத்தைப் படிக்கும் போது எனக்குத் தோன்றுவது இவைதான்:

1. பாரதிக்கு தமிழில் ஆங்கில மொழிக்கலப்பு பிடிக்கவில்லை. ஆனாலும் அவசரமாக மொழிமாற்றித் தன் இதழில் பதிப்பிக்க நேரமில்லாமல் போனதனால் ஆங்கிலச் சொல்லைப் பயன்படுத்துகிறார். அதைப் பற்றி மருகி, மருகி ஒரு பத்தி எழுதவும் செய்கிறார். கிட்டத்தட்ட இன்று புழங்கும் ஒரு சொல்லுக்கு வெகு அருகிலே வந்திருக்கிறார். மெம்பர் = உறுப்பினர்

2. ஆனால் தன் உரைநடையில் "எளிதான" வடமொழிச் சொற்களைச் செருகுவதில் சிறிதும் கவலைப்பட்டாரில்லை. ஒருவேளை அவர் புழங்கிய வடமொழிச் சொற்கள் படிக்கக் கூடிய அனைவருக்கும் தெரிந்திருக்கலாம் என்று நினைத்திருப்பாரோ என்னவோ?

3. வடமொழிச் சொற்களைப் புழங்கும் போது கிரந்த எழுத்துக்களைப் பயன்படுத்துகிறார். அது தமிழ் மொழி இலக்கணத்துக்கு மாறாக இருக்கும் போதும் கூட. சொல்லின் முதலெழுத்து ஒற்றெழுத்தாகப் பலவிடங்களில் வருகிறது. (ப்ரிய, ஸ்வராஜ்யம்)

4. ஆங்கிலச் சொற்களை மொழிமாற்றுகையில் பலவிடங்களில் அவருக்கு முதலில் கைக்கு வருவது வடமொழிச் சொல்தான். நகரசபை, ஜனசபை, மசோதா (இந்தச்சொல் இன்றும் கூடப் புழக்கத்தில் உள்ளது), பிராணவாயு, ஜலவாயு!

வடமொழியைப் பலவிடங்களில் அள்ளித் தூவுவதற்கு அன்றைக்கு இணையான தமிழ்ச் சொற்கள் புழக்கத்தில் இல்லாமையும், 'மக்களுக்குப் புரிய வேண்டும், போய்ச்சேர வேண்டும்' என்ற முக்கியக் குறிக்கோளும் சேர்ந்த சமரசமே என்று தோன்றுகிறது. இன்னும் சிலவருடங்கள் உயிருடன் இருந்திருந்தால் தமிழ் உரைநடையில் வடமொழிச் சொற்களைத் தவிர்த்து, அதே நேரத்தில் கொச்சையையும் தவிர்த்து, எளிதில் புரியக்கூடிய வெகுமக்கள் மொழியாக, ஒரு நடையை உருவாக்கியிருப்பார்.

அதுதான் நமது குறிக்கோளாகவும் இருக்க வேண்டும்.

கொடுந்தமிழ், தனித்தமிழ் என்று பண்டிதத்தமிழாக இருக்கக் கூடாது. ஆங்கிலக் கலப்பு கூடாது. வடமொழிக் கலப்பையோ, பிறமொழிக் கலப்பையோ முடிந்தவரை தவிர்க்க வேண்டும். அதே நேரத்தில் எளிமையாகவும், படிப்பவர்களைப் போய்ச் சேரும் வகையிலும் அமைந்திருக்க வேண்டும்.

Sunday, December 21, 2003

சிதம்பரம்: தேவை இரு வலுவான கட்சிகள்

ப.சிதம்பரம் - அரசியல் தலைவலி!
கல்கி 21/12/2003 இதழ், ப.சிதம்பரத்தின் 'நமக்கே உரிமையாம்' - 9

* பொருளாதார வளர்ச்சியில் முன்னணியில் இருக்கும் அனைத்து நாடுகளிலும் இரண்டு வலுவான கட்சிகள் உள்ளன. மூன்றாம், நான்காம் கட்சிகளுக்கு இடமிருக்கக் கூடாது என்பதில்லை, ஆனால் இரண்டு வலுவான கட்சிகள் இருக்க வேண்டும், மற்றவைகள் சிறியதாக இருத்தல் நலம் என்கிறார்.

* இந்தியாவில் அந்த இரண்டு வலுவான கட்சிகள் காங்கிரஸ், பாஜக ஆக நிகழ்ந்துள்லது என்பதை மகிழ்ச்சியுடன் குறிக்கிறார். அதே சமயம், இந்த இரண்டு கட்சிகளும் தாராளகுணத்தை (liberal என்பதற்கு தாராளகுணம் என்னும் சொல்லைக் கையாளுகிறார்) அதிகமாக்கிக் கொள்ள வேண்டுமென்கிறார். காங்கிரஸ் ஜனநாயக முறையில் கட்சித் தலைவர்களைத் தேர்ந்தெடுக்க வேண்டும், பாஜக மதம், மொழி என்னும் கூண்டுக்குள் அடைபட்டுவிடக் கூடாது என்கிறார். இப்படி அமைந்தால் இந்திய அரசுகளின் தன்மையும், தரமும், செயல்பாடும், வேகமும் பிரமிக்கத் தக்க மாற்றத்தை அடைந்துவிடும் என்பது சிதம்பரத்தின் கருத்து.

* இதைப் போலவே மாநிலத்திலும் இரண்டு பெரிய கட்சிகள் இருந்தால் போதும் என்கிறார். மூன்று முக்கிய கட்சிகள் இருப்பதுதான் தமிநாட்டுக்குப் பெரிய தலைவலி என்கிறார். (மூன்றாவது முக்கிய கட்சி என்று இவர் குறிப்பிடுவது காங்கிரஸையா? :-) உத்திரப் பிரதேசத்தில் நான்கு முக்கியக் கட்சிகள் இருப்பது இந்னமும் குழப்பத்தை விளைவிக்கிறது என்கிறார்.

* பலமுறை மேடைகளில் பேசியதை மீண்டும் இங்கு சொல்கிறார்: ஆளும் கட்சி கிரியா சக்தி, எதிர்க்கட்சி இச்சா சக்தி. ஒரு சில நாடுகளில் இருக்கும் சுற்றுச்சூழல் பாதுகாப்பை முக்கியக் கொள்கையாக வைத்திருக்கும் 'பச்சை கட்சிகள்', ஞான சக்தியாம்.

என் கருத்து:

1. இரண்டு வலுவான கட்சிகள் மத்தியிலும், மாநிலங்களிலும் இருப்பது வரவேற்கத் தக்கது. இதனால் அரசாளும் கட்சிக்கு ஒரு ஸ்திரத்தன்மை இருக்கும். ஆனால் தமிழகம் போன்றவிடங்களில் உருவான மாநிலக் கட்சிகள் மிகவும் முக்கியமானவை. இவைதான் ஐக்கிய இந்தியாவில் மாநிலங்களுக்குத் தன்னாட்சி அதிகாரத்தை (federal structure) அதிகமாக்கக் காரணமாயிருந்தன. இப்பொழுதும் தமிழகத்தில் கழகங்கள், ஆந்திராவில் தெலுகு தேசம், பஞ்சாபில் அகாலி தளம், அஸ்ஸாமில், பீஹாரில், மஹாராஷ்டிரத்தில் என்று பல மாநிலங்களில் உள்ள மாநிலக் கட்சிகள் இல்லாவிட்டால் இந்தியா போன்ற பல்வேறு மொழிகளை உள்ளடக்கிய நாட்டில் தேசியக் கட்சிகள் பொறுப்பில்லாமல், ஹிந்தித்துவமாக செயல்படத் தொடங்கி விடும். நேற்றுகூட பிரதமர் வாஜ்பாயி ஹிந்திதான் தேச ஒருமைப்பாட்டின் சின்னம் என்று முழங்கியிருக்கிறார். ஏன் இன்னமும் இந்தியாவில் உள்ள அத்தனை பேரும் ஆங்கிலத்தைக் கட்டிக் கொண்டு அழுகிறார்கள், ஹிந்தியை அள்ளி வாரி அனைத்து நெஞ்சோடு சேர்த்துக் கொள்ளவில்லை என்று வருத்தப்படுகிறார். 1960களில் தமிழகத்தில் நடந்த ஹிந்தி எதிர்ப்புப் போராட்டம் மாதிரி எதிர்ப்பு இப்பொழுதெல்லாம் இல்லை என்று மகிழ்கிறார்.

இந்த ஹிந்தியை முன்வைக்கும் எண்ணம் மாறினால்தான் இரண்டு தேசியக் கட்சிகளோடு நாம் மகிழ்ச்சியாக இருக்க முடியும்.

இந்தியா போன்ற நாட்டுக்கு வலுவான மாநிலக் கட்சிகள் அவசியம் தேவை. அவை இருந்தால்தான் தேசியக் கட்சிகள் வாலாட்டாமல் ஒழுங்காக இருக்கும்.

2. தமிழகத்தில் உள்ள நிலைமை சற்றே குழப்பமானது. இங்கு இரண்டு வலுவான கழகங்கள் இருப்பது; காங்கிரஸ், பாஜக என்னும் இரண்டு தேசியக் கட்சிகளும் வலுவற்று இருப்பது - இவ்விரண்டுமே குழப்பத்தை அதிகரிக்கிறது. இந்தக் கட்சிகளில் ஏதேனும் ஒன்று வலுவிழந்து காணாமல் போவதும், காங்கிரஸ் போன்ற ஒரு தேசியக் கட்சி வலுவடைவதும் மிக நல்லது. ஆனால் இது நடப்பதற்கு இன்னமும் பத்து வருடங்களுக்கு மேல் பிடிக்கும். காங்கிரஸில் உள்ள உட்கட்சிப் பூசல் கொடுமையானது. அந்த நிலை மாறினால்தான் அந்தக் கட்சி வலுவடையத் தொடங்கும்.

உத்திரப் பிரதேச நிலைமையும் குழப்பம் நிறைந்ததுதான். இந்தக் குழப்பம் தீரவும் இன்னுமொரு பத்து ஆண்டுகள் பிடிக்கும் என்று தோன்றுகிறது. அங்கு வலுவான பாஜகவும், முலாயம் சிங்கின் கட்சியும், வலு மிகக் குறைந்த காங்கிரஸும் ஆக மூன்று கட்சிகள் வரும் என்று தோன்றுகிறது. முலாயம் சிங், மாயாவதி இருவரும் தங்கள் கட்சிகளை இணைப்பது நலம், ஆனால் செய்ய மாட்டார்கள்.


கல்கி 7/12/2003 இதழ், ப.சிதம்பரத்தின் 'நமக்கே உரிமையாம்' - 7

சத்யேந்திர துபே மட்டுமல்ல, பிற பலரும்...

ஹிந்துஸ்தான் டைம்ஸ், துபே கொலை பற்றி மேலும் திடுக்கிடும் தகவல்களைச் சொல்கிறது. துபேவைப் போல் உத்திரப் பிரதேசத்தில் குறைந்தது இன்னமும் ஆறு பொதுப்பணித் துறையில் வேலை செய்த பொறியாளர்கள் கொலை செய்யப்பட்டுளனராம்.

துபே கொலை பற்றிய மத்திய அரசின் விளம்பரத்தகவல் | பீஹார் அரசின் விளம்பரத்தகவல்

சங்கம்: மாலன், சிவ.கணேசனோடு சந்திப்பு

'கவிமணியும் கலைவாணரும்' என்னும் புத்தகத்தின் ஆசிரியர் சிவ.கணேசன், கவிமணி தேசிக விநாயகம் பிள்ளையின் பேரன். இவருடன் மாலன் சன் நியூஸ் சங்கம் நிகழ்ச்சியில் உரையாடினார். வழக்க்கம் போலவே கிரிக்கெட் பார்ப்பதிலும், மற்றதிலும் நேரத்தைச் செலவிட வேண்டியிருந்தது. அங்கங்கே பார்த்ததிலிருந்து குறிப்புகள்.

* பலர் தவறாக தேசிய விநாயகம் பிள்ளை என்று இவரது பெயரைக் குறிப்பிடுகின்றனர். 'தேசிக விநாயகம்' என்பது விநாயகப் பெருமானின் ஒரு பெயர். இவரது பாட்டனாருக்கும் தேசிக விநாயகம் என்றுதான் பெயர். இவர்கள் குடும்பத்தில் ஒவ்வொரு தலைமுறையிலும் ஒரு ஆண்மகனுக்காவது தேசிக விநாயகம் என்று பெயர் இருக்குமாம்.

* புத்தக ஆசிரியருக்கும் தேசிக விநாயகம் என்றுதான் முதலில் பெயர் வைத்திருந்தனராம். ஆனால் இவருக்குப் படிப்பு அறிவு குறைவாக இருந்ததால், கிராமத்திலிருந்து நகரத்திற்குப் படிக்க அனுப்பும்போது, பெயரை மாற்றி சிவ.கணேசன் என்று வைத்துவிட்டாராம். அதற்காகத் தான் வருந்துவதாகச் சொன்னார்.

* ஒருமுறை போற்றிக்கண் என்பவர் கவிமணியிடம் பணம் வாங்கிக் கொண்டு கவிமணியில் குருவுக்கு உருத்திராட்சக் கொட்டை வாங்கப் போனவர், திரும்பி வரவேயில்லையாம். அப்பொழுது பக்கத்திலிருந்தவர் தூண்டுதலினால் அவன்மீது ஒரு பாட்டு எழுதி விட்டாராம். "நெஞ்செறிய, என் குருவின் வயரெறிய" காசை எடுத்துக் கொண்டு போன நீ "இனி இவ்வூரில் கால் வைக்காய்" என்ற அப்பாடல் இயற்றப்பட்ட சில நாட்களில் போற்றிக்கண் இறந்து விட்டாராம். இனியும் இதுபோன்ற பாடல்களை இயற்றப்போவதில்லை என்று அப்பொழுது முடிவு செய்தாராம் கவிமணி.

* உமர்கய்யாம், ஆசியஜோதி ஆகிய புத்தகங்களை தமிழில் மொழிபெயர்த்தவர், குழந்தைகளுக்கான பல பாடல்களையும் இயற்றியுள்ளார்.

* அதிகமாக யாருடனும் வெளியே வந்து பழக மாட்டார். ஆனால் இவரைப் பார்க்க எளியவரும் வருவர், ஆர்.கே.சண்முகம் செட்டியார், தி.க.சிதம்பரம் முதலியார், கல்கி கிருஷ்ணமூர்த்தி, இராஜாஜி, எம்.எஸ்.சுப்புலக்ஷ்மி ஆகியோர் வருவர்.

* இரங்கற்பா எழுதுவதில் வல்லவர். தி.க.சி மறைவுக்கு மிக அருமையான ஒரு பாடலை எழுதியிருந்தார்.

* கல்கி, அமுதசுரபி, விகடன் ஆகிய பத்திரிக்கைகளுக்கு எப்பொழுதும் எழுதிக் கொண்டிருப்பார். கல்கியில் இவரது அட்டைப்படம் போட்டே இதழ்கள் வந்திருக்கின்றன.

மாலன், நன்னனொடு சந்திப்பு

தலித் கிறித்துவர்கள் தனி ஒதுக்கீடு

நேற்று, மத்திய அமைச்சர் சத்யநாராயண் ஜாதீயா, தலைமைப் பதிவாளரது கூற்றுகள் சிலவற்றை முன்னிறுத்தி தலித் கிறித்துவர்களுக்கும், முஸ்லிம்களுக்கும் இட ஒதுக்கீடு கொடுக்க வேண்டியதில்லை என்று சொன்னதைப் பற்றி பதித்திருந்தேன். அப்பொழுது கிறித்துவ, முஸ்லிம் தலைவர்கள் இதனை எதிர்க்க வேண்டும் என்றும் (பெரும்பான்மையினரும் கூட இதனை எதிர்க்க வேண்டும்) சொல்லியிருந்தேன்.

அனைத்திந்தியக் கிறித்துவ மக்கள் மன்றச் செயலர் பிரிந்தாவன் மோசே நேற்று விடுத்துள்ள அறிக்கையில் தலித் கிறித்துவர்களுக்கு அட்டவணைப் பிரிவில் இந்து, சீக்கிய, புத்த தலித்துகளைப் போலவே இட ஒதுக்கீடு தர வேண்டும் என்று கேட்டுக் கொண்டுள்ளார். நான் நேற்று சொன்னது போலவே, கிறித்துவர்களுக்குடையில் ஏற்கனவேயே சாதிகள் ஆழமாகப் பதிந்துள்ளன, 60%க்கும் மேற்பட்ட கிறித்துவர்கள் தீண்டாமை போன்றவற்றை எதிர்த்து மதம் மாறிய தலித்துக்களே என்றும் குறிப்பிட்டுள்ளார். மேலும் அமைச்சர், தலைமைப் பதிவாளரது கூற்றை முன்வைத்து பாராளுமன்றத்தையும், இந்திய மக்களையும், பன்னாட்டு மக்களையும் தவறான வழியில் திசை திருப்பப் பார்க்கிறார் என்றும் குற்றம் சாட்டியுள்ளார்.

மீண்டும் நாம் வலியுறுத்த வேண்டியது - சாதிப்பிரிவினைகளைக் களைவது சுலபமல்ல. அது பல்லாயிரக் கணக்கான வருடங்கள் எடுத்துக் கொள்ளலாம். ஆனால் தீண்டாமை, மேல்-கீழ் சாதி வேறுபாடுகளைக் களையலாம். முதலாவது இந்து மதத்திற்குள் மட்டுமே இருப்பது. இரண்டாவது மதங்களைக் கடந்து இருப்பது. உயர்வு தாழ்வுகளைக் களைந்தவுடன், தானாகவே சாதிகள் கலக்கும். பெருநகர்ப் பகுதிகளில் இது ஏற்கனவே நடக்க ஆரம்பித்து விட்டது.

Saturday, December 20, 2003

திமுக வெளிப்படையாக மத்திய அரசிலிருந்து விலகல்

மாறன் இறந்தபின் சுயமாக சிந்தித்து கருணாநிதி எடுத்திருக்கும் முதல் முடிவு இது என்று தோன்றுகிறது. மத்திய அமைச்சரவையிலிருந்து திமுக வெளியேறும். இது வரும் மக்களவைத் தேர்தலை முன்வைத்து எடுக்கப்பட்ட முடிவு என்று தோன்றுகிறது.

இதனால் தமிழக அரசியலில் அதிகக் குழப்பமே ஏற்படும். யார் யாருடன் கூட்டணி வைத்துக் கொள்வது என்று புரியாமல் முழிப்பர் என்றே தோன்றுகிறது. வைகோ கருணாநிதியுடன் கூட்டு சேர்ந்து பாஜக உறவை வெட்டிக் கொள்வாரா? பாமக ராமதாஸ் என்ன செய்வார்? பாஜக, ஜெயலலிதாவோடு கூட்டணி அமைக்குமா? இல்லை, ஜெயுடன் கூட்டணி வைத்து பட்ட கஷ்டம் போதாதா, இதற்குத் தனியாகவே போய்விடலாம் (பாமக, மதிமுக மட்டும் ஒருவேளை கூட இருக்கலாம்) என்று தோன்றுமோ என்னவோ?

தமிழகக் காங்கிரஸ் இப்பொழுது திமுகவுடன் இணைய இது வழிவகுக்கும். தமிழகத்தில் பாஜக, காங்கிரஸ் இரண்டுக்கும் என்ன வித்தியாசம்? தனியாகப் போட்டியிட்டால் காங்கிரஸால் ஓரிடத்திலும் இப்பொழுது பாராளுமன்றத் தேர்தலில் ஜெயிக்க முடியாது. பாஜகவால் ஓரிரு இடங்களில் ஜெயிக்க முடியும் என்று தோன்றுகிறது. ஆனால் காங்கிரஸுக்கு தமிழகம் முழுவதையும் சேர்த்து பாஜகவை விட அதிக வாக்குகள் கிடைக்கும். எனவே பாஜகவை விட காங்கிரஸ் திமுகவுக்கு அதிக வாக்குகளைக் கொண்டுவரும். ஆனால் காங்கிரஸ் மத்தியில் ஜெயிக்க வாய்ப்பு குறைவு என்று தோன்றுகிறது. அப்படியே ஜெயித்தாலும், கூட்டணி அமைச்சரவை அமையுமா, அதில் திமுகவுக்கு ஏதேனும் இடம் கிடைக்குமா என்பதும் சந்தேகமே.

தலித் கிறித்துவ, முஸ்லிம்களுக்கு இட ஒதுக்கீடு கிடையாது

கடந்த வாரத்தில் ஏகப்பட்ட நிகழ்ச்சிகள்: போடா, கட்சித்தாவல் சட்டங்களில் சட்டத்திருத்தம், போடா மற்றும் ஊழல் வழக்குகளில் உச்ச நீதிமன்றத் தீர்ப்புகள், கிரிக்கெட்டில் இந்தியாவின் வெற்றி, செத்துப்போன சத்யேந்திர துபேவை இடையில் நிறுத்தி மத்திய அரசும், பீஹார் அரசும் செய்யும் அரசியல். இதற்கு நடுவில் அதிகம் பேசப்படாத, தி ஹிந்துவில் ஒரு மூலையில் கண்ட செய்தி, தலித் கிறித்துவர்களுக்கும், முஸ்லிம்களுக்கும் இட ஒதுக்கீடு வேண்டும் (தலித் இந்துக்களைப் போல) என்னும் கேள்விக்கு சமூகநீதி அமைச்சர் (எதுக்கெல்லாம் அமைச்சருங்க இருக்காங்க, பாருங்க!) சத்ய நாராயண் ஜாதீயா சொன்ன பதில்.

இந்தியாவின் தலைமைப் பதிவாளர் (Registrar General of India) இப்படிச் சொன்னாராம்:

"முஸ்லிம்களையும், இந்து சாதிகளுக்கு இணையாகப் பிரித்தால், தங்கள் மீது இந்துக்களின் பிற்போக்கான வழக்கத்தைப் புகுத்துவதாக முஸ்லிம்கள் அமைதியிழந்து கோபம் கொள்வர்."

"கிறித்துவர்களை சாதி அடிப்படையில் பிரித்துப் பதித்தால், பன்னாட்டளவில் இது பிரச்சினையில் முடியும். வெளிநாடுகளில், இந்தியா தனது சாதிப்பிரிவினையை கிறித்துவர்கள் மேல் திணிக்கிறது என்ற ஒரு கருத்தை இது தோற்றுவிக்கும்."

இதைக் காரணம் காட்டி அமைச்சர் முஸ்லிம், கிறித்துவர்களின் மனம் கோணாமலும், சர்வதேச அளவில் பிரச்சினை வராமலும் இருக்க, தலித்துகளாக இருந்து இந்து மதத்திலிருந்து இஸ்லாம், கிறித்துவ மதங்களுக்கு மாறியவர்களுக்கு இட ஒதுக்கீடு கொடுக்க வேண்டாம் என்று சொல்லியிருக்கிறார்.

இந்த விஷமத்தனமான கருத்து கண்டிக்கப்பட வேண்டியது.

1. முதலில் இந்தியாவைப் பொறுத்தவரையில் சாதியும், மதமும் தனித்தனி தளங்களில் இயங்கி வந்துள்ளன, வருகின்றன. தலித்துகளை இந்து மதத்திற்குள்ளேயே அடைத்து வைக்க என்றே இந்த இட ஒதுக்கீட்டினைப் பயன்படுத்துகின்றனர் அரசியல்வாதிகள். "அவமானத்தோடு சேர்ந்த இட ஒதுக்கீடு வேண்டுமா, இல்லை உன்னிஷ்டப்படி மதம் மாறிக்கொள், ஆனால் இட ஒதுக்கீடு கிடையாது" என்னும் உள்நோக்கம் மிகவும் வெளிப்படையாகத் தெரிகிறது.

2. பெருநகர் அல்லாதவிடங்களில் இந்திய முஸ்லிம்களும், கிறித்துவர்களும் தங்களுக்குள்ளே தாங்கள் எந்த சாதியிலிருந்து வந்திருக்கிறோம் என்பதில் தெளிவாகவே இருக்கிறார்கள். சாதிப் பிரிவினை வேறு, தீண்டாமை வேறு. இந்துக்களின் இடையில்தான் 'தீண்டாமை' தலை விரித்தாடுகிறது. ஒரு சில சாதியினரைத் தொடத்தகாதவர்கள், கோயிலுக்குள் புக அனுமதி இல்லாதவர்கள், நாலு வர்ணங்களுக்கும் அப்பாற்பட்டவர்கள், டீ குடிக்கத் தனிக்குவளை, கதிமோட்சம் இல்லாதவர்கள், ஆனாலும் இந்துவாகவே இருக்க வேண்டும் என்று மேல்சாதி இந்துக்கள் கருதுகின்றனர். கிறித்துவ, முஸ்லிம்கள் இடையே சாதி வித்தியாசம் இருந்தாலும், இந்த 'சர்ச்சுக்குள் நுழையாதே, தீட்டுப் படிந்து விட்டது', 'உனக்குத் தனி டீ டம்ளர், எனக்குத் தனி' என்பது இல்லை என்று தோன்றுகிறது.

இப்பொழுதைக்கு முக்கியமானது தீண்டாமையை ஒழிப்பது. அதன் பிறகு சாதிப் பிரிவினைகள் பற்றிப் பார்த்துக் கொள்ளலாம்.

3. இன்று பார்ப்பனர்களில் பொருளாதாரக் கீழ்நிலையில் இருப்பவர்களுக்கு இட ஒதுக்கீடு கொடுப்போம் என்று சொல்லும் அரசியல்வாதிகள் தலித்தாக இருந்து கிறித்துவனாகவோ, முஸ்லிமாகவோ மாறினால் இட ஒதுக்கீடு கிடையாது என்றால் அது பெரும் கேலிக்கூத்து.

இந்திய முஸ்லிம்களும், கிறித்துவர்களும் துண்டு துண்டாக இருக்கிறார்கள். இதுமாதிரி விஷமத்தனமான விவாதங்கள் பாராளுமன்றத்தில் நடக்கும்போது உடனடியாக அதனை எதிர்த்து, தங்கள் மதம் சாதிப்பிரிவினைகளை அங்கீகரிக்காவிட்டாலும், பரம்பரை பரம்பரையாக பொருளாதார, சமூகக் கீழ்நிலையில் இருப்பவர்கள் கிறித்துவ, இஸ்லாம் மதங்களைப் பின்பற்றினாலும் அவர்களுக்கு அரசு தரும் சலுகைகள் இந்து மதத்தினருக்கு ஒத்ததாக இருக்க வேண்டும் என்று வெளிப்படையாகச் சொல்ல வேண்டும்.

இதில் புத்த மதத்திற்கு மாறும் தலித்துகளுக்கு என்ன சலுகைகள் கிடைக்கும் என்று தெரியவில்லை. இந்து தலித்துகளுக்குக் கிடைக்கும் அதே சலுகைகள் புத்த மதத்திற்கு மாறிய தலித்துகளுக்கும் கிடைக்குமா? இல்லை இந்தியத் தலைமைப் பதிவாளர், இலங்கையில் உள்ள புத்த குருமார்கள் கோபித்துக் கொள்வார்கள் என்று புருடா விடுவாரா?

Friday, December 19, 2003

பல்லூடகக் கணினி எத்தனை மலிவு?

இதைப்பற்றி நான் முன்னமே எழுதியுள்ளேன். என் நான்கு வயது மகள் பிரியா வீட்டிலிருக்கும் கணினியைப் பயன்படுத்த ஆரம்பித்ததிலிருந்து வீட்டில் தகராறுதான். பிரியா விரும்புவது லயன் கிங், டாய் ஸ்டோரி, பக்ஸ், சிண்டிரெல்லா, ஜங்கிள் புக் போன்ற அருமையான படங்களைப் பார்ப்பது, பூவா & க்வாலா தளம் சென்று அங்கு விளையாடுவது, மென்தட்டு மூலம் விளையாட்டுகள் விளையாடுவது, மழலையர் பாடல்கள் கேட்பது ஆகியன. இதற்காகவென்று எத்தனை பணம் செலவழிக்க முடியும்?

வயா சைரிக்ஸ் பற்றிக் கேள்விப்பட்டதும், அதனை வைத்து ஒரு கணினியை சேர்த்தேன். வயா சைரிக்ஸ் சில்லு, 733 MHz, 128 MB RAM, அதில் 8MB வீடியோ மெமரியாக எடுத்துக் கொள்ளப்படும். மதர்போர்டிலேயே ஒலி அமைப்பு உள்ளது. என்னிடம் ஒரு கடினவட்டு இருந்தது. 52x CDROM, floppy drive, mouse, keyboard, ethernet card எல்லாம் சேர்த்து ரூ. 8000 ஆனது. ஒரு பழைய மானிட்டர் திரை ரூ. 1,500க்குக் கிடைத்தது (15"). ஒலிபெருக்கி ரூ. 500 ஆனது. ஆக ரூ. 10,000 க்கு ஒரு பல்லூடகக் கணினி தயார். இது சரியாக வேலை செய்யுமா என்று தெரிந்திருக்கவில்லை அப்பொழுது. முதலில் மாண்டிரேக் லினக்ஸ் போட்டேன். அதில் ஒலிச்செயல்பாடு சரியாக இல்லை. பின்னர் என்னிடம் இருந்த பழைய Windows 98 போட்டேன். அருமையாக உள்ளது. இணையத்தில் உலாவ, விசிடி போட்டுப் பார்க்க (இப்பொழுது லயன் கிங் ஓடிக் கொண்டிருக்கிறது).

உங்களுக்குத் தேவை நான் மேலே சொன்னது மட்டுமே என்றால் அதற்கு ரூ. 12,000க்கு மேல் ஆகாது (புது கடினவட்டோடு சேர்த்து). இன்னுமொரு ரூ. 1,000க்கு கணினி விற்பனையாளரிடமிருந்து ஒரு வருட அணுக்கம் (assistance, support) கிடைக்கும்.

லினக்ஸை இதில் ஓட வைக்க முடியும். அதற்கு என்னிடம் நேரம் இல்லை இப்பொழுது. அப்படி யாரேனும் லினக்ஸ் போட நினைத்தாலும் இப்பொழுதுள்ள கொழுத்துப் பெருத்த லினக்ஸ் (ரெட் ஹாட்டோ, மாண்டிரேக்கோ) சரியாயிருக்காது. மிகவும் இலேசான ஒரு லினக்ஸ் தேவை.

போடா வழக்கில் நக்கீரன் கோபாலுக்கு ஜாமீன்

நக்கீரன் கோபாலுக்கு நிபந்தனை ஜாமீன் கொடுத்துள்ளது சென்னை உயர் நீதிமன்றம், இன்று. உச்ச நீதிமன்றத்தின் விளக்கத்துக்குப் பின்னர் தமிழர் தேசிய இயக்கத்தைச் சேர்ந்த நெடுமாறன் முதற்கொண்டு மூன்று பேருக்கு நேற்று ஜாமீன் கிடைத்தபின்னர், இன்று மற்றுமொரு வழக்கில் கோபாலுக்கு ஜாமீன் கிடைத்துள்ளது.

இந்தியா ஒளிர்கிறது!

இதுதான் தற்பொழுது மத்திய அரசின் "சுய-தம்பட்ட" விளம்பரங்களுக்குப் பெயர். "India Shining!" என்று ஆங்கிலத்தில் பெயரிட்டு, ஒவ்வொரு மொழியிலும் மாற்றப்பட்டு, தமிழில் மேற்கண்ட பெயரில் வெளிவருகிறது. வானொலியில், செய்தித்தாள்களில் எங்கும் ஒரு சிரிக்கும் பஞ்சாபி விவசாயி, பொங்கும் மலர்ச்சியுடன் ராஜஸ்தானத்துப் பெண், கையில் செல்பேசியுடன் ஒரு தொழில்முனைவர் என்று 'ஒளிமிகுந்த பாரதத்தின்' மக்கள் காட்டப்படுகின்றனர்.

இவையெல்லாம் தற்போதைய மத்திய அரசின் சாதனைகளாகக் காண்பிக்கப்படுகின்றன. இந்த விளம்பரங்கள் அனைத்தையும் பாராளுமன்றத் தேர்தல் அறிவிப்பு வருமுன்னர் செய்து விட வேண்டும் என்று இறக்கை கட்டிக்கொண்டு செயல்படுகிறது அரசு இயந்திரம். ஒவ்வொரு மலர்ந்த முகத்தைக் காண்பிக்கும் போதும் அதற்கு இணையாக பசித்து, ஒட்டிய வயிரையும், வறுமைக்கோட்டுக்குக் கீழே வாழ்க்கை முழுவதையும் கழிக்கும் சுருக்கம் விழுந்த முகத்தையும், கோடிக் கணக்கான ஊழல்களையும், மதக்கலவரங்களையும், நக்சல்கள் உருவாகக் காரணமான வறட்சியையும் காண்பிக்கலாம்.

இந்த 'ஒளிரும் இந்தியா' யாரை மயக்குவதற்கு? நிச்சயமாக தற்போதைய அரசின் காலத்தில் பல வளர்ச்சித் திட்டங்கள் செயல்படுத்தப் பட்டுள்ளன. அதற்காக அரசின், மக்களின் வரிப்பணத்தை இப்படியா விரயம் செய்வது? அந்தப் பணத்தில் எத்தனை பேருக்கு சோறூட்டலாம்? இன்னமும் எத்தனை வளர்ச்சிப் பணிகளுக்குப் பணம் கொடுக்கலாம்?

ஜெயலலிதா மீதான வழக்குகள் நிலவரம்

ஜெயலலிதா மீது பத்து வழக்குகள் தொடரப்பட்டது. அந்த முழுப் பட்டியலும் இங்கே. அதில் இரண்டு வழக்குகள் டான்ஸி நிலம் சம்பந்தப்பட்ட வழக்குகள். இவை கடைசியாக உச்ச நீதிமன்றத்தால் தள்ளுபடி செய்யப்பட்டன.

இப்பொழுது ஸ்பிக் பங்கு ஊழல் பற்றிய வழக்கு சிபிஐ விசாரணைக்குப் பின்னர் நீதிமன்றத்தில் உள்ளது. ஜெயலலிதா நேற்று நீதிமன்றத்தில் சாட்சி அளித்தார். முழு விவரம் தினமலரில்.

இதற்கிடையில் "வருமானத்திற்கு அதிகமாக சொத்துக் குவிப்பு வழக்கு" தமிழ்நாட்டிற்கு வெளியே நடத்தப்பட வேண்டும் என்று உச்ச நீதிமன்றம் உத்தரவிட்டு, கர்நாடகாவுக்கு மாற்றச் சொன்னது. ஜெயலலிதா கர்நாடக மக்கள் தனக்கு எதிரானவர்கள் (காவிரிப் பிரச்சினையை முன்வைத்து), அதனால் வழக்கை பாண்டிச்சேரிக்கு மாற்ற வேண்டும் என்று முறையீடு செய்தார். பின்னர் ஜெயலலிதாவின் வழக்கறிஞர் வேறு எந்த மாநிலமாக (கேரளா, ஆந்திரா...) இருந்தாலும் பரவாயில்லை என்று கேட்டுக்கொள்ள, அவர்களது மனுவை மாற்றி அனுப்ப உச்ச நீதிமன்றம் அனுமதித்து உள்ளது. மேலும் உச்ச நீதிமன்றம் கர்நாடக அரசிடம் ஜெயலலிதாவின் முறையீட்டின் மேலான அவர்களது பதிலை அனுப்பக் கோரியுள்ளது.

நீதி வழங்கப்படுவதுடன், நீதி வழங்கப்பட்டது போன்ற தோற்றமும் இருக்க வேண்டும். எனவே, உச்ச நீதிமன்றம், இந்த சொத்துக் குவிப்பு வழக்கை கேரளாவுக்கு (பாண்டிச்சேரி கூடாது!) மாற்ற வேண்டும். நேரத்தை விரயமாக்கக் கூடாது.

போடா வழக்கில் நெடுமாறனுக்கு ஜாமீன்

நெடுமாறனுக்கு 17 மாதங்களுக்குப் பின்னர் போடா வழக்கில் ஜாமீன் கிடைத்துள்ளது. நீதிபதிகள் "நாங்கள் முழுக் குற்றப் பத்திரிக்கையையும் படித்ததில் புகார் வெறும் நெடுமாறன் பேசியுள்ள பேச்சுக்கள் பற்றி மட்டுமே உள்ளது" என்று சொல்லியுள்ளனர். மேலும் 'தடை செய்யப்பட்ட புத்தகங்கள்' இவர்களிடமிருந்து கிடைத்தது அன்று குற்றம் சாட்டி விட்டு, அந்தப் புத்தகங்கள் யாவும் தமிழ்நாட்டில் அல்லது வேறு எந்த இடங்களிலும் தடை செய்யப்படவில்லை என்றும் அரசு தரப்பில் சொல்லப்பட்டிருக்கிறது! தடை செய்யப்பட்ட இயக்கங்களுடன் தொடர்பு இருக்கிறது என்ற குற்றச்சாட்டிற்கு, அந்தத் தொடர்பு தீவிரவாதச் செயலைச் செய்யத் தூண்டுகோலாயிருந்திருக்கிறது என்று ஒரு நிரூபணமுமில்லை. ஆக சென்னை உயர்நீதிமன்றம் கிட்டத்தட்ட இந்த வழக்கு ஜோடனை செய்யப்பட்ட பொய் வழக்கு என்ற அளவிற்கு சற்று குறைவாக கருத்தைச் சொல்லி, நெடுமாறனுக்கு ஜாமீன் கொடுத்துள்ளது.

நெடுமாறன் மீதுள்ள வழக்கு போடா நீதிமன்றத்தில்தான் நடைபெற வேண்டும். உயர் நீதிமன்றம் இந்த வழக்கில் தலையிடாது, ஆனால் ஜாமீன் வழங்கி இந்த நீதிபதிகள் சொன்ன கருத்தை போடா நீதிமன்ற நீதிபதி கருத்தில் வைத்தல் வேண்டும். மேலும் உச்ச நீதிமன்றத் தீர்ப்பையும் மனதில் வைக்க வேண்டும்.

இதர போடா பற்றிய செய்திகள்:

ஒரு மாநிலம் ஒருவர் மீது சாற்றியுள்ள போடா வழக்கினைத் தானாகவே திரும்பிப் பெற இயலாது, மத்திய அரசும் இசைந்தால்தான் அவ்வாறு செய்ய முடியும் என்று உச்ச நீதிமன்றம் தீர்ப்பு சொல்லியுள்ளது.

போடா சட்டத்திருத்தம் மாநிலங்கள் அவையிலும் வாக்கெடுப்பில் வென்றது. ஆனால் எதிர்க்கட்சிகள், போடாவை நீக்க வேண்டும் என்று கேட்டுக் கொண்டு, வெளிநடப்பு செய்தன.. இங்கு சுவாரசியமானது: சோ ராமசாமி மாநிலங்கள் அவையில் நியமன உறுப்பினர். இந்த சட்டத்திருத்தத்திற்கு எதிராக அஇஅதிமுக மட்டும்தான் மக்களவையிலும், மாநிலங்கள் அவையிலும் வாக்கெடுப்பில் வாக்களித்தன. மற்ற எதிர்க்கட்சிகள் இரண்டு அவைகளிலும் வெளிநடப்பு செய்தன. சோ எப்படி வாக்களித்தார் மாநிலங்கள் அவையில்? வாக்கெடுப்பின் போது மாநிலங்கள் அவையிலேயே இல்லையா? அல்லது ஆதரவாக வாக்களித்தாரா? இல்லை எதிர்ப்பெல்லாம் துக்ளக்கிலும், ஹிந்துஸ்தான் டைம்ஸில் எழுதுவதற்கு மட்டும்தானா?

மேலும் நேற்று அத்வானி மாநிலங்கள் அவையில் போடா சட்டம் (திருத்தத்துடன்) இருக்க வேண்டும் என்று ஆதரித்துப் பேசிய படத்துண்டு ஒன்று பார்த்தேன். அதில் "I agree that this (POTA) law is draconian" என்று கைகள் இரண்டையும் மடித்தவண்ணம் சொன்னார். "draconian" என்றால் மிகவும் கடினமான சட்டம். டிராகோ என்பவர் கிமு 7ஆம் நூற்றாண்டில் ஏதென்ஸ் நகரப் பாராளுமன்ற உறுப்பினர். இவர் இயற்றிய சட்டங்கள் எல்லாம், கிட்டத்தட்ட எந்தக் குற்றம் புரிந்தாலும் மரண தண்டனை கொடுக்க வேண்டும் என்று கடைசியில் முடியும். காசைத் திருடினால் மரணம், அடுத்தவனைத் திட்டினால் மரணம்! இப்படிப்பட்ட சட்டமா ஒரு நாகரிகக் குடியாட்சி முறையில் வாழ விரும்பும் மக்களுக்குத் தேவை? அதை நாட்டின் துணைப்பிரதமர், உள்துறை அமைச்சர் ஒத்துக் கொள்ளவும் செய்கிறார்! ஒருவேளை அத்வானிக்கு "டிராகோனியன்" என்பதன் பொருள் முழுதாகப் புரியவில்லையோ, என்னவோ?

Thursday, December 18, 2003

சோவின் போடா ஆதரவு

சோ ராமசாமி, துக்ளக்கின் ஆசிரியர், போடா சட்டத்தின் தீவிர ஆதரவாளர். அது மட்டுமல்லாமல், வைகோ, நெடுமாறன் ஆகியோரை போடா சட்டத்தின் கீழ்க் கைது செய்து சிறையில் அடைத்ததை ஆதரிப்பவர். போடா சட்டத் திருத்தம் இரண்டு நாட்களுக்கு முன்னர் பாராளுமன்றத்தில் கொண்டுவரப்பட்டது. அதனை தனக்கே உரிய கேலியான முறையில் எதிர்த்து "The Prevention of Terrorism Act is gone and has been substituted by the Protection of Terrorism Act. POTA is dead. Long live POTA." என்கிறார் தன்னுடைய ஹிந்துஸ்தான் டைம்ஸ் கட்டுரையில்.

சுப்ரமணியம் சுவாமியும் இதே கருத்தை முன்மொழியக் கூடும். அதாவது உச்ச நீதிமன்றம் - வெறும் சொல்லளவில் கொடுக்கும் ஆதரவு போடாவின் கீழ் வர முடியாது, செயலும் இருந்தால்தான் - என்றதனால் இனி இந்தியா முழுவதும் மக்கள் தாவூத் இப்ராஹிம் மற்றும் பிற இந்திய நாட்டின் எதிரிகளுக்கும், ஈழ விடுதலைப் புலிகளுக்கும் மற்றும் பிற இந்திய நாட்டின் ஒருமைப்பாட்டிற்குக் "கேடு விளைவிப்பவருக்கும்" ஆதரவாகக் குரல் எழுப்பலாம், கருத்தரங்கங்கள் நடத்தலாம் என்றெல்லாம் பூச்சாண்டி காட்டத் தொடங்கி விட்டார்.

அப்படித்தான் நடக்கட்டுமே? என்ன கெட்டுப் போய் விட்டது? ஒரு எழுவரல் குடியாட்சி (liberal democracy) முறையில் மாற்றுக் கருத்துகளுக்கு இடம் எப்பொழுதும் இருக்க வேண்டும். சொல்லளவில் எத்தகைய தீவிரவாதக் கருத்துகளுக்கும் இடம் கொடுக்கலாம். கனடாவில் பிரிவினைவாதம் பேசும் பலர் உள்ளனர். அமெரிக்காவில் பல சிறு குழுக்கள் அரசினை வெறுக்கின்றன. ஆயுதப் புரட்சி செய்ய வேண்டுமென்றெல்லாம் பேசுகின்றன. அவர்கள் அனைவரையும் அள்ளிக் கொண்டுபோய் உள்ளே போட வேண்டும் என்று யாரும் சொல்வதில்லை.

பத்திரிக்கைக் கருத்து சுதந்திரம் பற்றிக் கொட்டி முழங்கும் சோ, தனி நபர் கருத்து சுதந்திரத்தில் கட்டுப்பெட்டித்தனத்துடன், பிற்போக்காளராகவும் இருப்பதேன்?

போடா பற்றிய என் பதிவுகள்: ஓன்று | இரண்டு

மத்திய அரசின் விளம்பரத்திற்கு பீஹார் மாநில அரசு பதில்

இது மாநில, மத்திய அரசுகள் டென்னிஸ் ஆடுவது போல ஒருவரை ஒருவர் குற்றம் சொல்லி முழுப்பக்க விளம்பரம் செய்யும் நேரம். சத்யேந்திர துபே கொலை பற்றி கடைசியாக மத்திய தரைப் போக்குவரத்து மற்றும் நெடுஞ்சாலைகள் அமைச்சரகம் ஒரு விளம்பரம் மூலம் தன் நிலையை விளக்கியது. அதில் பீஹார் மாநில அரசை இந்தக் கொலைக்கு முழுப் பொறுப்பாளி என்றது. இதற்கு பதிலாக பீஹார் மாநில அரசு தன் நிலையை விளக்கி ஒரு முழுப்பக்க விளம்பரத்தை வெளியிட்டுள்ளது.

சாரம்:

* தங்க நாற்கோணத் திட்டத்திற்கு, பீஹார் மாநில அரசு, எங்கெங்கெல்லாம் முடியுமோ, அங்கெல்லாம் பாதுகாப்பு அளித்து வருகிறது.
* துபே தனது கடிதம் எதிலும் பீஹார் மாநிலத்தில் சட்டம் ஒழுங்கு கெட்டுப்போய் விட்டதென்று குற்றம் சாட்டவேயில்லை.
* துபேயின் குற்றச்சாட்டு அனைத்துமே தேசிய நெடுஞ்சாலைகள் வாரியத்தில் ஒப்பந்தம் வழங்குவதில் ஊழல் மலிந்திருக்கிறது என்பதுதான். இதில் முழுப்பங்கு மத்திய அரசிடம் மட்டுமே. பீஹாரின் சட்டம் ஒழுங்கைக் குறை கூருவது ஏன்?
* துபேயுடன் கூடப் படித்த ஐஐடி மாணவர்தான் கயாவின் காவல்துறை ஆணையராக உள்ளார். துபே அவரைப் பலமுறை சந்தித்துள்ளார். ஒருமுறை கூடத் தனக்கு பாதுகாப்பு வேண்டும் என்று சொன்னதில்லை.

ஒருவர் மீது மற்றொருவர் குற்றம் சுமத்தினாலும், மக்களிடம் தங்களது நிலையை விளக்க வேண்டும் என்ற இருவரது எண்ணமும் அந்த அளவில் வரவேற்கத் தக்கதே.

இனி அடுத்து என்ன நடக்கும் என்பதைப் பொறுத்திருந்து பார்ப்போம்.

போடா பற்றி

இன்றைய தி ஹிந்து தலையங்கம் "POTA reinterpreted" படிக்க வேண்டிய ஒன்று. அதன் கருத்துக்களோடு முழுதும் ஒத்துப் போகிறேன்.

எனது நேற்றைய பதிவையும் கவனிக்கவும்.

வைகோ ஆனால் போடா தனி நீதிமன்றத்தை அணுகி வழக்கைத் தள்ளுபடி செய்யக் கேட்டுக் கொள்ளப் போவதில்லை என்கிறார்.

மேலும் உச்ச நீதிமன்றத் தீர்ப்பைப் பார்க்கும்போது தடை செய்யப்பட்ட இயக்கங்களுக்கு ஆதரவாகப் பேசுவது மட்டுமே போடா குற்றமாகாது. இது மிகவும் வரவேற்கத் தக்க தீர்ப்பு.

Wednesday, December 17, 2003

போடா மற்றும் கட்சித் தாவல்

நேற்று இந்தியா, ஆஸ்திரேலியாவை டெஸ்டில் தோற்கடித்தது. நேற்று மற்ற சில முக்கியமான நிகழ்வுகளும் இருந்தன.

1. தீவிரவாதத் தடுப்புச் சட்டம் போடா (POTA) பற்றிய வழக்கின் மீது உச்ச நீதிமன்றம் தீர்ப்பளித்துள்ளது. வை.கோபால்சாமி (வைகோ) உச்ச நீதிமன்றத்தில் தொடுத்த வழக்கில் "சட்டம் ஒழுங்கைப் பராமரிப்பது மாநிலங்களின் கடமை. அப்படி இருக்கையில் நாட்டின் பாராளுமன்றம் போடா சட்டத்தை இயற்றியிருக்க முடியாது. அது மாநிலங்களின் சட்டமன்றங்களில்தான் இயற்றப்பட்டிருக்க வேண்டும்" என்னும் வகையில் அமைந்திருந்தது போலும். ஆனால் உச்ச நீதிமன்றம் இதனை ஏற்கவில்லை; "தீவிரவாதம் மாநிலங்களின் எல்லைகளைத் தாண்டி, நாடு முழுவதையும் உள்ளடக்கி நிகழ்கிறது. எனவே இதனைத் தடை செய்யுமாறு சட்டம் இயற்ற நாட்டின் பாராளுமன்றத்திற்கு அனுமதி உண்டு" என்று கூறியுள்ளது. மேலும் ஏற்கனவே இருக்கும் சட்டங்களால் தீவிரவாதத்தைத் தடை செய்ய முடியாது என்பதனை ஆராய்ந்த பின்னரே பாராளுமன்றம் இச்சட்டத்தை இயற்றியுள்ளது என்பதனையும் நீதிபதிகள் விளக்கியுள்ளனர்.

முதலில் வைகோ ஏன் இந்த 'டெக்னிகாலிட்டி'யைக் காரணம் காட்டி உச்ச நீதிமன்றம் சென்றார் என்று புரியவில்லை.

ஆனால் மிக முக்கியமாக, மேற்குறிப்பிட்டுள்ள தீர்ப்பில், நீதிபதிகள் இவ்வாறும் சொல்லியுள்ளனர்: "தடை செய்யப்பட்ட ஒரு பயங்கரவாத இயக்கத்துக்கு ஒருவர் கருத்து ரீதியாக ஆதரவு காட்டினார் என்பதனால் மட்டுமே போடாவின் பிடிக்குள் வர முடியாது. போடாவின் கீழ் கைது செய்யப்பட வேண்டுமானால், ஒருவர் ஒரு தீவிரவாதச் செயலைச் செய்யத் தூண்ட வேண்டும், அல்லது அந்தத் தீவிரவாதச் செயலைச் செய்வதற்குத் துணைபோக வேண்டும்.

இதனைக் காரணம் காட்டி வைகோ போடா தனி நீதிமன்றத்திடம் தான் நிச்சயமாக தீவிரவாதச் செயலைச் செய்யத் தூண்டவுமில்லை, தீவிரவாதச் செயலுக்குத் துணைபோகவுமில்லை என்று வாதாடலாம்.

செய்வார், விடுவிக்கப்படுவார் என்று நம்புவோம்.

2. பாராளுமன்றத்தில் போடா சட்டத்திருத்தம் வாக்கெடுப்பில் வென்றது. ஆனால் இதற்கு முன்னர், எதிர்க்கட்சிகள் அனைத்தும் வெளிநடப்பு செய்தன. அஇஅதிமுக உறுப்பினர்கள் எதிராக வாக்களித்தனர். இந்த சட்டத் திருத்தம் மாநில அரசுகள் போடாவைத் தவறாகப் பயன்படுத்துவதை நிறுத்துவதற்காகக் கொண்டு வரப்பட்டுகிறது என்பது மத்திய அரசின் வாதம். எதிர்க்கட்சிகள் போடா தவறாகப் பயன்படுத்தப்படும் என்பது தெரிந்துதான் நாங்கள் இந்த சட்டம் நடைமுறையாகக் கூடாது என்று எதிர்த்தோம். இப்பொழுது சட்டம் தவறாகப் பயன்படுத்தப் படுகிறது என்று நீங்களே சொல்கிறீர்கள் என்று குற்றம் சாட்டின.

ஆனால் துணைப் பிரதமர் அத்வானி, தீவிரவாதத்தை எதிர்க்க போடா அவசியம் தேவை என்று மீண்டும் வலியுறுத்தியுள்ளார்.

என்னைப் பொறுத்தவரை போடா அநாவசியமான சட்டம். இந்த சட்டத்தை இதுவரை மாநில அரசுகள் தவறாகத்தான் பயன்படுத்தியுள்ளன என்று தோன்றுகிறது. இந்த சட்டத்தை நீதிமன்றங்களால் தூக்கி எறிய முடியாது. அரசே முன்வந்து விலக்கிக் கொள்ள வேண்டும். அது இப்பொழுதைக்கு நடக்காது. இந்த சட்டத்தின் தேவையின்மையை எதிர்க்கட்சிகள்தான் தீவிரமாக விளம்பரப் படுத்த வேண்டும். வாக்கெடுப்பின் போது வெளியேறுவது கையாலாகாத் தனத்தையே குறிக்கிறது.

3. கட்சித் தாவல் தடை சட்டத் திருத்தம்: மக்களவையில் இந்த சட்டத் திருத்தம் கொண்டுவரப்பட்டுள்ளது. மாநிலங்கள் அவையில் வாக்கெடுப்பில் வெற்றி பெற்றால் இந்த சட்டம் அமலுக்கு வரும். இதன்படி சட்டமன்றங்கள், பாராளுமன்றத்தில் இடைக்காலத்தில் கட்சி மாறினால் அப்படி மாறுபவருக்கு பணம் கிடைக்கும் அரசியல் பதவிகளுக்கான வாய்ப்பு போய்விடும். அதாவது கட்சி மாறுபவருக்கு அமைச்சர் பதவியோ, வாரியத் தலைவர் பதவியோ இனிமேல் கிடைக்காது.

Tuesday, December 16, 2003

இந்தியா வெற்றி

இந்தியா ஆஸ்திரேலியாவைத் தோற்கடித்து விட்டது! இந்தத் தொடர் ஆரம்பிக்கும் போது நான் இப்படி நடக்கும் என்று துளியும் நம்பவில்லை. இந்த டெஸ்டு போட்டி ஆரம்பிக்கும்போதும் நம்பவில்லை. திருப்பு முனையே நான்காவது நாள் ஆட்டமும், அகர்காரின் பந்து வீச்சும்தான்.

ராஹுல் திராவிட்... இவரது ஆட்டத்தைப் பற்றி எத்தனை வேண்டுமானாலும் எழுதலாம். இந்த டெஸ்டு போட்டியின் மூலம் இந்தியாவின் தலை சிறந்த ஆட்டக்காரர்களில் இவரே முதன்மையானவர் என்பதை நிரூபித்துள்ளார். வெங்கட் லக்ஷ்மண் பெயரையும் மறக்காது குறிப்பிட வேண்டும். ஜாகீர் கான் அடுத்த போட்டியில் விளையாட வருவாரெனில் இந்திய அணிக்கு இந்தத் தொடரை வெல்ல அதிக வாய்ப்புகள் இப்பொழுது தென்படுகின்றன.

இந்திய அணிக்கு வாழ்த்துகள்.

ராஹுல் திராவிட் பற்றிய முந்தைய வலைப்பதிவு

Monday, December 15, 2003

துபே கொலை பற்றி மத்திய அரசின் தன்னிலை விளக்கம்

இன்று 'தி ஹிந்து' செய்தித்தாளில் மத்திய அரசின் தரைப் போக்குவரத்து அமைச்சரகமும், தேசிய நெடுஞ்சாலை வாரியமும் இணைந்து சத்யேந்திர துபே கொலை பற்றிய தன்னிலை விளக்கமாக ஒரு "விளம்பரச் செய்தியை" வெளியிட்டுள்ளன.

இதன் சாரம்:

* பிரதமர் அலுவலகத்துக்கு துபே எழுதிய கடிதம் வெளியானதன் மூலமாகத்தான் துபேயின் பெயர் வெளியே தெரிந்து அவர் கொல்லப்பட்டார் என்பது தவறான கருத்து. பிரதமர் அலுவலகத்துக்கு வந்த கடிதத்தின் நகல் நெடுஞ்சாலைத் துறையின் விஜிலன்ஸ் கமிஷனருக்கும் அனுப்பப்பட்டிருந்தது. மேலும் பிரதமர் அலுவலகம் துபேயின் கடிதத்தை வைத்துக் கொண்டு நேரிடையாக எந்தச் செயலிலும் ஈடுபட முடியாது. அதனை சம்பந்தப்பட்ட அமைச்சரகத்துக்கு அனுப்புவதே பிரதமர் அலுவலகத்தின் கடமையாகும். அவ்வாறு முழுத்தகவலையும் (பெயரும் சேர்த்து) தரைப் போக்குவரத்து அமைச்சரகத்திடம் அனுப்பியது ரகசியத்தை வெளியே சொல்வதாக ஆகாது.

* துபேயின் கடிதத்தின் பலனாக ஒரு சில நடவடிக்கைகள் எடுக்கப்பட்டன. ஒரு சில ஒப்பந்தக்காரர்களின் ஊழியர்கள் பணிநீக்கம் செய்யப்பட்டனர். சாலை ஓரிடத்தில் மீண்டும் பாவப்பட்டது. துபே பிரதமருக்கு நேரிடையாகக் கடிதம் அனுப்பியது தவறு (?) என்றாலும் அவரை தண்டிக்காது, அவரது நேர்மையைப் பாராட்டி அவருக்கு பணி உயர்வும் கொடுக்கப்பட்டது.

* பீஹாரின் சட்டம் ஒழுங்கின்மையே இந்தக் கொலைக்குக் காரணம். இதுபற்றிப் பலமுறை அமைச்சர் கந்தூரி பீஹாரின் முதல்வர் ராப்ரி தேவிக்குக் கடிதம் எழுதியுள்ளார்.

* மற்ற எல்லாவிடங்களிலும் வேலை நன்கு நடந்து வருகிறது. ஆனால் பீஹாரில் மட்டும்தான் எல்லா வேலையிலும் நிறையத் தடங்கல் ஏற்பட்டுள்ளது (அட்டவணையைப் பார்க்க)

===

பீஹார் சட்டம் ஒழுங்கில்லாத மாநிலம் என்பது அனைவரும் ஓரளவுக்கு அறிந்ததே என்றாலும், இந்த அரசின் செய்தி விளம்பரம் மூலம் எல்லாக் கேள்விகளுக்கும் விடை கிடைத்ததாகத் தெரியவில்லை.

1. ஒரு கடிதத்தில் துபே தனது உயிருக்கு ஆபத்து ஏற்படலாம் என்று சொல்கிறார். "என் பெயர் வெளியில் தெரிந்ததனால் நான் தேவையற்ற பிரச்சினைகளுக்கும், மிரட்டல்களுக்கும் உள்ளாகியிருக்கிறேன்" என்கிறார். ஆனால் அவருக்கு சரியான பாதுகாப்பு கொடுக்கப்பட்டதாகத் தெரியவில்லை.

2. பீஹார் அரசுக்குப் பல கடிதங்கள் அனுப்பியிருப்பதாகச் சொல்கிறார் தரைப் போக்குவரத்து அமைச்சர் கந்தூரி. ஆனால் நேற்று NDTV விவாதம் ஒன்றில் கலந்து கொண்ட பீஹார் சட்ட அமைச்சர் அதுமாதிரி ஒன்றும் வரவில்லை என்பது போலப் பேசினார். உண்மை என்ன? மத்திய அரசு ஏன் சும்மா இருக்கிறது? மத்தியப் படைகளின் (CRPF) மூலம் பாதுகாப்பு கொடுக்க முடியாதா?

3. துபே பெயர் குறிப்பிட்டு நான்கு ஒப்பந்தக்காரர்களை ஊழல் பேர்வழிகள் என்கிறார்: சென்டிரோடோர்ஸ்டோய் (ரஷ்யா), சைனா கோல் (சீனா), எல்ஜி (கொரியா) - இந்த மூன்று நிறுவனங்களும் அனுபவமும், திறமையும் இல்லாத உள்ளூர்க் காரர்களுடன் சேர்ந்து அவர்கள் மூலம் வேலைகளைச் செய்கின்றன, இந்த வேலைகள் தரமில்லாது இருக்கின்றன என்கிறார். பிராக்ரஸ்ஸிவ் கன்ஸ்டிரக்ஷன்ஸ் என்னும் நிறுவனம் சரியாகத் தொழிலை நிர்வகிக்கக் கூடியதில்லை என்று தான் கருதுவதாகச் சொல்கிறார். இந்த நான்கு நிறுவனங்களும் NH-2 (தில்லியையும், கொல்கத்தாவையும் இணைக்கும் பாதை) வில் வேலை செய்கின்றன. இந்த நான்கும் கூட்டாகவோ, தனியாகவோ துபே மீது கொலையாட்களை ஏவியிருக்கலாம். அதுபற்றி CBI விசாரணை செய்யும் என்றாலும், தேசிய நெடுஞ்சாலை வாரியம் அந்த ஒப்பந்தங்களை மீள்-ஆய்வு செய்யலாமே?

இன்னமும் கேள்விகள் நிறைய இருக்கின்றன.

சத்யேந்திர துபே பற்றிய என் பிற வலைப்பதிவுகள் ஒன்று | இரண்டு

Sunday, December 14, 2003

சதாம் ஹுசேன் பிடிபட்டார்

தொலைக்காட்சியில் சூடான செய்தி ஓடிக்கொண்டிருக்கிறது. இதன் விளைவுகள் என்ன என்பது போகப்போகத்தாண் தெரியும்.

சங்கம்: மாலன், நன்னனொடு சந்திப்பு

'தமிழ் உரைநடை எங்கே போகிறது?' என்னும் புத்தகத்தின் ஆசிரியர் பேரா.நன்னன் உடன் மாலன் இன்று சன் நியூஸில் உரையாடல் நிகழ்த்தினார். கடந்த ஓரிரு வாரங்களில் யாஹூ குழுமங்கள் ராயர்காபிகிளப், மரத்தடி ஆகியவற்றில் நடந்த விவாதங்களை மனதில் வைத்த மாதிரி இருந்தது இந்த உரையாடல். கிரிக்கெட் போட்டி வெகு சுவையானதாகப் போய்க்கொண்டிருந்ததால் அங்கும், இங்குமாக தொலை-இயக்கியைத் தட்டிக் கொண்டிருக்க வேண்டியதாயிற்று. எழுத்தில் தவறுகள் புகுவதை எப்படி தடுப்பது என்பது பற்றியது புத்தகம் என்று புரிந்தது. தவறான ஒருமை-பன்மை, உயர்திணை-அஃறிணை புழக்கம், சொற்களின் தவறான பொருள்கள் நாளடைவில் பயன்படுத்தப் படுவது (இறும்பூதுதல் என்ற சொல்லினை எடுத்துக்காட்டினார்), ஆங்கிலத்தில் சிந்தித்து தமிழாக்கம் செய்வதில் வரும் குழப்பங்கள் என்று சுவையாகச் சென்றது உரையாடல். [அங்கு இரண்டு பந்துகள் பார்ப்பேன், இங்கு ஒரு நிமிடம்...]

[தெரிந்து கொள்ள விழைபவருக்கு: இறும்பூதுதல் என்றால் ஆச்சரியப்படுதல். "நீங்கள் சட்டமன்றத் தேர்தலில் வென்றதை நினைத்து இறும்பூது எய்துகிறேன்" என்றால் "நீ எப்படிய்யா கெலிச்சே? தோத்துடுவேனில்ல நெனச்சேன்" என்று பொருள், ஜெயித்தவரைப் பாராட்டுவது அல்ல.]

ஆங்கில மொழித்தாக்கத்தால் இயல்பாக வினையைப் புழங்காமல், வினையெச்சத்தைப் பெயர்ச்சொல்லாக்கி அதன் கடைசியில் மற்றுமொரு வினையைப் போட்டுக் குழப்புவதைப் பற்றியும் நன்னன் பேசினார். ('பேசினார்' என்பதற்குப் பதில் 'பேச்சுவார்த்தை நடத்தினார்', 'புரிந்து கொண்டார்' என்பதற்குப் பதில் 'புரிதலைச் செய்தார்' ஆகிய பிரயோகங்கள்.)

மாலன் முடிக்கையில் தமிழ் மாநிலக் காங்கிரஸ், காங்கிரஸுடன் இணைந்தது என்பது தவறான பிரயோகம், 'ஒன்றானது' என்பதுதான் சரி என்று தான் எண்ணுகிறேன் என்றார். நன்னன் அதனை மேற்கொண்டு விளக்குகையில் 'இணைவது' என்பது தனியாக இருக்கும் இரண்டோ, அதற்கு மேற்பட்டதோ சேர்ந்தவாறு இருப்பது என்றும், அவை விரும்பும்போது பிரியலாம் என்றும், 'ஒன்றாவது' என்பது இரண்டறக் கலந்து விடுவது, புதிதாக ஒன்றை உருவாக்குவது என்றும் விளக்கினார். பாலும் தண்ணீரும் கலந்து தண்ணீர்ப்பால்; உளுந்து மாவும் அரிசி மாவும் கலந்து தோசை மாவு ஆகியவை ஒன்றாவது. ஐந்து விரல்களும் இணைந்து இருப்பது என்பது ஒன்றோடொன்று ஒட்டி நிற்பது.

தமிழில் பிழையின்றி எழுத விரும்புவோர் புத்தகத்தைத் தவறாமல் வாங்கிப் படிக்க வேண்டும் என்று தோன்றுகிறது. வாங்கிப் படித்தபின் எழுதுகிறேன்.

மாலன் - மன்னர்மன்னன் சந்திப்பு

மிகை நாடும் கலை

காலச்சுவடு இதழ்கள் 1993-2000 களில் இதுவரை வந்துள்ள திரைப்படத் துறை தொடர்பான கட்டுரைகளை ஒன்றிணைத்து காலச்சுவடு பதிப்பகம் 'மிகை நாடும் கலை' என்றொரு புத்தகத்தை வெளியிட்டுள்ளது. விலை ரூ. 115. இப்பொழுது உயிர்மை, தீம்தரிகிட ஆகிய இதழ்களிலும் தமிழ்த் திரைப்படங்கள் பற்றி சுவையான, சிந்தனையைத் தூண்டும் வகையிலான கட்டுரைகள் வருகின்றன. அ.ராமசாமி என்பவர் இந்த இரு இதழ்களிலும் எழுதியுள்ள கட்டுரைகள் படிக்க வேண்டியவை.

சட்டமன்ற உரிமை மீறல் பற்றி சோ - 3 & 4

துக்ளக் 10/12/2003 & 17/12/2003 இதழ்களிலிருந்து:

* சட்டமன்றங்கள் மற்றும் பாராளுமன்றத்திற்கு உரிமைகளே இல்லையா? இருக்கின்றன - அதாவது சட்டமன்றங்களின் கடமைகளை யாரும் தடுக்காவண்ணம் நடத்த சட்டமன்றத்தின் அவைத்தலைவருக்கு உரிமை உள்ளது. அப்படி கடமைகளை நிறைவேற்றுவதற்கு இடையூறாக இருப்பது உரிமை மீறல்.

* சட்டமன்றங்களில் நடைபெறுவது அனைத்தும் சட்டமன்ற நடவடிக்கைகள் ஆகுமா? கிடையாது, உதாரணமாக ஒருவரை ஒருவர் திட்டி அடித்துக் கொள்வது, "வேட்டியை, புடைவையை அவிழ்ப்பது" போன்றவை நிச்சயமாக சட்டமன்ற நடவடிக்கைகள் ஆகாது.

* சட்டமன்றங்களில் நடைபெறும் குற்றவியல் சட்டத்தின் கீழான குற்றங்கள் (அடிதடி ஆகியவை) சட்டமன்றங்களின் நடவடிக்கைகளின் கீழ் இருக்க முடியாது. அக்குற்றம் செய்தவரை நீதிமன்றங்களில்தான் தண்டிக்க முடியும். சட்டமன்றத்தில் கண்டிக்க மட்டும்தான் முடியும். (பரிதி இளம்வழுதி வழக்கும் இப்படிப்பட்டதே. இவர் மீது கிரிமினல் குற்றம் சாட்டப்பட்டு, வழக்கு வெளியில் நடந்து தண்டனையும் அளிக்கப்பட்டது, பின்னர் சட்டமன்றமும் இவருக்கு மேற்கொண்டு தண்டனை கொடுத்தது. அது தவறென்று மற்றொரு விவாதம்...)

* உரிமை மீறல் வேறு, அவமதிப்பு வேறு. சட்டமன்ற நடவடிக்கைகளை நிறைவேற்றத் தடையாயிருப்பது மட்டும்தான் உரிமை மீறல். அவ்வாறு இல்லாமல் நடவடிக்கைகளுக்கு எந்த பங்கமும் வராமலும் சட்டமன்றத்தின் அதிகாரம் மீறப்படலாம். அது வெறும் அவமதிப்பு மட்டுமே. அப்படி அவமதிப்பு நிரூபணமானாலும் அதற்கு சட்டமன்றங்களால் தண்டனை வழங்க முடியுமா என்பதும் எழுப்பப்பட வேண்டிய கேள்வி.

* அது உரிமை மீறல் என்பதற்கு சில உதாரணங்கள்: (அ) சட்டமன்ற உறுப்பினரை மிரட்டி அவர் இப்படித்தான் பேச வேண்டும் என்பது, (ஆ) சட்டமன்ற உறுப்பினரைக் கடத்திக் கொண்டு போய் ஒளித்து வைத்திருப்பது, அவர் சட்டமன்றத்தின் இயங்காமல் செய்வதற்கான நிலைமையைக் கொண்டுவருவது, (இ) சட்டமன்ற உறுப்பினருக்கு லஞ்சம் கொடுத்து அவரது நிலைப்பாட்டினை மாற்ற முயலுவது, (ஈ) சட்டமன்றத்தில் ஒரு உறுப்பினர் பேசிக் கொண்டிருக்கும் போது அவரது பேச்சைத் தடுக்க முயலுவது... இப்படியானவை.

* ஒரு குடிமகனின் அடிப்படை உரிமைகளை சட்டமன்றத்தின் உரிமைகளுக்கு உட்பட்டது அல்ல. இரண்டுக்கும் பங்கம் வருமாறு நேரும்போது எதற்கு முன்னுரிமை என்று முடிவு செய்வது நீதிமன்றங்களே.

சட்டமன்ற உரிமை மீறல் பற்றி சோ - 2
சட்டமன்ற உரிமை மீறல் பற்றி சோ - 1

[பி.கு: இந்த வாரம் சிதம்பரம் கட்டுரை பற்றியும், குருமூர்த்தி கட்டுரை பற்றியும் எதுவும் எழுதப்போவதில்லை. இந்த வாரக் கல்கி வீட்டுக்கு வரவேயில்லை! பத்திரிக்கை போடுபவர் மறந்து விட்டார். குருமூர்த்தி அமெரிக்காவில் குடும்பங்கள் பல 'அப்பா இல்லாத குடும்பங்களாக' இருக்கின்றன என்பது பற்றிக் கவலைப்படுகிறார். அதில் எனக்கு ஒன்றும் அதிகம் கருத்து இப்பொழுதைக்குக் கிடையாது.]

தெற்காசிய நாடுகளுக்குப் பொது நாணயம் இப்பொழுது சாத்தியப்

ஹிந்துஸ்தான் டைம்ஸ் ஏற்பாடு செய்திருந்த நிகழ்ச்சியில் பேசிய பிரதமர் வாஜ்பாயி இரண்டு கருத்துகளை முன்வைத்தார்: (1) சார்க் எனப்படும் தெற்காசியக் கூட்டமைப்பு நாடுகள் திறந்த எல்லைகளை வைத்துக் கொண்டு வர்த்தகம் செய்ய வேண்டும் (2) இந்த நாடுகள் புழங்குவதற்கெனப் பொதுவானதொரு நாணயம்/பணம் (currency) வேண்டும். இதுதான் சாக்கு என்று பாகிஸ்தானும் தாமும் இவை நடக்கக் கூடியவைகளே என்று நம்புவதாகச் சொன்னது.

ஐரோப்பாவில் பல வருடங்களாகவே தனித்தனி நாடுகள் ஒன்றிணைந்து ஒரு பொதுச்சந்தையை உருவாக்கின. ஐக்கிய ஐரோப்பிய பொருளாதாரக் கூட்டமைப்பு (European Economic Union) 1973இல் 9 நாடுகள் இணைந்து ஆரம்பித்த இந்தச் சந்தை விரிவாகி 2003இல் 15 நாடுகளை உள்ளடக்கி, 2004இல் 25 நாடுகள் சேர்ந்த ஒரு குழுமமாக இருக்கப்போகிறது. ஒரு நாட்டில் விளைவித்த, உருவாக்கிய பொருட்களை பொதுச்சந்தையின் மற்ற நாடுகளில் விற்பதற்கு எந்தத் தடையும் கிடையாது, தனி வரிகள் எதுவும் கிடையாது. இந்த நாடுகளுக்கிடையில் பொதுமக்கள் கடவுச்சீட்டு இல்லாமல் சுலபமாகப் போய் வர முடியும். ஒரு நாட்டைச் சேர்ந்தவர் குழுமத்தின் மற்ற நாடுகளில் தடைகள் ஏதுமின்றி வேலைக்குப் போக முடியும். இந்த நாடுகளுக்கிடையே குத்து-வெட்டுக் கொலை-பழி கிடையாது. அடுத்த நாட்டை அடுத்துக் கெடுக்க வேண்டும் என்ற எண்ணம் கிடையாது.

முதலில் பொதுச்சந்தையாகத் தொடங்கிய இந்தக் கூட்டமைப்பு பல வருடங்களுக்குப் பிறகே பொது நாணயம் (யூரோ) ஒன்றை உருவாக்கின. எல்லையில்லாத சந்தை என்பது ஒன்று, பொது நாணயம் என்பதோ மிகவும் வேறுபட்டதொன்று. பிந்தையதைச் செயல்படுத்த அத்தனை நாடுகளுக்கும் இடையே ஒரேமாதிரியான பொருளாதாரக் கொள்கை வேண்டும். வங்கியின் சேமிப்பு வட்டி விகிதம் எல்லா நாடுகளிலும் சமமாக இருக்க வேண்டும். இல்லாவிட்டால் குறைந்த வட்டி உள்ள நாட்டில் கடன் வாங்கி, அதிக வட்டியுள்ள நாட்டில் அதை வங்கியில் சேமித்து வெறும் காற்றில் முழம் பூ அளக்கலாம். பண வீக்கம் கிட்டத்தட்ட ஒரே மாதிரி இருக்க வேண்டும் எல்லா நாடுகளிலும். அத்தனை நாடுகளுக்கும் சேர்த்து பணம் அச்சடிக்க ஓர் இடத்தைத் தேர்ந்தெடுக்க வேண்டும். ஒவ்வொரு நாட்டின் மைய வங்கியும் (இந்தியாவில் ரிசர்வ் வங்கி போன்றது) தங்களது பணக்கொள்கையை தங்கள் இஷ்டத்திற்கு வைத்துக் கொள்ள முடியாது.

சார்க் நாடுகள் என்பன இந்தியா, பாகிஸ்தான், வங்கதேசம், இலங்கை, நேபாள், பூடான் மற்றும் மாலத்தீவுகள் அடங்கியது. இதில் முதல் மூன்றுதான் அளவிலும், மக்கள் தொகையிலும் ஒப்பிடக் கூடியவை. இந்த மூன்று நாடுகளிடையே முதலில் மருந்துக்குக் கூட ஒற்றுமை கிடையாது. அதனினும் மேலாக ஒருவரை ஒருவர் ஒழித்துக் கட்ட வேண்டும் என்ற ஆசை உள்ளூர இருப்பது போலத் தெரிகிறது. பாகிஸ்தான் கள்ள நோட்டு அடித்து இந்தியாவில் புழங்க விடுகிறது என்று இந்தியா நேரம் கிடைக்கும் போதெல்லாம் குற்றம் சாட்டிக் கொண்டேயிருக்கிறது. பொது நாணயம் வந்துவிட்டால் அடுத்த நாட்டைக் கெடுக்க இப்படிக் கள்ள நோட்டு அடிப்பது சுலபமாகிப் போய்விடும்.

முதலில் தேவை அமைதியும், நாடுகளுக்கிடையேயான பரஸ்பர நம்பிக்கையும். எல்லையில்லா பொதுச்சந்தைப் உருவாக்கிக் கொள்வதில் தவறில்லை. தடாலடியாகப் பொது-நாணயம் என்று குதிக்க வேண்டிய அவசியமில்லை. சார்க் நாடுகள் முதிர்ச்சி அடையாத புது நாடுகள் (நமக்கு வயது வெறும் ஐம்பதுகளில்). பொது-நாணயத்தை நடைமுறைப்படுத்தக் கூடிய திறன் நம்மிடையே இல்லை. அது குறித்த ஆரோக்கியமான சிந்தனை கூட நம்மிடைய இல்லை. எனவே ஆகவேண்டிய காரியங்களை முதலில் பார்ப்பது நல்லது. அவையாவன:
  1. நாடுகளுக்கிடையேயான எல்லைப் பிரச்சினைகளைத் தீர்ப்பது
  2. பக்கத்து நாடுகளுக்குத் தேவையான பண உதவியை மான்யங்கள் மூலம் அளிப்பது
  3. உயர் கல்வி வளர்ச்சிக்காக நாடுகளுக்கிடையே மாணவர்கள் பரஸ்பர மாற்றம், ஒரு நாட்டின் மாணவர்கள் அடுத்த நாட்டில் படிக்க எந்தத் தடையும் இல்லாமை
  4. கடவுச்சீட்டு இல்லாப் பயண அனுமதி
  5. ஒரு நாட்டவர் அடுத்த நாட்டில் வேலை பார்க்கத் தடையின்மை (ஆமாம், இங்கே பீஹாருக்கும், அஸ்ஸாமுக்கும் இடையேயே தகராறு... அந்த பிரச்சினையைத் தீருங்கள் பிரதமரே!)
  6. ஒரு நாட்டவர் அடுத்த நாட்டில் தொழில் தொடங்கத் தடையின்மை
  7. எல்லையில்லா, தனி-வரிகளில்லா வர்த்தகம்

இவற்றை சரியாக நடைமுறைப்படுத்த நமக்கு இன்னமும் 30 வருடங்கள் ஆகலாம். அதன் பின்னர் பொது-நாணயத்தைப் பற்றிப் பேசுவோம்.

Saturday, December 13, 2003

வெங்கட்டின் மின்புத்தகங்கள் பற்றிய கட்டுரை

நேற்றைய செய்தியாக சாரு நிவேதிதாவின் மார்தட்டல் ("இந்திய மொழிகளிலேயே முதன் முதல் மின்-நாவல் என்னதுதான்!") பற்றிய உண்மையின்மையைப் பார்த்தோம். விருப்பம் இருப்பவர்கள் சாருவின் கோணல் பக்கங்கள் தளத்தில் அவரது மின்புத்தக முயற்சியைப் பற்றியும், அதில் அவர் பட்ட தொல்லைகளையும், ஒரு கூட்டமே அவருக்கு உதவியதையும் பற்றி எழுதியுள்ளார். அப்படி உழைத்தவர்களைக் கொச்சைப் படுத்துவது என் நோக்கமில்லை. ஆனால் இந்த "முதலாவது" என்கிற பீலா வேண்டாமே? மேலும் PDF கோப்பு ஆக்க இவ்வளவு கஷ்டப்பட வேண்டாம். ஓப்பன் ஆஃபீஸ் என்றொரு மென்பொருள் - இலவசமாகக் கிடைக்கிறது. அதில் ஒழுங்காக TSCII அல்லது யூனிகோடு எழுத்துரு கொண்டு அடித்து, சேமிக்கும் போது PDF ஆக சேமிக்கலாம். சாருவுக்கு உதவி செய்ததாகக் குறிப்பிடப்பட்ட பெங்களூர் அரவிந்தனுக்கு நானே ஓப்பன் ஆஃபீஸ் மென்பொருளைக் கொடுத்திருக்கிறேன். மேலும் தமிழில் சொற்பிழை களைய, ஒற்றுப்பிழை களைய மென்பொருள்கள் உள்ளன. அதனால் திரு சாரு நிவேதிதா ஒன்றும் இல்லாததை ஊதிப் பெரிது பண்ண வேண்டாமே?

பல விவரங்களுடன் வெங்கட் தனது வலைப்பதிவில் இப்பொழுது இருக்கும் எவையுமே நியாயமாக மின்புத்தகங்கள் என்ற அடைமொழியினைத் தாங்கி வர முடியாதது என்கிறார். வெறும் PDF கோப்புகளோ, HTML கோப்புகளோ (கடவுச்சொல்லுடனோ, இல்லாமலோ) மின்புத்தகங்கள் ஆகிவிட முடியாதென்கிறார். ஓப்பன் ஈபுக் தளத்தில் ஒரு மின்புத்தகம் எப்படி இருக்க வேண்டும் என்பதற்கான ஒரு வரைமுறையினைக் கொடுத்துள்ளார்கள்.

Friday, December 12, 2003

ஸீரோ நேர்மை

இன்று காலை தினமலரில் ஒரு செய்தி வந்திருந்தது. விளம்பரம், செய்தியாக வந்துள்ளது.

"இந்திய மொழிகளிலேயே முதன் முறையாக தமிழில் 'மின்-நாவல்' படைக்கப்பட்டுள்ளது. இன்டர்நெட்டில் டவுன்லோடு செய்து இந்த நாவலை முழுமையாகப் படிக்கலாம்.

பிரபல எழுத்தாளர் சாரு நிவேதிதா புதுமை முயற்சியாக 'ஸீரோ டிகிரி' என்ற இந்த மின்-நாவலை (இ-நாவல்) எழுதியுள்ளார். இன்டர்நெட்டில் http://shopping.chennaionline.com/zerodegree என்ற வெப்சைட் முகவரிக்கு போனால் 'கிளிக் டு பை தி புக்' என்று வரும். அங்கு 'கிளிக்' செய்தால் பெயர் மற்றும் வங்கி கார்டு எண் கேட்கும். அந்த விவரங்களை தந்த பிறகு முழு நாவலையும் டவுன் லோடு செய்து படிக்கலாம்.

இந்த தமிழ் நாவல் தான் இந்திய மொழிகளிலேயே படைக்கப்பட்டுள்ள முதலாவது 'மின்-நாவல்' ஆகும்.

இந்த மின்-நாவல் சென்னையில் நேற்று முன்தினம் துவக்கி வைக்கப் பட்டது."
முதலில் படித்தபோது 'என்னடா, இப்படிக் கதையடிக்கிறார்கள்' என்றுதான் தோன்றியது. நான் போன மாதம்தான் சுலேகா, தமிழோவியம் எல்லாம் போய் மின்-புத்தகமெல்லாம் வாங்கிவிட்டு அதைப்பற்றி வலைப்பதிவிலும் (1, 2), ராயர்காபிகிளப்பிலும் எழுதினேன், இதென்ன கரடி விடுகிறார்கள் இங்கே? 'உலகத் தொலைக்காட்சிகளில் முதன்முறையாக' என்று சன் டிவியில் வருமே (பின்னே கஸக்ஸ்தான் டிவிலயா கேவலமான தமிழ்ப்படத்த போடப்போறான்?) அதுமாதிரி இந்திய மொழிகளிலேயே முதன் முறையாக என்று ஆரம்பிக்கும்போதே ஒரு மாதிரி நெளிய வைத்தது. அதன் பிறகு சிந்தித்ததில், 'மின்-நாவல்' என்ற சொல் கண்ணில் பட்டது. சுலேகா, தமிழோவியம் ஆகியவிடங்களில் எல்லாம் சிறுகதைத் தொகுப்பு, அல்லது கட்டுரைகள் தான் இருந்தன, நாவல் இல்லை. ஒருவேளை அதைக் காரணம் காட்டி இந்தக் "கதையை" விடுகிறார்களா? என்றால் கொஞ்சம் தேடியதில் முழுப் பொன்னியின் செல்வனும் 'ஈ-புக்'காக வந்துள்ளது. என்னிடம் டிஸ்கியில் முழுப் பொ.செ மைக்ரோசாஃப்ட் வோர்டில் உள்ளது. எந்தப் புண்ணியவான் செய்தாரோ, தெரியாது, ஆனால் நிச்சயம் 'ஸீரோ டிகிரி' முதல் மின்-நாவல் கிடையாது.

தமிழோவியத்தில் பல நாட்களாகவே மூன்று நாவல்கள் மின்-புத்தகங்களாக வரப்போகின்றனவென்று சொல்லியிருக்கிறார்கள்.

மற்றபடி தமிழ் மின்-நூல்கள் என்றால் கவிதாசரண் பழைய இதழ்கள் எல்லாம் PDF கோப்புகளாகப் பல நாள்களாகக் கிடைத்த வண்ணம் உள்ளன. தீம்தரிகிட வும் இப்படி சந்தாதாரர்களுக்குக் கிடைக்கிறது என்று தகவல். நண்பர் பாரா அவரிடம் ஒரு தென்னமெரிக்கக்காரர் எழுதிய நாவலின் தமிழ் மொழியாக்கம் மின் வடிவில் இருக்கிறது, நாகூர் ரூமி கொடுத்தார் என்று சொன்னார் (எனக்கு இன்னமும் ஒரு பதிவு தரவில்லை).

ஆக, சாருவுக்கு எதற்கிந்த "இந்திய மொழிகளிலேயே முதலாவது" பட்டமெல்லாம்? ஏன் தினமலர் இந்த நேர்மை-தவறுதலுக்குத் துணை போகிறது?

பிற்சேர்க்கை: மின்-நூல்களாக கல்கியின் பொன்னியின் செல்வன் மற்றும் சிவகாமியின் சபதம், மதுரைத் திட்டத்தில் இலவசமாகக் கிடைக்கின்றன.

பொன்னியின் செல்வன்: பாகம் 1, அத்தியாயங்கள் 1-30, 31-57 | பாகம் 2, அத்தியாயங்கள் 1-26, 27-53 | பாகம் 3, அத்தியாயங்கள் 1-23, 24-46 | பாகம் 4, அத்தியாயங்கள் 1-23, 24-46 | பாகம் 5, அத்தியாயங்கள் 1-25, 26-50, 51-75, 76-91
சிவகாமியின் சபதம்: பாகம் 1 | பாகம் 2 | பாகம் 3

ஏர் இந்தியா விமானப் பணிபெண்கள் ஓய்வுபெறும் வயது

ஏர் இந்தியா விமானப் பணிப்பெண்களின் உச்ச வயது வரம்பு 50 என்று ஏர் இந்தியா நிர்வாகம் முடிவு செய்திருந்தது. ஆண் பணியாளர்கள் 58 வயது வரை வேலை செய்யலாம் என்றும் இருந்தது. இதனை எதிர்த்து ஏர் இந்தியாவின் பெண் ஊழியர்கள் வழக்கு தொடுத்து மும்பை உயர்நீதி மன்றத்தில் வென்றனர். விடாது ஏர் இந்தியா நிர்வாகம் உச்ச நீதிமன்றத்தில் வழக்கு தொடுத்து வென்றது. இதைப் பற்றி திண்ணையில் ஒரு கட்டுரை எழுதியிருந்தேன். அதன் வலைப்பதிவு இங்கே.

இப்பொழுது விமானப் போக்குவரத்து அமைச்சகம் பணிப்பெண்கள் 58 வயது வரை வேலை செய்யலாம் என்று ஏர் இந்தியாவிற்கு உத்தரவு இட்டுள்ளது. அது மட்டுமல்லாமல் இடைப்பட்ட காலத்தில் வேலையிலிருந்து (50 வயதில்) ஓய்வு பெற்ற பெண்களையும் மீண்டும் வேலைக்கு சேர்த்துக் கொள்ளவும் ஆணை பிறப்பிக்கப்பட்டுள்ளதாம்.

ஏதோ, நாள் கடந்தாலும் நீதி நிலைநாட்டப்பட்டிருப்பது மகிழ்ச்சியளிக்கக் கூடியது. அதுவும் இந்த நீதி, உச்ச நீதிமன்றத்தாலேயே கைவிடப்பட்ட பின்னர் அரசாங்கத்தால் அளிக்கப்பட்டிருப்பது இன்னமும் மகிழ்ச்சியளிக்கக் கூடியது.

Thursday, December 11, 2003

GSM vs CDMA செல்பேசிகள்

ஏப்ரல் 2002 இல் 6,714,753 இலிருந்து, டிசம்பர் 2002 இல் 10,480,430, பின்னர் அக்டோபர் 2003இல் 24,342,557 என்று செல்பேசிகள் 18 மாதங்களில் கிட்டத்தட்ட 4 மடங்காக அதிகரித்துள்ளது. தற்போது இந்தியாவில் GSM மற்றும் CDMA முறைகளில் செல்பேசிச் சேவை அளிக்கப்படுகிறது. அக்டோபர் 2003இல் 19,352,557 GSM செல்பேசிகளும், 4,990,000 CDMA செல்பேசிகளும் புழக்கத்தில் இருந்தன. இந்த CDMA செல்பேசிகள் அனைத்தும் கடந்த பத்து மாதங்களில் விற்பனையானவையே.

மாதத்திற்குக் கிட்டத்தட்ட 1 மில்லியன் GSM செல்பேசி இணைப்புகள் விற்கப்படுகின்றன. இதைவிட சற்றே குறைவாக CDMA இணைப்புகள் விற்கப்படுகின்றன. இந்த நிலையில் 2004 முடிவில் கிட்டத்தட்ட 40 மில்லியன் செல்பேசிகள் இந்தியாவில் இருக்கும்.

இதனாலெல்லாம் இந்தியா செல்பேசித் துறையில் மிகவும் முன்னணியில் இருப்பதாக எண்ண வேண்டாம். கால தாமதமாக நடக்கும் துரித விற்பனையே இவை. GSM செல்பேசிகளை எடுத்துக் கொண்டால் மிகவும் அரதப் பழசான தொழில்நுட்பமே இந்தியாவில் செயல்படுத்தப்பட்டுள்ளது. அதிகமாக வாங்கப்படும் செல்பேசிக் கைக்கருவிகளும் மிகவும் குறைந்த விலையானவையே (ரூ. 2000-4000). ஒரு சிலர் மட்டும் ரூ. 30,000 வரை செலவுசெய்து நவீனக் கைக்கருவியினை வாங்குகின்றனர். வாங்கியும் ஒரு பிரயோசனமுமில்லை. இந்திய GSM சேவை நிறுவனங்கள் மற்ற வளர்ச்சியுற்ற நாடுகளைப் போல 3G என்றெல்லாம் பேசுவதில்லை. இவர்களது நெட்வொர்க்கில் குறுஞ்செய்திச் சேவையே (Short messaging service - SMS) ததிங்கிணத்தோம் போடுகிறது. அதற்கான SMSC எனப்படும் கணினியால் ஒரு நிமிடத்திற்கு குறைவான குறுஞ்செய்திகளை அனுப்ப முடியும் என்ற நிலை உள்ளது. சில நிறுவனங்கள் GPRS என்னும் தொழில்நுட்பம் மூலம் இணையச் சேவையை அளிக்க முன்வந்துள்ளனர். ஆனால் அவை தரம் குறைவானதாகவே உள்ளன.

இதே நேரத்தில் ரிலையன்ஸ் CDMA செல்பேசி நிறுவனத்தார் வழங்கும் தொடக்கநிலைக் கைக்கருவிகளே நல்ல வேகத்தில் இணைய இணைப்பை வழங்குகின்றன. இவற்றை வாங்க செலவும் அதிகமில்லை. வெறும் ரூ. 501 பணம் செலுத்தினால் போதும். மீதியெல்லாம் மாதம் சிறிதாகக் கட்டிக் கொள்ளலாம். இந்த செல்பேசியின் மூலம் மடிக்கணினியானாலும் சரி, மேசைக்கணினியானாலும் சரி, USB அல்லது serial port இல் மூலம் இணைப்பைப் பெறலாம் (இணைப்பான் ரூ. 1,200). லினக்ஸில் serial port உள்ள இணைப்பான் மட்டும்தான் வேலை செய்கிறது. நான் இந்த இணைப்புடன் ஓடும் காரில் பயணம் செய்திருக்கிறேன், அப்பொழுதும் இணைப்பு தொடர்ந்திருக்கிறது. இந்த இணைப்பின் மூலம்தான் ஆகஸ்டு 2003 இல், சென்னையில் நடந்த தமிழ் இணைய மாநாட்டினை அதற்கெனப் பிரத்தியேகமாக உருவாக்கிய வலைப்பதிவில் வெளியிட்டேன்.

இந்த இணைப்பு 115.6 kbps வேகத்தில் பிட்கள் வருவதாகக் கூறுகிறது. ஆனால் நிகழ்வில் அதிகபட்சமாக 60-70 kbps வரை தொடுகிறது. சராசரியாக 20-30 kbps கிடைக்கலாம். ஒரு நிமிடத்திற்கு 40 காசுகள் கட்டணம் (இணையம் + தொலைபேசிக் கட்டணம் இரண்டும் சேர்ந்து). என்னைப் போன்ற ஊர்சுற்றிகளுக்கு இது ஒரு வரப்பிரசாதம்.

டி.ஆர்.பாலுவுக்கு ஒரு மின்னஞ்சல்

இன்று நான் தென்-சென்னை உறுப்பினர் டி.ஆர்.பாலுவுக்கும், மேஜர் ஜெனரல் (ஓய்வுபெற்ற) பி.சி.கந்தூரி, மத்திய அமைச்சர், பிரதமர் வாஜ்பாயி ஆகியோருக்கு சத்யேந்திர துபே கொலை பற்றி அனுப்பிய மின்னஞ்சல். நீங்களும் உங்கள் பாராளுமன்ற உறுப்பினர்களுக்கு ஒரு மின்னஞ்சல் அனுப்பலாமே? உங்கள் பாராளுமன்ற உறுப்பினர்களது மின்னஞ்சல் முகவரி இங்கு கிடைக்கும்.

To: TR Baalu <mef@menf.delhi.nic.in>
Subject: On Mr. Satyendra Dubey's murder
Cc: Maj. Gen. BC Khanduri <khanduri@sansad.nic.in>, AB Vajpayee <vajpayee@sansad.nic.in>

Dear Mr. TR Baalu, MP, Chennai South,

I am a resident of late Mr. Maran's constituency, and since he is no more I am writing to you in the hope that you will take this matter up in the Parliament.

This is regarding the death of Satyendra Dubey, a project manager who was working in the Prime Minister's Golden Quadrilateral project.

I am sure you are aware of the details of Mr. Dubey's death and a CBI investigation is on. My questions are as follows:

1. What actions are being taken by the Prime Minister in instituting a departmental inquiry in PMO as to why the name of Satyendra Dubey was leaked to various government officials, despite Mr. Dubey not wanting his name publicised - eventually resulting in his murder?

2. Whistleblower protection bill or Public Interest Disclosure (Protection of Informers) Bill: See news item in Indian Express dated 10th December 2003. I request you to take special interest in voting for the bill and also muster sufficient support in passing this bill during the current parliamentary session.

Let there not be any more murders of honest officers working for the Government and public.

Thank you.

Badri Seshadri
My full Address

CC: Maj. Gen. BC Khanduri, Union Minister of Road Transport & Highways
AB Vajpayee, Prime Minister

சத்யேந்திர துபே பற்றி

இந்திய தேசிய நெடுஞ்சாலைகள் வாரியத்தின் (National Highways Authority of India - NHAI) தங்க நாற்கோணத் திட்டத்தில் பணியாற்றிய சத்யேந்திர துபே ஊழல் பெருச்சாளிகளை இனங்காட்டியதற்காகக் கொலை செய்யப்பட்டார். அது பற்றி நான் எழுதிய வலைப்பதிவில் இந்தத் திட்டம் பற்றி ஓர் இணையதளம் வேண்டும் என்று சொல்லியிருந்தேன். அப்படி ஒரு தளம் உள்ளது.

இந்தத் தளத்தில் தேவையான பல தகவல்கள் உள்ளன. ஆனால் நான் விரும்புவது இதற்கும் மேலான பல தகவல்கள். உதாரணமாக முகப்புப் பக்கத்தில் இருக்கும் "Latest Updates" பொத்தானை அழுத்துங்கள். அங்கு 31 அக்டோபர் 2003 வரையில் முடிக்கப்பட்டிருக்க வேண்டிய வேலைகளில் 286 கி.மீ சாலைகள் போடப்படவில்லை. 16 ஒப்பந்தங்கள் ஆகச் சரியாக நடைமுறைப்படுத்தப்படவில்லை.

ஆனால் யார் இந்தக் "குற்றவாளிகள்"? எவ்விடங்களில் இந்தச் சாலைகள் போடப்படவில்லை என்ற தகவல் இல்லை. படங்களாக எந்த எந்த இடங்களிலெல்லாம் சாலைகள் போடப்பட உள்ளன, எவ்வளவு தூரம் அவைகள் போடப்பட்டுள்ளன? எந்த ஒப்பந்தக் காரர்கள் சரியாக வேலைகளைச் செய்யவில்லை ஆகிய தகவல்கள் இல்லை. எவர் சரியாகச் செய்கிறார் என்ற தகவலும் இல்லை. தங்க நாற்கோணத் திட்டத்தில் ஈடுபட்டுள்ள அத்தனை ஒப்பந்தக் காரர்களின் தகவல்களும் இந்தத் தளத்திலேயே உள்ளது. எனவே அடுத்த நிலையாக எந்த ஒப்பந்தங்கள் மீறப்பட்டுள்ளன என்ற தகவலும் இங்கு கொடுக்கப்பட வேண்டும்.

இதுவரை ஒப்பந்தக் காரர்களிடம் கொடுக்கப்பட்டுள்ள ஒப்பந்தங்கள் 93. இதில் 16 ஒப்பந்தங்கள் பின்னடைவில் இருக்கின்றன என்றால் ஆறு ஒப்பந்தங்களில் ஒன்று பின்னடைவில் இருக்கிறது என்று பொருள்.

இப்படிச் செயல்படும் ஒப்பந்தங்கள் பலவற்றுள் ஊழல் இருப்பதாகச் சொல்லியிருக்கிறார் துபே. கொலைகாரர்களுக்குச் தெரிந்து விட்ட இந்தக் கடிதத்தில் உள்ள தகவல்கள் பல செய்தித்தாள்கள் மற்றும் பிற ஊடகங்களுக்கும் தெரிந்திருக்கும். இந்த ஊழல் ஆசாமிகள் யார் என்று ஏன் இந்த ஊடகங்கள் தகவலை வெளியே சொல்லவில்லை?

===

பிரதமர் வாஜ்பாயி நேற்றைக்கு முந்தைய தினம் துபே கொலை பற்றிப் பேசியுள்ளார். "குற்றவாளிகளை தப்பித்துப் போக விட மாட்டோம்" என்கிறார். "நேர்மையான சிந்தனை உடைய மற்ற இந்தியர்களைப் போல நானும், ஒரு நேர்மையான அதிகாரி சத்யேந்திர துபேயின் மரணத்தைக் கேள்விப்பட்டு அதிர்ச்சியும், வேதனையும் அடைந்தேன்." என்றும் "[இந்த தங்க நாற்கோணத் திட்டப் பணியில்] ஈடுபட்டிருக்கிறவர்கள் பயமின்றி இந்தத் திட்டத்தை முடித்துத் தர என் அரசு உறுதி அளிக்கிறது" என்று சொல்லியிருக்கிறார். நம்புவோம்.

ஆனால் தனது அலுவலகத்தில் வேலை செய்யும் சுரணையற்ற அதிகாரிகளை எப்படி ஒழுங்கு செய்யப்போகிறார் பிரதமர். அவரது அலுவலகத்தாரால்தானே துபேயின் பெயர் வெளியானது? அதைப்பற்றி பிரதமரின் வாயில் இருந்து ஒரு வார்த்தையையும் காணோம். வெட்கக்கேடு!

===

நேற்று மும்பையில் 'சத்யேந்திர துபேயின் மரணம் விழலுக்கிறைத்த நீரா?' என்ற தலைப்பில் Indian Merchants Chamber ஒரு கூட்டத்தை ஏற்பாடு செய்திருந்தது. IMC ரூ. 25 லட்சம் பணத்தை நேர்மையான அரசு அதிகாரிகளுக்குப் பரிசாக அறிவித்திருக்கிறது.

இதுபோன்ற கூட்டங்களும், பரிசு அறிவிப்புகளும் எல்லா நகரங்களிலும் நடக்க வேண்டும்.

===

அமெரிக்காவில் இருக்கும் ஐஐடியில் படித்த மாணவர்கள் சத்யேந்திர துபேயின் பெயரில் ஒரு அறக்கட்டளை ஆரம்பித்துள்ளனர்.

Tuesday, December 09, 2003

நடிகை மும்தாஜ் அவதூறு வழக்கு

தினமலரில் பக்கங்களைப் புரட்டிக் கொண்டிருக்கையில் திடீரெனக் கண்ணில் பட்டது "நடிகை மும்தாஜுக்கு மூன்று சினிமாப் பத்திரிக்கைகள் நஷ்ட ஈடு தரவேண்டும்" என்ற நீதிமன்றத் தீர்ப்பு. இந்த சுட்டி தினமலர் ஆன்லைனில் இல்லை. 'தி ஹிந்து'வில் முழுத் தகவல்கள் வெளியே வரவில்லை. தினமணியிலும் முழுத் தகவல்கள் வெளியே வரவில்லை.

ரோஜா, சினி லவ், சினித் திரை என்னும் இந்த [மஞ்சள்] பத்திரிக்கைகள் மும்தாஜ் குடித்துவிட்டு படப்பிடிப்புக்கு வருவதோடு மட்டுமல்லாமல், மும்தாஜுக்கு அவரது மேனேஜரின் மனைவியோடு "ஒருபால் தொடர்பு" இருக்கிறது என்றும் எழுதினவாம்.

சென்னை உயர்நீதிமன்ற நீதிபதி ரூ. 11 லட்சம் நஷ்ட ஈடு தரச்சொல்லியுள்ளார். இந்தியாவில் அவதூறு வழக்குகள் இவ்வளவு சீக்கிரத்தில் தீர்ப்பாகும் என்று நம்ப ஆச்சரியமாக உள்ளது. இங்கிலாந்தில் இதுபோன்ற அவதூறு வழக்குகள் மிகவும் பரபரப்பாக வெகுஜனப் பத்திரிக்கைகளால் பேசப்படும். ஆனாலும் முடிவென்னவோ சொதப்பலாக இருக்கும். சில நேரங்களில் அவதூறினால் பாதிக்கப்பட்டவர் பண நஷ்டம் அடைந்துள்ளார் என்று நிரூபிப்பது கடினமாக இருக்கும். மனத் தொல்லைகளுக்கு ஆளானார் என்றால் அதற்கு எத்தனை நஷ்ட ஈடு கொடுப்பது என்று நிர்ணயம் செய்வதும் கடினம்.

மேற்சொன்ன வழக்கில் நஷ்ட ஈட்டுத் தொகை 'ல'கரத்தில் இருப்பது மிகவும் வரவேற்கக் கூடியது. இனியும் மஞ்சள் பத்திரிக்கைகளோ, மற்ற பத்திரிக்கைகளோ, தேவையில்லாமல் பிறரது தனிவாழ்க்கையை மையமாக வைத்து, அசிங்கமான அவதூறு செய்யாமல் இருக்கும்.

'தி ஹிந்து' உரிமை மீறல் வழக்கு

'தி ஹிந்து' உரிமை மீறல் வழக்கு ஐந்து நீதிபதிகள் அடங்கிய அரசியல் நிர்ணயச் சட்ட பெஞ்சுக்கு அனுப்பப் பட்டுள்ளது. தமிழக சட்டமன்றத்துக்காக ஆஜரான வக்கீல், "சட்டமன்றம் குற்றம் சாட்டப்பட்ட பத்திரிக்கையாளர்களிடமிருந்து 'மன்னிப்பு' கூடத் தேவையில்லை, அவர்கள் சட்டமன்றத்தின் உயர்வையும், பெருமையையும் ஒப்புக்கொண்டாலே போதும்" என்று இறங்கி வந்திருக்கிறார். அதற்கு நீதிபதிகள் "நீங்கள் இவற்றை நீதிமன்றத்துக்கு வெளியே பேசித் தீர்த்துக் கொள்ளுங்கள். இதற்கு முன்னரேயே சட்டமன்றத்தின் அதிகாரம் பற்றிய கேள்விகள் நீதிமன்றத்துக்கு வந்திருந்தன. ஆனால் அப்பொழுது தீர்ப்பாகாமல் வெறும் புத்தகக்-கேள்வியாக மட்டுமே இருந்து விட்டது. இந்தமுறை அப்படி விட்டுவிட நாங்கள் எண்ணவில்லை. இதற்கு ஒரு தீர்வு கண்டே ஆக வேண்டும்." என்று சொல்லியுள்ளனர். இது மிகவும் வரவேற்கத்தக்கது.

சட்டமன்றங்கள் உரிமை மீறல் என்ற பெயரில் அநியாயம் செய்வது, பின்னர் சட்டமன்றம் எல்லாவற்றுக்கும் மேலானது என்று சொல்லிக் கொண்டு அலைவது, பாதிக்கப்பட்டவர் நீதிமன்றத்துக்கு செல்லும்போது பின்வாங்கி "மன்னிப்பு எல்லாம் வேண்டாம், ஆனால் நான் உசத்தி என்று ஒத்துக்கொள், விட்டுவிடுகிறேன் என்று ஜகா வாங்குவது", பின்னர் மீண்டும், 'பழைய குருடி, கதவைத் திறடி' என்று வரம்பு மீறித் தன் அதிகாரத்தைப் பயன்படுத்துவது என்ற கதையாகவே உள்ளது. இப்பொழுது ஒரேயடியாக இந்த வழக்கைத் தீர்க்க வேண்டும்.

இந்த வழக்கு விசாரணை சுவாரசியமானதாக இருக்கும் என்று தோன்றுகிறது. ஒரு பக்கத்தில் 'தி ஹிந்து'வுக்காக ஹரீஷ் சால்வே, தமிழக ஊடகங்களுக்காக ப.சிதம்பரம் என்று கனமான ஆசாமிகள் வாதாடப் போகிறார்கள். முரசொலிக்காக கபில் சிபால் வாதாடுகிறார் என்று நினைக்கிறேன், ஞாபகமில்லை. தமிழக சட்டமன்றத்துக்காக யார் வாதாடப் போகிறார்? என்னைக்கேட்டால் தமிழக அவைத்தலைவர் காளிமுத்துவே நேரில் வந்து வாதாட வேண்டும். அவர் கூட பி.எச்.பாண்டியன் பக்கத்தில் துணையாக நிற்கலாம்.

சரவணபவன் ஓட்டல் அதிபர் ராஜகோபால் மாட்டிக்கொண்டிருக்கும் ஒரு வழக்கின் விசாரணை அப்படியே வரிவிடாமல் தினமலரில் வந்து கொண்டிருக்கிறது. அதுபோல மேற்சொன்ன சட்டமன்ற உரிமைப் பிரச்சினை வழக்கின் transcript கிடைத்தால் நன்றாக இருக்கும்.

Monday, December 08, 2003

சத்யேந்திர துபேயின் கொலை

இந்தியன் எக்ஸ்பிரஸ் இதைப்பற்றி எழுதிய பிறகு நீங்கள் இந்த செய்தியைப் பற்றி கேள்விப்படாமல் இருந்திருக்க முடியாது. முதலில் கல்கத்தாவிலிருந்து வெளியாகும் தி டெலிகிராஃப் செய்தித்தாள்தான் இதைப்பற்றி சம்பவம் நடந்த அன்றே எழுதியது.

சத்யேந்திர துபே என்னும் ஐஐடி கான்பூரில் படித்தவர், பிரதமர் வாஜ்பாயியின் தங்க நாற்கோண சாலை அமைக்கும் திட்டத்தில் ஒரு திட்ட நிர்வாகியாக இருந்திருக்கிறார். இந்தத் திட்டம் நாட்டிற்கு மிக முக்கியமான திட்டம் என்பதில் சிறிதளவும் ஐயமில்லை. நாட்டின் நான்கு மூலைகளையும் இணைக்கும் சாலைகள், அதிலிருந்து கிளை பிரிந்து பக்கத்தில் உள்ள இடங்களையெல்லாம் இணைக்கும் சாலைகள் என்று திட்டம். இந்த வேலைகளைச் செய்வதற்காக நடந்தேறிய ஒப்பந்தங்களில் ஊழல் நடந்துள்ளதைக் கண்டுபிடித்து அதனை ஒரு கடிதத்தில் பிரதமருக்கு எழுதி அனுப்பியுள்ளார் துபே. அதே சமயம் சட்டத்திற்கெல்லாம் அப்பாற்பட்ட, கொலைவெறி கூத்தாடும் பீஹாரில் இருப்பதால் தன் பெயரை வெளியிட வேண்டாமென்றும், அது தன் உயிருக்கே ஆபத்தாய் முடியும் என்றும் வேண்டுகோளும் விடுத்துள்ளார் துபே. பிரதமரது அலுவலகத்திலிருந்து ஒரு வருடத்தில் இந்தக் கடிதம் பல அலுவலகங்களுக்குப் பயணித்து (துபேயின் முழுப்பெயருடன்) கடைசியாக எதிரிகளின் கையில் போய்ச் சேர்ந்து, 27 நவம்பர் 2003 அன்று துபே அடையாளம் தெரியாத மனிதர்களால் புத்தர் பூமியான கயாவில் சுட்டுக் கொல்லப்பட்டிருக்கிறார்.

பீஹார் அரசாங்கம் இந்த வழக்கின் விசாரணையை சிபிஐ இடம் ஒப்படைத்துள்ளது.

இந்த விசாரணையில் ஒன்றும் உருப்படியாக நிகழப்போவதில்லை. கொலைகாரர்கள் கண்டுபிடிக்கப் படாமலிருக்கலாம். கண்டுபிடிக்கப்பட்டாலும் தண்டனை என்னவாகும் என்று தெரியவில்லை.

ஆனால் வேறு சில காரியங்கள் நிகழ வாய்ப்புள்ளது. பிரதமர் வாஜ்பாயி இந்த இளைஞர் இறந்ததற்கு முழுப்பொறுப்பு ஏற்க வேண்டும். இவரது அலுவலகமும், அதில் வேலை செய்யும் சுரணையற்ற ஐஏஎஸ் அதிகாரிகளும்தான் இதற்குக் காரணம். துபே அடையாளம் காட்டிய அத்தனை ஊழல் ஒப்பந்தக்காரர்களின் மேலும் வழக்குகள் பதிவு செய்யப்பட்டு நடவடிக்கை எடுக்க வேண்டும். இந்தத் தங்க நாற்கோணத் திட்டத்தின் நிர்வாகிகளாக திறமையும், நேர்மையும் மிக்கவர்களை நியமிக்க வேண்டும். இந்தத் திட்டத்தின் முழு விவரங்களையும் அரசின் இனைய தளத்தில் ஏற்றி ஒவ்வொரு மாதமும் தளத்தை நிகழ்நிலைப் படுத்த வேண்டும். திட்டத்தின் ஒப்பந்தக்காரர்கள் அனைவரைப் பற்றிய முழு விவரமும் இணைய தளத்தில் இருக்க வேண்டும். இதில் ஒவ்வொரு ஒப்பந்தக்காரரும் என்ன செய்ய ஒப்புக்கொண்டுள்ளார், அதற்கு எத்தனை செலவாகும் என்று சொல்லியுள்ளார், எத்தனை நாட்களில் முடிப்பதாகச் சொல்லியுள்ளார், தற்போதைய நிலைமை என்ன, எத்தனை விழுக்காடு வேலை முடிந்துள்ளது ஆகிய அனைத்து விவரங்களும் அந்த இணைய தளத்தில் இருக்க வேண்டும். அந்தந்த இடங்களில் உள்ள மக்கள் இந்தத் தளத்தின் மூலம் நிகழ்நிலையைப் புரிந்து கொண்டு பொய்கள் ஏதேனும் இருப்பின் அதனை தளத்தின் feedback பகுதியில் புகார் கொடுக்குமாறு செய்ய வேண்டும்.

துபேயின் நினைவாக இந்த தங்க நாற்கோணத் திட்டத்தை நல்லமுறையில் செயல்படுத்திக் காட்ட வேண்டும். செய்வாரா பிரதமர்?

கணிதமேதை இராமானுஜம் சிலை திறப்பு

கும்பகோணத்தில் உள்ள சாஸ்த்ரா பல்கலைக்கழகத்தின், ஜெயேந்திரபுரி வளாகத்தில் கணித மேதை இராமானுஜத்தின் சிலை திறக்கப்படவுள்ளது. சிலையைத் திறக்க 20 டிசம்பர் 2003இல் குடியரசுத் தலைவர் அப்துல் கலாம் வருகிறார் என்று 7 டிசம்பர் 2003 தினமலர் சொல்கிறது.

இந்தப் பல்கலைக்கழகம் காஞ்சி சங்கர மடத்தால் நிறுவப்பட்டதா? தனித்தியங்கும் பல்கலைக்கழகமா? ஏற்கனவே இயங்கும் கல்லூரிகள் இந்தப் பல்கலைக்கழகத்துடன் ஏதேனும் தொடர்புள்ளவையா என்றெல்லாம் தெரியவில்லை.

Sunday, December 07, 2003

இரு வித்தியாசமான கூட்டங்கள்

நேற்று, சனிக்கிழமை, இரண்டு கூட்டங்களுக்கு எனது நண்பனுடன் சென்றிருந்தேன். ஒன்று லயோலா கல்லூரியில் அம்பேத்கார் நினைவாகவும், விடுதலை சிறுத்தைகள் கட்சியின் தலைவர் தொல்.திருமாவளவன் இந்தியா டுடே (தமிழ்) இதழில் எழுதிய கட்டுரைகளின் ஆங்கில மொழியாக்கம் புத்தகமாக வெளியிடுவதுவுமான விழா.

நான் சென்றபோது பேரா. கெயில் ஓம்வேத் பேசிக் கொண்டிருந்தார். அவரது ஆங்கிலப் பேச்சை மீனா கந்தசாமி என்னும் இளையர் அருகிலேயே நின்று தமிழில் மொழிபெயர்த்துக் கொண்டிருந்தார். மீனாதான் திருமாவளவனின் தமிழ்க் கட்டுரைகளை ஆங்கிலத்தில் மொழிபெயர்த்தவர். ஆனால் ஓம்வேதின் பேச்சை சரளமாகத் தமிழாக்கக் கடினமாக இருந்திருக்க வேண்டும். பெரிய அரங்கில் ஒலித்தொல்லை அதிகமாக இருந்தது. முதல் பல வரிசைகளில் அமர்ந்திருந்தவர்கள் பேச்சைக் கேட்டு உள்வாங்க வந்தவர்கள் போலில்லை. அதில் பலர் காங்கிரசின் வாசனது தொண்டர்கள் என்று தெள்ளத்தெளிவாகத் தெரிந்தது. வாசன் தன் தகப்பனாரைப் போற்றிப், பாராட்டிப் பேசிமுடித்து வெளியேறியவுடன் ஒரு கூட்டம் அவரோடே வெளியே போய்விட்டது. அரங்கில் குழுமியிருந்த பலரும் திருமாவளவன் பெயரும், அம்பேத்கார் பெயரும் வெளிப்பட்டபோது அதிர்ந்த கரகோஷம் எழுப்பினர். தலித் எழுச்சிக் கூட்டங்கள் வெறும் அரசியல் கூட்டங்களாகப் போய்விடக் கூடாது. புரியாமல் கைதட்டுவதும், தலைவர் ஒருவரைப் பெரிய ஆளாக்குவதும் மட்டும் போதாது.

வெளியே புத்தகங்கள் விற்பனை ஆகிக்கொண்டிருந்தன. அத்துடன் திருமாவளவன் பேச்சு ஒலிநாடாக்களும், அணிந்துகொள்ளும் பேட்ஜுகள் மற்றும் இதரபல ஸ்டிக்கர்கள், போஸ்டர்கள் விற்பனையாகிக் கொண்டிருந்தன. மற்றவை விற்பனை ஆனது போல புத்தகங்கள் அதிகமாக விற்பனை ஆனதாகத் தெரியவில்லை.

Talisman, Extreme Exmotions of Dalit Liberation, Thirumaavalavan, (Tr: Meena Kandasamy), 2003, Samya, an Imprint of Bhatkal and Sen, 16, Southern Avenue, Kolkata 700 026, Pages 185, Rs. 200

விடுதலை சிறுத்தைகள் போன்ற அரசியல் இயக்கங்கள் இந்தியா முழுக்கத் தேவை. தலித்துகளை ஒன்றிணைத்து, தமக்குள் வித்தியாசம் பாராட்டாது (திண்ணியமும் நிகழ்ந்திருக்கக் கூடாது, கரடிசித்தூரும் நிகழ்ந்திருக்கக் கூடாது), திமுக, அஇஅதிமுக கைகளிலும் மற்ற ஆதிக்க சாதிகளின் கைகளிலும் வெறும் பகடைக்காய்களாக மாறாது பலமிக்க குழுவாக இருந்தால்தான் சாதி வெறியையும் அழிக்கலாம், தங்களது பொருளாதார நிலையையும் உயர்த்தலாம்.

மேற்படி நிகழ்ச்சி பற்றிய 'தி ஹிந்து' செய்தி. மிகவும் சுருக்கமாக, சம்பந்தா சம்பந்தமில்லாமல் வந்துள்ளது, புகைப்ப்படம் எதுவும் கிடையாது. தினமலரில் செய்தியே கிடையாது. நேற்று பார்த்த தொலைக்காட்சி செய்திகளில் ஒரு துணுக்கையும் காணோம் என்ற ஞாபகம்.

===

சென்னை டி.டி.கே ரோட், டாக் மையத்தில் (Tag Centre, TTK Road), ஐந்தாவது ரமாமணி நினைவுப்பேச்சாக ஓய்வுபெற்ற ஆந்திர உயர் நீதி மன்ற நீதிபதி டி.என்.சி ரங்கராஜன் 'Corrupting the constitution' என்னும் தலைப்பில் பேசினார். நடுத்தர மற்றும் அதற்கும் மேற்பட்ட வர்க்க மக்கள் கூட்டத்தால் அரங்கு நிரம்பி வழிந்தது. செல்பேசிகளை அணைக்க மறந்த, விரும்பாத பலர் எழுப்பிய அசிங்கமான இரைச்சல்களுக்கு நடுவே ரங்கராஜன் பேச்சு தொடர்ந்தது.

அரசியல் நிர்ணயச் சட்டத்தில் ஊழல் என்பதல்ல தலைப்பு. Corruption is something that is deviating from the objective என்னும் பொருள்படவே தான் அந்தச் சொல்லைப் பயன்படுத்துவதாகவும், எவ்வாறு அரசியல் நிர்ணயச் சட்டம் நினைத்ததை மாற்றும் வகையில் டிரிபூனல்கள் (Tribunals) எனப்படும் தீர்ப்பாயங்கள் நீதிமன்றங்களுக்கு இணையாக உருவாக்கப்பட்டு அவைகளுக்கு மிக அதிகமான அதிகாரங்கள் வழங்கப்படுகின்றன என்று பேச்ச் தொடர்ந்தது. தீர்ப்பாயங்களின் தீர்ப்புகள் உச்ச நீதிமன்றத்தின் வரைமுறைக்குள்தான் வருகின்றன. தீர்ப்பாயத்தின் தீர்ப்புகள் பிடிக்காவிட்டால் உச்ச நீதிமன்றத்தின் முறையிடலாம். மாநில உயர் நீதிமன்றங்களிலும் முறையிடலாம் என்றும் நினைக்கிறேன். நீதிபதி ரங்கராஜன் வருமான வரித் தீர்வாயத்தின் (Income Tax Appellate Tribunal) தலைவராக இருந்தவர்.

இந்தப் பேச்சை முழுமையாகக் கேட்க முடியாமல் எனது மகள் தொல்லை கொடுத்ததனால் வீட்டுக்குப் போகவேண்டி வந்தது. நல்ல குடிமகனாக இருப்பதற்கு பதில் ஒரு விடுமுறை நாளில் நல்ல தகப்பனாக இருக்கலாமே? நீதிபதியின் பேச்சு அச்சிட்ட தாளில் வழங்கப்பட்டதாம். நண்பனிடம் உள்ளது. வாங்கிப் படித்து விட்டு எழுதுகிறேன்.

குருமூர்த்தி - உலகப் பொருளாதாரம் பற்றி

குருமூர்த்தியின் 'பூகம்ப நிலையில் உலகப் பொருளாதாரம்!' பற்றி
துக்ளக் 10 டிசம்பர் 2003 தேதியிட்ட இதழ், "தண்ணீர் விட்டோ வளர்த்தோம்" கட்டுரைத் தொடரின் 62ஆவது பகுதியிலிருந்து (சென்ற இதழின் அமெரிக்காவின் ஊதாரித்தனத்தால் வரும் விளைவுகள் பற்றிய தொடர்ச்சி)

* போன வாரம் அமெரிக்கா எப்படி இறக்குமதிகளையே நம்பி இருப்பதாலும் அவர்களது இறக்குமதி ஏற்றுமதியை விட மிக அதிகமாக இருப்பதாலும் மற்ற நாடுகளின் சேமிப்புகளை அமெரிக்கர்கள் அழித்துக் கொண்டிருக்கிறார்கள் என்று பார்த்தோம் (இது குருமூர்த்தியின் கருத்து மட்டுமல்ல, அமெரிக்கப் பொருளாதார நிபுணர்கள் முதல் உலகனைத்தும் உள்ள அனைவரும் அறிந்துள்ளது.) இதன் விளைவுகள் என்ன?

* நடைமுறையில் இருக்கும் அமெரிக்கப் பொருளாதாரக் கொள்கை சேமிப்பினை ஆதரிக்காமல் செலவினை ஆதரிக்கிறது. வங்கிகளில் சேமித்து வைத்திருக்கும் பணத்துக்கு மிகவும் குறைவான வட்டி, கடனுக்கு வாங்கும் பணத்திற்குக் குறைவான வட்டி, இறக்குமதியின் மூலம் நாட்டிற்குக் கொண்டுவரப்படும் பொருள்களில் விலை குறைவு, அரசாங்கம் அளிக்கும் சோஷியல் செக்யூரிட்டி மான்யங்கள் ஆகியவற்றினால் அமெரிக்கர்களுக்கு சேமிக்கும் எண்ணமே போய் விட்டது. அரசும் மக்கள் செலவு செய்ய செய்யத்தான் வியாபாரம் பெருகும் என்று எண்ணுகிறது.

* பல நாடுகளின் பொருளாதாரம் அமெரிக்காவிற்கு அவர்கள் அனுப்பும் ஏற்றுமதியில் உள்ளது. அமெரிக்கா தன் இறக்குமதியைக் குறைத்தால் உடனடியாக இந்நாடுகளின் பொருளாதாரம் வெகுவாக பாதிக்கப்படும். டாலரின் மதிப்பு வெகுவாகக் குறைந்தால் அல்லது அமெரிக்கப் பொருளாதாரம் பாதிக்கப்பட்டால், இந்தியப் பொருளாதாரமும் ஓரளவுக்கு பாதிக்கப்படும்.

* வாரன் பஃபெட் அமெரிக்கா இறக்குமதியைக் குறைக்காமல், அதே சமயம் ஏற்றுமதி-இறக்குமதிகளுக்கான ஏற்றத்தாழ்வுகளை சமன்படுத்தும் விதமாக 'இம்போர்ட் கிரெடிட் (IC)' என்னும் கருத்தை முன்வைத்துள்ளார். இதன்மூலம் ஏற்றுமதி செய்யும் வெளிநாடுகள் எப்படியாவது தங்களுக்குத் தேவையான அமெரிக்கப் பொருட்களை வாங்க முயற்சிக்க வேண்டும். அதுபோல அமெரிக்கர்களும் வெளிநாடுகளுக்கு விற்பனை செய்யக்கூடுமாறு புதிதாக எதையேனும் உருவாக்க முனைவார்கள். ஆனால் குருமூர்த்தி அமெரிக்கா தனது இறக்குமதியைக் குறைக்க முனைகிறது என்கிறார். அவ்வாறு இருப்பதாகத் தெரியவில்லை. ஒருவேளை அமெரிக்கா இரும்பு/எஃகு ஆகியவற்றை இறக்குமதி செய்வதற்கு விதித்திருக்கும் அதிக வரியைப் பற்றி அப்படிச் சொல்கிறார் போல. அதைக்கூட அமெரிக்கா விலக்கிக் கொள்ளப் போகிறதென்று தெரிகிறது.

குருமூர்த்தியின் முடிவான தொகுப்பு:

1. சேமிக்கும் நாடுகள் அமெரிக்கா போன்ற செலவழிக்கும் நாடுகளுக்குக் கடன் கொடுத்து தன்னுடைய பொருள்களை ஏற்றுமதி செய்து விற்பது; அதன் மூலம் முன்னுக்கு வரும் முறை இனிமேல் பலிக்காது.

2. செலவழிப்பதையே ஆதாரமாக வைத்து ஒரு நாடு பொருளாதாரத்தை வளர்க்க முடியாது.

3. மற்ற நாடுகளுக்கு ஏற்றுமதி செய்து மாத்திரமே ஒரு நாடு நிரந்தரமான முறையில் வளர முடியாது.

இதுபற்றிய எனது கருத்துகளை வரும் நாட்களில் விளக்குகிறேன்.

முந்தையது: அமெரிக்காவின் ஊதாரித்தனம் பற்றி

சங்கம்: மாலன், மன்னர்மன்னனொடு சந்திப்பு

சவுரவ் கங்குலியும், வெங்கட் லக்ஷ்மனும் ஆஸ்திரேலியப் பந்து வீச்சாளர்களைப் பந்தாடிக் கொண்டிருக்கும்போது மனதைக் கட்டுப்படுத்திக் கொண்டு சன் நியூஸில் மாலன் - மன்னர்மன்னன் சந்திப்பு பார்த்தேன். மன்னர்மன்னன் பாரதிதாசனது மகன். 'பாட்டுப் பறவைகள்' என்ற புத்தகம் எழுதியுள்ளார், தனது தந்தையைப் பற்றி, தந்தையின் ஆதர்ச குரு பாரதியாரைப் பற்றி. மாலனது பாரதியார் பக்தி தெரிந்ததே.

பாரதிதாசன், பாரதியார் மீதான குறும்படம் (அல்லது நெடும்படம்?) எடுக்க விரும்பி கதைவசனம் எழுதிக் கொண்டிருந்தாராம். அதில் பாரதியாரின் சவ ஊர்வலம் பற்றி எழுதும் காட்சியை எழுதிமுடிக்கையில் இவருக்கும் மாரடைப்பு வந்து பின்னர் அதிலிருந்து மீளாமல் இறந்திருக்கிறார். அந்தக் கதை வசனம் இதுவரைக் காணாமல் போய் இப்பொழுது மன்னர்மன்னன் மூலம் கிடைத்துள்ளது. அது இந்தப் புத்தகத்தில் (பாட்டுப் பறவைகள்) சேர்க்கப்பட்டுள்ளதா என்று தெரியவில்லை.

சந்திப்பின் போது வெளிவந்த சில சுவாரசியமான தகவல்கள்:

* புதுவையில் பாரதியார் வறுமையில் உழன்றாரா - அப்படி வெளிவந்த செய்திகள் தவறு என்று பாரதிதாசனும் சொல்லியுள்ளாராம். புதுவையில் உள்ள செல்வந்தர்கள் பாரதிக்குத் தேவையான பொருளுதவி செய்துவந்தனர். ஆனால் பாரதியிடம் பணம் தங்கவே தங்காது, வந்த பணத்தை அப்படியே செலவு செய்து விடுவாராம்.

* ஒருமுறை பாரதியின் மனைவி வைகுந்த ஏகாதசி உத்சவம் செல்லும்போது பக்கத்தில் உள்ள பெண்மணிகள் 'உன் கணவன் உனக்கு நகை, பட்டுப்புடைவைகள் போடுவதில்லையோ' என்று கேட்க, கோபத்தோடு வீட்டுக்கு வந்த செல்லம்மா அன்று இரவு தன் கணவருக்குச் சோறு போடாமல் படுத்துறங்கி விட்டார். மகள் தங்கம்மா சோறளிக்கும்போது 'அம்மா எங்கே?' என்னும் கேள்விக்கு, 'ஆம், இரவு விழித்திருந்து சோறு போடும்போலாகவா அம்மாவை வைத்துள்ளீர்கள்' என்றாராம். கோபத்தால் பாரதி வீட்டை விட்டு வெளியே போய்விட, அடுத்த நாள் அனைவரும் தேடக் கிடைக்காதிருக்க, பாரதிதாசன் கடைசியாக பாரதியாரை புதுவை இரயில்வே நிலையத்தில் 'கட்டறுபட்ட சிங்கம் போல்' உலாத்திக் கொண்டிருக்கக் கண்டாராம். பின்னர் அவரிடம் ஏதோ நாடகம் நடந்து கொண்டிருக்கிறது, அதனைப் பார்க்க வாருங்கள் என்றவுடன் கோபம் குறைந்து நாடகம் பார்த்துவிட்டு வீடு வந்து சேர்ந்தாராம்.

* ஆங்கிலேய ஆட்சியாளர்களால் புதுச்சேரியில் ஒளிந்திருக்கும் பாரதி, அரவிந்தர், வவேசு அய்யர் ஆகியோரைப் பிடிக்க முடியாததால் ஆங்கிலேயர்களும் பிரெஞ்சுக் காரர்களும் ஒரு ஒப்பந்தம் ஏற்படுத்திக்கொண்டு இரு நாட்டுப் பாராளுமன்றங்களிலும் சட்டம் கொண்டுவந்து ஒரு நாட்டின் பெரிய காலனிக்கு அருகில் உள்ள மற்ற நாட்டின் சிறு காலனியை மாற்றிக் கொள்ளலாம் என்று முடிவு செய்தனராம். தென்னமெரிக்காவில் உள்ள இரு சிறு தீவுகளை புதுச்சேரிக்கு பதிலாக மாற்றிக் கொள்ள முடிவானதாம். அப்பொழுது புதுச்சேரி கவர்னருக்கு ஆலோசனை கொடுக்க ஐவர் குழு இருந்தது. பாரதி, அரவிந்தர், வவேசு ஆகியோரின் நண்பர்கள் அப்பொழுது பதற்றப்பட்டு சட்டங்களை ஆராய்ந்து புதுச்சேரி மக்களின் (வாக்கெடுப்பு மூலம்??) ஆதரவு இல்லாமல் இந்த மாற்றம் ஏற்படக்கூடாது என்பதனைக் கண்டறிந்து கவர்னரிடம் பேசி இந்த நில-மாற்றம் நடக்காது பாரதி முதலியவர்களைக் காப்பாற்றினர்.

* பாரதிதாசன் பெரியார் இயக்கத்தில் இருக்கும்போது ஏன் இன்னமும் பாரதியின் தாசனாகத் தன் பெயரை வைத்துக் கொண்டிருக்கிறார் என்ற கேள்விக்கு, பெரியாருக்கும் முன்னதாகவே சுயமரியாதை, சாதி எதிர்ப்பு ஆகியவற்றைப் பேசியவர் பாரதி, அதனால் இளம் வயதிலேயே தனக்கு ஏற்பட்ட தோற்றத்தை வைத்து அதே பெயரை வைத்துக் கொண்டிருப்பதே சரியானது என்றாராம் பாரதிதாசன்.

பி.கு: சவுரவ் கங்குலி சதம் அடித்து விட்டார். வெங்கட் லக்ஷ்மன் ஐம்பதுக்கும் மேல்.

மாலன் - ஞானக்கூத்தன் சந்திப்பு

ப.சிதம்பரம் - அரச தர்மம்!

ப.சிதம்பரம் - அரச தர்மம்!
கல்கி 7/12/2003 இதழ், ப.சிதம்பரத்தின் 'நமக்கே உரிமையாம்' - 7

அரசாங்கம் vs நீதிமன்றங்கள்தான் இந்த இதழிலும். கடந்த இரண்டு மாதங்களாக நிகழ்ந்த மூன்று வழக்குகள் பற்றி. அவை:

1. தி ஹிந்து பத்திரிக்கை vs தமிழக சட்டமன்றம்: "ஒரு சட்டமன்றம் நிறைவேற்றும் தீர்மானத்தை, அறிவிக்கும் தீர்ப்பை, நீதிமன்றம் பரிசீலிக்க முடியுமா, முடியாதா" என்பதுதான் கேள்வி என்கிறார் சிதம்பரம். கேள்வி அதுமட்டுமல்ல, அதற்கு மேலாகவும் செல்கிறது என்று தி ஹிந்துவில் வந்த ஒரு செய்தி கூறுகிறது. இந்தச் செய்தியின்படி தி ஹிந்துவின் மீதான அவதூறு வழக்குகளும், சட்டமன்ற உரிமை மீறல் பிரச்சினையோடு சேர்த்து ஒன்றாக விவாதத்துக்கு எடுத்துக் கொள்ளப்படும்.

2. ஜெயலலிதா மற்றும் பலர் மீதான சொத்துக் குவிப்பு ஊழல் வழக்கு: தமிழக அரசின் மீதான உச்ச நீதிமன்றத்தின் கடுமையான குற்றச்சாட்டு ("அரசு வழக்கறிஞரும், குற்றம் சாட்டப்பட்டவர்களும் கைகோத்துக் கொண்டு நீதியின் பாதையைச் சீர்குலைக்க முயன்றார்கள்.") மற்றும் இந்த வழக்கு தமிழகத்திலிருந்து கர்நாடகத்துக்கு மாற்றப்பட்டிருப்பது பற்றி எடுத்துச் சொல்லி, சிதம்பரம் இனி கொஞ்ச காலத்திற்காவது "தமிழன் என்று சொல்லடா, தலை நிமிர்ந்து நில்லடா" என்று பாட முடியாது என்கிறார். இந்த நிலை ஒன்றும் புதிதல்லவே? வந்து பல வருடங்களாகிறதே?

3. தமிழக முதல்வர் ஜெயலலிதா மீதான டான்சி வழக்கில் உச்ச நீதிமன்றத் தீர்ப்பு: இந்த வழக்கில் ஜெயலலிதா மீது சட்டப்படி குற்றம் இல்லை என்று உச்ச நீதிமன்றம் கொடுத்த தீர்ப்பை ஏற்றுக் கொள்ள வேண்டும் (காசி: இதைக் கவனிக்கவும்!), என்று சொல்லும் சிதம்பரம் இவ்வாறும் சொல்லுகிறார்:
ஒவ்வொரு வார்த்தையையும் ஆழமாகப் படித்துவிட்டுக் குற்றம் சாட்டப்பட்டவர்கள் மகிழ்ச்சியடைந்தால், நாமும் மகிழ்ச்சியடைவோம். அந்தத் தீர்ப்பைப் படித்துவிட்டு யாருடைய மனசாட்சியும் குறுகுறுக்கவில்லை என்றால், நம்முடைய மனசாட்சியும் உறங்கட்டும்."
எனக்கென்னவோ தற்போதைய சூழ்நிலையில் மனசாட்சியெல்லாம் ஒத்துவராத விஷயங்கள். முதலில் சட்டப்படி ஒழுங்காக ஆட்சி நடத்த முயற்சிப்போம். பின்னர் மனசாட்சிப்படி, சட்டத்துக்கும் மேலாக, "தார்மீக நெறிப்படி" ஆட்சி செலுத்துபவர்களைத் தேடலாம்.

4. நீதிபதி கற்பகவிநாயகம் பற்றி. இது ஷெரிஜா பானு கஞ்சா வழக்கு பற்றி. நீதிபதி கற்பகவிநாயகம் அதிரடித் தீர்ப்புகளால், வித்தியாசமான தீர்ப்புகளால் பெரிதும் செய்தித்தாள்களில் பேசப்படுபவர். [கதை விவரம்: மேற்குறிப்பிட்ட கஞ்சா வழக்கில் (இதுபற்றித் தனியாக எழுத வேண்டும்) மதுரை காவல்துறைக் கமிஷனரை விசாரிக்கும்போது நீங்கள் யாரையோ திருப்திப்படுத்த இம்மாதிரி அவசர அவசரமாக ஷெரிஜா மீது வழக்குப் போட்டு இரவோடு இரவாக சென்னைக்குக் கொண்டு வந்துள்ளீர்கள் என்று சொல்லியுள்ளார். உடனே இதுதான் சாக்கு என்றமாதிரி கருணாநிதி தான் செய்தித்தாள்கள்களுக்கு அனுப்பும் கேள்வி-பதில் சர்க்குலரில் (இதில் கிரிக்கெட் நடுவர் ஹரிஹரன் கிரிக்கெட் மைதானத்தில் கொடுக்கும் தீர்ப்பு பற்றிய கருத்து முதல் கற்பகவிநாயகம் தீர்ப்பு பற்றிய கருத்து வரை இருக்கும்!) நீதிபதி காட்டிய கை ஜெயலலிதாவை நோக்கிப் பாய்கிறது என்றவண்ணம் சொல்லியிருந்தார். உடனே அதிமுக வக்கீல் ஜோதி நீதிபதி கற்பகவிநாயகம் இந்த வழக்கு விசாரிப்பிலிருந்து விலக்கப்பட வேண்டும் என்று மனு கொடுத்து பின்னர் அதனைத் திரும்பப் பெற்றுக் கொண்டார். இதனிடையே நீதிபதியே தற்போதைய அரசாட்சி பிரமாதம் என்று புகழ்ந்து, கருணாநிதியை கடிந்து கொண்டு, தானும் வழக்கிலிருந்து விலகிக் கொண்டார். நீதிபதி சொக்கலிங்கம் இந்த வழக்கை ஏற்றுக் கொண்டு ஷெரிஜா மீதான பெயிலைத் தள்ளுபடி செய்தார். கற்பகவிநாயகம் ஒருவேளை பெயில் கொடுத்திருப்பாரோ என்னவோ?]

சிதம்பரம் "திமுக, அஇஅதிமுக ஆகிய இரண்டு கட்சிகளுக்கும் எல்லாமே பகடைக்காய்தான், நீதிமன்றம் உட்பட" என்கிறார்.

கட்டுரையை முடிக்கும்போது "அரசியல் கலாசாரச் சீரழிவுக்கு முக்கிய காரணங்கள் ஊழலும் வன்முறையும். இந்த இரண்டு நோய்களும் முற்றிவிட்டால், தமிழர் நாகரிகமே சிதைந்துவிடும். விழிப்புள்ள தமிழர்கள்தான், தமிழர் நாகரிகத்தைக் காப்பாற்ற வேண்டும்." என்கிறார்.

கல்கி 30/11/2003 இதழ், ப.சிதம்பரத்தின் 'நமக்கே உரிமையாம்' - 6

Saturday, December 06, 2003

சிற்றிதழ்களின் தொகுப்புகள்

இன்று வாங்கிய புத்தகங்களில் ஒருசில (இன்னமும் படிக்க ஆரம்பிக்கவில்லை):

1. மணிக்கொடி இதழ் தொகுப்பு, தொகுப்பாளர்கள்: சிட்டி, அசோகமித்திரன், ப.முத்துக்குமாரசாமி, கலைஞன் பதிப்பகம், 19, கண்ணதாசன் சாலை, தியாகராய நகர், சென்னை - 17, விலை ரூ. 300, முதல் பதிப்பு 2001. 864 பக்கங்கள்.

மணிக்கொடி இதழ்களில் (1933-1939) வெளிவந்ததிலிருந்து தேர்ந்தெடுக்கப்பட்ட கட்டுரைகள், கவிதைகள், கதைகள், மொழிபெயர்ப்புகள்.

2. சக்தி களஞ்சியம், தொகுப்பாளர்கள் வ.விஜயபாஸ்கரன், வை.கோ.அழகப்பன், கலைஞன் பதிப்பகம், 19, கண்ணதாசன் சாலை, தியாகராய நகர், சென்னை - 17, இரு தொகுதிகள், ஒவ்வொன்றும் விலை ரூ. 300 (மொத்தம் ரூ. 600), முதல் பதிப்பு 2002. மொத்தப் பக்கங்கள்: 1424

சக்தி இதழ்களில் (1939-1947?) வெளிவந்ததிலிருந்து தேர்ந்தெடுக்கப்பட்டவை

3. சரஸ்வதி களஞ்சியம், தொகுப்பாளர் வ.விஜயபாஸ்கரன், கலைஞன் பதிப்பகம், 19, கண்ணதாசன் சாலை, தியாகராய நகர், சென்னை - 17, விலை ரூ. 350, முதல் பதிப்பு 2001. 935 பக்கங்கள்.

சரஸ்வதி இதழ்களில் (1955-1962) வெளிவந்ததிலிருந்து தேர்ந்தெடுக்கப்பட்டவை

4. சுபமங்களா களஞ்சியம், தொகுப்பாளர் இளையபாரதி, கலைஞன் பதிப்பகம், 19, கண்ணதாசன் சாலை, தியாகராய நகர், சென்னை - 17, விலை ரூ. 250, முதல் பதிப்பு 2000. 860 பக்கங்கள்.

சுபமங்களா இதழ்களில் (19??-19??) வெளிவந்ததிலிருந்து தேர்ந்தெடுக்கப்பட்டவை

தமிழில் இதழ் சார்ந்த படைப்புலகத்தின் ஆரம்பம் முதல் 1980கள் வரை இவற்றைப் படிக்கும்போது நிறையத் தெரிந்து கொள்ளலாம். கலைஞன் பதிப்பகத்துக்கு மிக்க நன்றி. இந்த வரிசைகளில் இன்னமும் பல வரவிருக்கின்றன போலும்.

Friday, December 05, 2003

கம்பியில்லா வலைப்பின்னல் இணைப்புகள் - காசி

காசி தனது வலைப்பதிவில் கம்பியில்லா இணைப்புகள் பற்றி எழுதி வருகிறார். இதுவரையில் இவர் எழுதியவை 1 | 2 | 3

கணினிகளை இணைத்துப் பின்னும் வலைப்பின்னலை சிலகாலம் முன்னர் வரை கம்பிகள் மூலமாகவே இணைத்து வந்தனர். ஆரம்ப காலத்தில், இப்பொழுதெல்லாம் இந்தியாவில் தொலைக்காட்சி ஓடைகளை அனுப்பப் பயன்படும் கோ-ஆக்ஸியல் கம்பிகளைப் பயன்படுத்தி இந்த வலைப்பின்னல் உருவாக்கப்பட்டது. பின்னர் UTP (un-twisted pair) எனப்படும் பின்னப்படாத இரட்டை-செப்புக் கம்பிகள் உள்ளடக்கிய குழாய் கொண்டு இந்த வலைப்பின்னல் நிகழ்ந்தது. [கம்பி மூலமான தொலைபேசிகள் பின்னப்பட்ட இரட்டை செப்புக் கம்பிகளாலானவை (twisted pair copper wire) மூலமாக இன்னமும் இயங்குகின்றன]. பின்னப்பட்ட/பின்னப்படாத செப்புக் கம்பிகள் என்னும்போது நேரடியான, மெல்லிய செப்புக் கம்பிகள் மீது மெல்லிய பிளாஸ்டிக் உறை ஒன்று இருக்கும் - மின்சாரம் ஏந்திச் செல்லும் கம்பிகள் போல். இந்த இணைய 1, 0 பிட்டுகளும் சரி, கம்பித் தொலைபேசி சிக்னல்களும் சரி, அவையும் மின்சார சிக்னல்கள்தானே?

ஆனால் வீடுகள் மற்றும் சிறு அலுவலகங்கள் ஆகியவற்றில் இரண்டிலிருந்து பத்துக்குள் இருக்கும் கணினிகளை முழுக்க முழுக்க கம்பியில்லா இணைப்புகள் மூலம் பின்னி, இணைத்து வைக்கலாம். இதனால் பல பயன்கள் உள்ளன. கணினிகளை நகர்த்தும் போது முன்னமே வலைப்பின்னலுக்கான கம்பிகள் அருகில் உள்ளதா என்று பார்க்கும் கவலை இல்லை. மடிக் கணினியாக இருந்தால் அதனை பக்கத்து அறைக்குக் கொண்டு சென்று வேலை செய்யலாம். அப்பொழுதும் அது அந்த சுற்றுப்புறத்துக்கான பின்ன்னலுக்குள்ளேயே (LAN) இருக்கும்.

ஆனால் இந்தியாவைப் பொறுத்தவரையில் இந்தக் கம்பியில்லா வலைக்கான உபகரணங்கள் எளிதாகக் கிடைப்பதில்லை.

நான் பல நாட்களாக ஒரு வயர்லெஸ் ரவுட்டர்/ஸ்விட்ச் தேடிக் கொண்டிருக்கிறேன். இது என் வீட்டுக்கு வரும் டிஷ்நெட் டி.எஸ்.எல் சேவையோடு தொடர்பு கொள்ளக்கூடியதாக இருக்க வேண்டும். அத்துடன் என் மடிக்கணினிக்கும், வீட்டில் இருக்கும் மற்ற இரண்டு கணினிகளுக்கும் வயர்லெஸ் அடாப்டர் ஆகியவை தேவை.

அமெரிக்கா/இங்கிலாந்து ஆகிய இடங்களில் கிடைக்கும் எதையேனும் வாங்கினால் டிஷ்நெட் சேவையோடு ஒத்துப் போகுமா என்று தெரியாது. டிஷ்நெட் காரர்களுக்கு இதைப்பற்றிக் கேட்டால் தலையும் புரிவதில்லை, காலும் புரிவதில்லை.

இன்னும் சிலகாலம் பொறுத்திருப்போம்!

Thursday, December 04, 2003

சட்டமன்ற உரிமை மீறல் பற்றி சோ - 2

துக்ளக் 3/12/2003 இதழிலிருந்து:

முதல் பாகத்தில் இங்கிலாந்துப் பாராளுமன்றத்தின் உரிமைகள், இந்திய சட்டமன்றங்கள் மற்றும் பாராளுமன்றங்களுக்கும் உள்ளது என்று அறிந்தோம். ஆனால் இந்த உரிமைகளை ஏன் இங்கிலாந்துப் பாராளுமன்றம் தனக்காக வேண்டும் எனப் பெற்றது என்பதையும் அது ஏன் இந்திய மன்றங்களுக்குப் பொருந்தாது என்பதையும் விவரிக்கிறார்.

* இங்கிலாந்துக்கு எழுதப்பட்ட அரசியல் நிர்ணயச் சட்டம் ஏதும் கிடையாது. அதனால் இங்கிலாந்துப் பாராளுமன்றத்துக்கு இன்னதுதான் உரிமைகள் என்று எப்போதும் எழுதப்படவில்லை.

* இங்கிலாந்தில் ஆரம்பத்தில் மன்னராட்சிதான் முதன்மையாக இருந்தது. [இப்பொழுதும் அரசர்/அரசி உப்புக்குச் சப்பாணியாக இருக்கிறார்கள். டாப்ளாய்டுப் பத்திரிக்கைகள் மட்டும்தான் இவர்களைக் கண்டுகொள்கிறது.] பாராளுமன்றம் ஆரம்பத்தில் அரசன் சொல்லுக்கு தலையாட்டுவதை மட்டுமே செய்து வந்தது.

* மேலும் இங்கிலாந்தில் மக்களவை, பிரபுக்களவை என்று இரு அவைகள். ஆரம்பத்தில் பிரபுக்கள் அவை மக்களவையை விட மிகவும் பலம் வாய்ந்ததாக இருந்தது. இப்பொழுது கூட நாட்டின் மிக உயர்ந்த நீதிமன்றமாக இந்தப் பிரபுக்கள் அவை நடந்து கொண்டு வருகிறது.

* ஆக, இப்படிப்பட்ட ஒரு நிலையில், மக்களவை தங்களுக்கு மேலாக பிரபுக்கள் அவையும், அரசரும் ஆதிக்கம் செலுத்திக் கொண்டிருக்கையில் தங்களது உரிமைகளைக் காப்பாற்ற வேண்டி சிறிது சிறிதாக உரிமைகளைக் கோர ஆரம்பித்தனர். அரச குடும்பத்தின் ஆதிக்கமும், பிரபுக்களவையின் ஆதிக்கமும் குறையக் குறைய, மக்களவையின் ஆதிக்கம் நாளடைவில் அதிகமானது. ஆனாலும் மக்களவையிடம் ஒருசில உரிமைகள் தங்கிப் போய் விட்டன. அதில் ஒன்றுதான் மக்களவையின் மீது வேறெவருக்கும் எந்தவிதமான அதிகாரமும் கிடையாது, அதாவது மக்களவையின் நடவடிக்கைகளில் நீதிமன்றம் தலையிட முடியாது என்பது. மக்களவையே ஒருவர் மீது குற்றம் சாட்டி, தண்டனையும் கொடுக்கலாம் என்பது.

* இப்படிப்பட்ட உரிமை இருந்தபோதிலும் பாராளுமன்றத்தின் விசேஷக் குழு ஒன்று பாராளுமன்ற உரிமைகளைப் பற்றி ஆராய்ந்து தனது அறிக்கையில் "இந்த விஷயத்தில் தன்னுடைய அதிகாரத்தைப் பாராளுமன்றம் எவ்வளவு குறைவாகப் பயன்படுத்த முடியுமோ, அவ்வளவு குறைவாகத்தான் பயன்படுத்த வேண்டும்... அதுவும் கூட, தான் இயங்குவதற்குத் தவிர்க்க்க முடியாத அவசியம் ஏற்படும்பொழுது, தன்னையும், தனது அங்கத்தினர்களையும், அதிகாரிகளையும் காத்துக் கொள்ளும் அளவில்தான் - இந்த அதிகாரங்கள் பயன்படுத்தப்பட வேண்டும். விமர்சனங்கள் எவ்வளவு கடுமையாக இருந்தாலும் சரி, எவ்வளவு அநியாயமாக இருந்தாலும் சரி, - அந்த விமர்சனங்களை ஒடுக்குவதற்காக, தண்டனை கொடுக்கும் தன்னுடைய அதிகாரத்தை பாராளுமன்றம் பயன்படுத்தக் கூடாது. ஏனென்றால், விமர்சனம் என்பதுதான் ஜனநாயகத்தின் உயிர் மூச்சு, ரத்த ஓட்டம்!" என்று கூறியுள்ளது.

இதையெல்லாம் வைத்துப் பார்க்கும் போது இந்தியப் பாராளுமன்றமும், சட்ட மன்றங்களும் தங்களது செயல்முறைகள் பாதிக்கப்படாத போது எவ்விதக் கடுமையான விமரிசனங்களையும் ஏற்றுக்கொள்ள வேண்டும்.

* ஒரு உரிமைப் பிரச்சினை வழக்கில் உச்ச நீதிமன்றம் (வருடம் மற்றும் வேறு தகவல்கள் கொடுக்கப்படவில்லை) கருத்து சொல்லும்போது "உயர்நீதிமன்றம் என்ற வகையில் இங்கிலாந்துப் பாராளுமன்றம் பெற்ற உரிமைகள் அனைத்தும், இந்தியப் பாராளுமன்றத்திற்கு வந்து விட்டதாகக் கருத்தில் எடுத்துக் கொள்ள முடியாது. இந்தியாவில் பாராளுமன்றமோ, சட்டசபைகளோ இயற்றும் சட்டங்கள் நீதிமன்றங்களின் பரிசீலனைக்குட்பட்டவை. அதுவும் தவிர, இந்தியாவில் குடிமகனின் அடிப்படை உரிமைகள் வரையறுத்துச் சொல்லப்பட்டிருக்கின்றன. இந்தக் காரணங்களினாலும், இங்கிலாந்தின் பாராளுமன்ற உரிமைகள் அனைத்தும், இந்தியப் பாராளுமன்றத்திற்கும், சட்டசபைகளுக்கும் அப்படியே வந்துவிட்டன என்று எடுத்துக் கொள்ள முடியாது" என்று சொல்லியிருக்கிறதாம்.

ஆக 'தி இந்து' பத்திரிக்கை விவகாரத்தில் (அதற்கு முந்தைய பல விவகாரங்களிலும்) தமிழக சட்டமன்றம் செய்தது எந்த விதத்திலும் நியாயப்படுத்த முடியாத ஒன்று.

சட்டமன்ற உரிமை மீறல் பற்றி சோ - 1

சத்தீஸ்கரிலும் பாஜக

எங்கும் காவி மயம்? அஜீத் ஜோகி தலைமையிலான காங்கிரஸ் தோற்றது சரியே என்று தோன்றுகிறது. ஆனால் பாஜகவால் சத்தீஸ்கரிலோ, அல்லது புதிதாக ஜெயித்த மற்ற இரண்டு மாநிலங்களிலோ நல்லாட்சி கொடுக்க முடியுமா என்று பொறுத்திருந்துதான் பார்க்க வேண்டும்.

காங்கிரசுக்கு இது மிகவும் வருத்தம் கொடுக்கக் கூடிய நிகழ்வு. மூன்று மாநிலங்களில் ஆட்சியை இழந்துள்ளது காங்கிரஸ். பாராளுமன்றப் பொதுத்தேர்தல் இதனால் சீக்கிரம் வரக்கூடிய வாய்ப்பு உள்ளது.

சட்டமன்றத் தேர்தல் முடிவுகள்

தற்போதைய நிலவரப்படி தில்லியில் காங்கிரசும், மத்யப் பிரதேசத்திலும், இராஜஸ்தானிலும் பாஜகவும், சத்தீஸ்கரில் யார் வருவார் என்று சொல்ல முடியாத நிலையிலும் உள்ளது.

மூன்று மாநிலங்களிலும் பெண்கள் முதலமைச்சர்களாக வரப்போகிறார்கள். தில்லியில் ஷீலா தீக்ஷித் பதவியைத் தக்க வைத்துக் கொள்வார். இராஜஸ்தானில் வசுந்தரா ராஜே, மத்தியப் பிரதேசத்தில் உமா பாரதி.

இராஜஸ்தான் முடிவு கருத்துக் கணிப்புகளுக்கு எதிராக வந்துள்ளது.

என் கருத்து: தில்லி முடிவு சரியானதாகத் தோன்றுகிறது. மக்கள் ஷீலா தீக்ஷித் மீது நம்பிக்கை வைத்திருப்பதைக் காட்டுகிறது. அவரும் நம்பத்தகுந்த, நேர்மையான முதல்வராகவும், வளர்ச்சியில் கருத்துடையவராகவும் உள்ளாரென்று தெரிகிறது.

மத்தியப் பிரதேசம்: பாஜக, அதுவும் உமா பாரதியை முன்னுக்கு நிறுத்தியது வருத்தமானது. இவர் முதல்வராவதால் அந்த மாநிலத்துக்கு என்ன கிடைக்கும் என்று தெரியவில்லை. திக்விஜய் சிங், கிட்டத்தட்ட சந்திரபாபு நாயுடு போல் மாநிலத்தை முன்னுக்குக் கொண்டுவரத் திட்டமிட்டவர். ஆனால் பத்து வருடங்களாக மாநிலத்தை ஆண்டதில் மக்களுக்கு அவர்மீது நம்பிக்கை போய்விட்டதோ என்னவோ? உமா பாரதி காவி உடை, ராமர் கோயில் என்று பேசாமல் உருப்படியாக ஆட்சி செய்வார் என்று நம்புவோம்.

இராஜஸ்தான்: கருத்துக் கணிப்புக்கு எதிரான முடிவு. அஷோக் கெஹ்லாட் திறமையாகத்தான் ஆட்சி செய்தார் என்று பேச்சு. ஏன் அவரைத் தூக்கி ஏறிந்துள்ளனர் மக்கள் என்று புரியவில்லை. வசுந்தரா ராஜே மத்திய அமைச்சராக இருந்தவர். உமா பாரதியைப் போல் திரிசூலம் தூக்கிக் கொண்டு அலைபவரல்ல. பெண்களாட்சி நல்ல ஆட்சியாக அமையுமா என்று பார்ப்போம்.

சத்தீஸ்கரில் இழுபறி நிலைக்கு வருவது காங்கிரஸ்/அஜீத் ஜோகிக்குக் குறைபாடுதான். முடிவாகும் வரை பொறுத்திருப்போம். அஜீத் ஜோகி மீதும் பாஜக மீதும் பல ஊழல் புகார்கள். பாஜக முதல்வர் என்று முன்னிறுத்திய திலீப் சிங் ஜுதேவ் 'பணம் வாங்கியது' வீடியோவில் பிடிக்கப்பட்டுள்ளது. அஜீத் ஜோகி மீது எண்ணற்ற புகார்கள் தேர்தல் வாரியத்திடமிருந்தே வந்துள்ளன. என்னைப் பொறுத்தவரை ஜோகி பதவி இழக்க வேண்டும். பாஜகவிலிருந்து ஜுதேவ் அல்லாத வேறு ஒருவர் முதல்வராக வருதல் அவசியம்.

Sunday, November 30, 2003

ஜெயேந்திரர் போட்ட தடை

கல்கி 30/11/2003 தேதியிட்ட இதழ் வாசகர் கடிதத்திலிருந்து ஒன்று:

'ஜயேந்திரர் போட்ட தடை' என்ற தலைப்பில் வந்த செய்தியைப் படித்தேன். 'ஞானபீடம்' என்ற நாடகத்தை ராணி சீதை ஹாலில் 15.9.2003 அன்று பார்த்தேன். நாடகத்தில் எந்த ஒரு மதத்தையோ, எந்த ஜாதியையோ, பற்றி தவறாகக் கூறாமல் ஹிந்து சமயத்தின் உயர்ந்த குறிக்கோள்களை எளிதில் புரியும்படியாக விளக்கப்பட்டிருந்தது. காலத்திற்கேற்ற இந்த நாடகத்தைத் தவறாகப் புரிந்து கொண்டு ஏன் தடை செய்ய வேண்டும் என்று புரியவில்லை. பல இடங்களில் நடத்தப்பட வேண்டிய நல்ல நாடகம். (டி.பானுமதி, சென்னை-61)

இதுபற்றிய என் முந்தைய வலைப்பதிவு

என் கேள்விகள் அதில் சொன்னது போலவே. யார் இப்படிப்பட்ட நாடகத்துக்குத் தடை போட முடியும்? ஜெயேந்திரர் சட்டத்துக்கு மீறிய மனிதரா?

ஏன் இதுபற்றி மற்ற செய்தித்தாள்களிலோ, பத்திரிக்கைகளிலோ செய்தியே வரவில்லை?

குருமூர்த்தி - அமெரிக்காவின் ஊதாரித்தனம் பற்றி

குருமூர்த்தியின் 'ஊதாரித்தனமும், உலகப் பொருளாதாரமும்!' பற்றி
துக்ளக் 3 டிசம்பர் 2003 தேதியிட்ட இதழ், "தண்ணீர் விட்டோ வளர்த்தோம்" கட்டுரைத் தொடரின் 61ஆவது பகுதியிலிருந்து

இந்தியாவிலிருந்து அமெரிக்காவிற்குப் போகிறது கட்டுரைத் தொடர். அமெரிக்காவின் டிரேட் டிபிசிட் அதாவது உலக நாடுகளுடனான இறக்குமதி கழித்தல் ஏற்றுமதி மிக அதிகமாகிக் கொண்டு வருகிறது. மற்ற உலக நாடுகள் அமெரிக்காவிற்கு வாங்குவதை விட அதிகம் விற்பனை செய்வதால் கிடைக்கும் பணத்தை மீண்டும் அமெரிக்காவிலேயே முதலீடு செய்வதனால் அமெரிக்காவின் நிலங்கள், பாண்டு (bonds), மற்றும் அமெரிக்கக் கம்பெனிகளின் பங்குகள் வெளிநாட்டவரிடம் போய்க்கொண்டிருக்கின்றன.

அமெரிக்க டாலரின் மதிப்பு உலக சந்தையில் குறைந்து கொண்டே வருகிறது. ஜனவரி 2002 முதல் இன்றுவரை, மற்ற நாணயங்களுக்கு முன் 12%மும், ஐரோப்பாவின் யூரோவுடன் ஒப்புநோக்குகையில் 26% குறைந்துள்ளது. இதுபற்றி பெர்க்-ஷயர் ஹதாவே என்னும் நிறுவனத்தை நிறுவிய அமெரிக்காவின் நிதித்துறை ஜாம்பவானான வாரன் பஃபெட் என்பவர் ஃபார்ச்சூன் (10 நவம்பர் 2003) பத்திரிக்கையில் ஒரு கட்டுரை எழுதியுள்ளார். குருமூர்த்தியின் இந்தக் கட்டுரை பெரும்பாலும் பஃபெட்டின் கட்டுரையை விவரிக்கிறது. [ஃபார்ச்சூன் பைசா கொடுத்து படிக்க வேண்டியது. ஆனால் இந்தக் கட்டுரை இணையத்தில் வேறொரு இடத்தில் கிடைக்கிறது PDF கோப்பாக]

"வருமானத்துக்கு மேல் கடன் வாங்குவது ஒரு குடும்பத்தை எந்த நிலைக்குக் கொண்டு செல்லுமோ, அந்த நாட்டையும் அதே நிலைக்குக் கொண்டு செல்லும். அதாவது திவால் நிலைக்குக் கொண்டு சென்றுவிடும் - என்பதுதான் அவரது [பஃபெட்டினது] தர்க்கம். ஆனால் அமெரிக்காவின் இந்தப் பொருளாதார முறை - ஊதாரித்தனம், சீனா போன்ற நாடுகளின் பொருளாதார வளர்ச்சிக்கு அடிப்படையாக அமைந்திருக்கிறது." என்கிறார் குருமூர்த்தி.

பஃபெட்டின் கட்டுரை அமெரிக்காவின் ஊதாரித்தனத்தைக் கடுமையாகச் சாடுவதுடன், மிக எளிமையான எடுத்துக்காட்டுடன் அதனை விளக்குகிறது. அத்துடன் எப்படி இந்த விற்பனைப் பற்றாக்குறையை நேரடி வரி விதிப்பின் மூலமில்லாது மற்ற வகையில் குறைக்கலாம் என்றும் விளக்குகிறார். ஆனால் இந்த முறையை உலக வர்த்தக நிறுவனம் ஏற்றுக் கொள்ளுமா என்று புரியவில்லை. சுற்றி வளைத்தாலும் இந்த இம்போர்ட் கிரெடிட் (இறக்குமதிப் பற்று) என்பது ஒருவகையில் இறக்குமதிகளின் மீதான அதிகப்படி வரிதான். இதனை மற்ற உலக நாடுகள் எதிர்க்கும். அவையும் அமெரிக்க இறக்குமதிகள் மீது இதுபோன்ற பற்றுகளை அல்லது நேரடி வரிகளை விதிக்கலாம்.

வாரன் பஃபெட்டின் கட்டுரை படிக்கப்பட வேண்டிய ஒன்று. அதனை சுட்டிக் காட்டியதற்கு குருமூர்த்திக்கு நன்றி. இந்தக் கட்டுரையை தமிழில் மொழிபெயர்க்க முயல்கிறேன்.

இத்துடன் 30 நவம்பர் 2003 தி எகானமிஸ்ட் பத்திரிக்கையில் வந்துள்ள கட்டுரையையும் சேர்த்துப் படிப்பது பயனுள்ளதாக இருக்கும்.

முந்தையது: மும்பை டப்பாவாலாக்கள் பற்றி

சங்கம்: மாலன், கவிஞர் ஞானக்கூத்தனொடு சந்திப்பு

இன்று சன் நியூஸ் தொலைக்காட்சிக் கன்னலில் மாலன் கவிஞர் ஞானக்கூத்தனோடு உரையாடினார். கவிஞரின் பென்சில் படங்கள் கவிதைத் தொகுப்பைப் பற்றிப் பேசும் விதமாகத் தொடங்கி தமிழ்க் கவிதைகள் பற்றி, மரபு பற்றி, நீதிநூல்கள் இலக்கியமாகுமா (கநாசு...) என்ற கேள்வி பற்றி, கவிதைகளினூடே கதை சொல்லல் பற்றி, சமகாலத்திய பலமொழிக் கவிதைகளில் எம்மொழிகளில் உயர்ந்த கவிதைகள் வெளியாகிக் கொண்டிருக்கின்றன, அதில் தமிழின் இடமென்ன என்று பல தளங்களிலும் சென்றது இந்த நேர்முகம்.

முப்பது நிமிடங்கள் மிகவும் குறைவானது இதுபோன்ற சந்திப்புகளுக்கு.

இதுபோன்ற நல்ல புத்தக அறிமுக நிகழ்ச்சி மனதுக்கு நிறைவாக உள்ளது.